އިންޑިއާގެ ވެކްސިން އިން މުޅި އިންސާނިއްޔަތަށް އެހީތެރިކަން ލިބޭނެ: މޯދީ

ނިއު ދިއްލީ (ސެޕްޓެމްބަރު 27) - ދުނިޔޭގައި އެންމެ ގިނަ އަދަދަކަށް ވެކްސިން އުފައްދާ ގައުމުގެ ހައިސިއްޔަތުން، އިންޑިއާގެ ހުރިހާ ވަސީލަތެއް ބޭނުންކޮށްގެން، ކޮރޯނާވައިރަހާ ދެކޮޅަށް މުޅި އިންސާނިއްޔަތަށް އެހީތެރިކަން ފޯރުކޮށްދެވޭނެ ކަމަށް އިންޑިއާގެ ބޮޑުވަޒީރު ނަރެންދުރަ މޯދީ ވިދާޅުވެއްޖެ އެވެ.

"ދުނިޔޭގައި އެންމެ ގިނައިން ވެކްސިން އުފައްދާ ގައުމުގެ ހައިސިއްޔަތުން، ކޮރޯނާވައިރަހާ ދެކޮޅަށް ކުރާ ހަނގުރާމައިގައި މުޅި އިންސާނިއްޔަތަށް އިންޑިއާ އިން އެހީތެރިކަން ފޯރުކޮށްދެވޭނެ،" އދ.ގެ އާއްމު މަޖިލީހުގައި ވާޗުކޮށް ދެއްވި ތަގްރީރުގައި މޯދީ އިއްޔެ ވިދާޅުވި އެވެ.

މޯދީގެ ތަގްރީރުގައި މޫސުމަށް އަންނަ ބަދަލުތަކާއި ޗައިނާ ބޯޑަރުގައި ހިންގި ކުރިމަތިލުންތަކަށް އަލި އަޅުވާލައްވައިފައެއް ނުވެ އެވެ. ނަމަވެސް މޯދީ ވަނީ އދ. އިސްލާހު ކުރުމަށް ގޮވާލާ ގޮވާލުން ތަކްރާރު ކުރައްވައިފަ އެވެ. އަދި ދުނިޔޭގައި ދެ ވަނަ އަށް އެންމެ އާބާދީ ބޮޑު ގައުމުގެ ހައިސިއްޔަތުން އދ.ގައި އިންޑިއާ އަށް މިހާރަށް ވުރެ ބޮޑު ރޯލެއް ދިނުމަށް އެދިވަޑައިގެންނެވި އެވެ.

"ވޭތުވެދިޔަ އަށެއް ނުވަތަ ނުވަ މަސް ދުވަސްތެރޭ ދުނިޔެ މިދަނީ ބޮޑު ރޯގާއަކާ ދެކޮޅަށް ހަނގުރާމަ ކުރަމުން. ގައުމުތައް ގުޅިގެން ކުރާ މި ހަނގުރާމައިގައި އދ. ކޮބާ؟" މޯދީ ސުވާލު ކުރެއްވި އެވެ. "އިންޑިއާގެ 1.3 ބިލިއަން މީހުން އިންތިޒާރު ކުރަމުން މި ދަނީ އދ. އިސްލާހުކޮށް ނިމޭނެ ވަގުތަކަށް."

ނޯވޭ، އަޔަލޭންޑް އަދި މެކްސިކޯއާ އެކު އދ.ގެ ސަލާމަތީ މަޖިލީހުގެ ދާއިމީ ނޫން މެންބަރެއްގެ ހައިސިއްޔަތުން ދެ އަހަރުގެ ދައުރެއް އިންޑިއާ އިން ޖެނުއަރީ 1، 2021 އިން ފެށިގެން ފުރިހަމަ ކުރާނެ އެވެ.