އެންޑީއެމްއޭގެ އޮޑިޓުން ފެންމަތިކުރި މައްސަލަތައް އޭސީސީން ދިރާސާކުރަނީ

ނެޝަނަލް ޑިޒާސްޓަ މެނޭޖްމަންޓް އޮތޯރިޓީ (އެންޑީއެމްއޭ)ގެ އޮޑިޓުން ފެންމަތިވި މައްސަލަތައް ދިރާސާކުރަމުން އަންނަ ކަމަށް އެންޓި ކޮރަޕްޝަން ކޮމިޝަން (އޭސީސީ) އިން މިއަދު ބުނެފި އެވެ.

އޭސީސީގެ މީޑީއާ އޮފިޝަލް ހަސަން މަނިކް މިއަދު ވިދާޅުވީ އޮޑިޓަ ޖެނެރަލްގެ ރިޕޯޓުން ފާހަގަކުރައްވާފައިވާ ކަންކަން ދިރާސާކުރުމަށް ފަހު ތަހުގީގުކުރުމާ މެދު ގޮތެއް ނިންމާނެ ކަމަށެވެ.

ކޮވިޑް-19 އާ ދެކޮޅަށް ކުރި މަސައްކަތްތަކުގެ ޚަރަދުތަކާ ގުޅޭ ގޮތުން އޮޑިޓް އޮފީހުން ނެރުނު ރިޕޯޓްގައި، މާލިއްޔަތު ގަވާއިދާ ޚިލާފަށް އެންޑީއެމްއޭ އިން ހިންގާފައިވާ ގޯސްތައް ފާހަގަކޮށްފައިވެ އެވެ. އޭގެތެރޭގައި، ސަރުކާރުން އަގު ކޮންޓްރޯލްކޮށްފައިވާ ކާބޯތަކެތި ބޮޑު އަގުގައި ގަތުމާއި ގެސްޓު ހައުސްތަކުގައި ތިބި ފަރާތްތަކުގެ މައުލޫމާތު ކަށަވަރު ނުކޮށް ބިލްތަކަށް ފައިސާ ދައްކާފައިވުމާއި ގެސްޓު ހައުސްތަކާ އެކު އެއްބަސްވުން ނަހަދައި ފައިސާ ހޭދަކުރުމާއި ހިލޭ އެހީގެ ގޮތުގައި ލިބުނު ތަކެތީގެ ސްޓޮކް އެކަށީގެންވާ ގޮތެއްގައި ބަލަހައްޓާފައި ނުވުމާއި އޯޑަރުކުރި ތަކެތި ލިބުނު ކަން ކަށަވަރުނުކޮށް ތަކެތި ލިބުނު ކަމަށް ސިސްޓަމްގައި ރެކޯޑް ކުރުން ފަދަ ކަންތައް ހިމެނެ އެވެ.

މި މައްސަލަތައް ތަހުގީގުކުރަން އޮޑިޓުގައި ވަނީ ލަފާދީފަ އެވެ.

އޮޑިޓް ރިޕޯޓުގައި އެންޑީއެމްއޭ އިން މާލިއްޔަތު ގަވާއިދާ ޚިލާފަށް ހިންގާފައިވާ ކަންކަން ފެންމަތިކޮށްފައި ވިޔަސް އެ ތުހުމަތުތައް އެ އޮތޯރިޓީން ދޮގުކުރެ އެވެ. ކޮވިޑުގެ ހާލަތުގައި، އެތަނުން އަމަލުކޮށްފައި ވާނީ މާލިއްޔަތު ގަވާއިދާ އެއްގޮތަށް ކަމަށާއި ކޮރަޕްޝަނެއް ނޯންނާނެ ކަމަށް އެތަނުން ބުނެފައިވެ އެވެ.

އޮޑިޓް ރިޕޯޓް ނެރެފައި ވަނީ އެންޑީއެމްއޭ އިން ބުނެފައިވާ ގޮތުގައި އޮޑިޓް އޮފީހުން ބަލަންވާވަރަށް ނުބަލަ އެވެ. ކޮވިޑުގެ ހާލަތު ކަމުން ބައެއް ތަކެތި ހޯދުމުގައި އަވަހަށް އެކަމެއް ހަމަޖެއްސޭނެ ގޮތްތަކެއް ބަލާފައިވާނެ ކަމަށް އެންޑީއެމްއޭ އިން ވަނީ ބުނެފަ އެވެ.