ދިވެއްސަކާ ކައިވެނިކުރާ ބިދޭސީންނަށް ދިގު މުއްދަތަކަށް ރެޒިޑެންޓް ވިސާ ލިބޭ އިސްލާހެއް

ދިވެއްސަކާ ކައިވެނިކުރާ ބިދޭސީންނަށް ދިގު މުއްދަތަކަށް، ފަސޭހަ އިން ރެޒިޑެންޓް ވިސާ ލިބޭ ގޮތަށް އިމިގްރޭޝަންގެ ގާނޫނަށް އިސްލާހު ގެންނަން ރައްޔިތުންގެ މަޖިލީހުގެ ގައުމީ ސަލާމަތާއި ޚާރިޖީ ގުޅުންތަކާ ބެހޭ ކޮމިޓީއަށް މިއަދު ހުށަހަޅައިފި އެވެ.

ދުވާފަރު ދާއިރާގެ އެމްޑީޕީގެ މެމްބަރު އިސްމާއިލް އަހުމަދު ހުށަހެޅުއްވީ އިމިގްރޭޝަން ގާނޫނުގެ ރެޒިޑެންޓް ވިސާއާ ގުޅޭ 16 ވަނަ މާއްދާއަށް އަކުރުތަކެއް އިތުރުކުރާށެވެ. ގާނޫނާ އެއްގޮތްވާ ގޮތުގެ މަތިން ދިވެއްސަކާ ކައިވެނިކޮށްގެން އުޅޭ ބިދޭސީންނާއި ސަރުކާރުގެ ކަމާބެހޭ ދާއިރާއެއްގެ ހުއްދަ ލިބިގެން އެ ދާއިރާއިން ގަބޫލުކުރާ ވިޔަފާރިއެއް ނުވަތަ މަސައްކަތެއް ކުރުމަށް ބޮޑެތި އިންވެސްޓްމަންޓްތައް ކޮށްގެން އުޅޭ މީހުންނަށް އެ މާއްދާ އިން ރެޒިޑެންޓް ވިސާ ލިބޭނެ އެވެ.

ދިވެހިންނާ ކައިވެނިކޮށްގެން އުޅޭ ބިދޭސީންނަށް މިހާރު ވެސް ވިސާ ދެމުން އަންނައިރު، ޖެހެނީ އަހަރުން އަހަރަށް އާ ކުރާށެވެ. މިއީ، އާއިލާތަކުން އުފުލަން ޖެހޭ ތަކުލީފެއް ކަމަށް ބުނެ މިކަމަށް ލުޔެއް ހޯދައިދޭން ވަރަށް ފަހުން ޖެންޑާ މިނިސްޓްރީން ވެސް ވަނީ ކޮމިޓީގައި އެދިފަ އެވެ. މެމްބަރު އިސްމާއިލް ހުށަހެޅުއްވީ ދިވެއްސަކާ ކައިވެނިކޮށްގެން އުޅޭ ބިދޭސީއަކަށް އެ މީހެއްގެ ޕާސްޕޯޓުގެ މުއްދަތަށް ރެޒިޑެންޓް ވިސާ ދޫކުރެވިދާނެ ކަމަށެވެ. އަދި ރެޒިޑެންޓް ވިސާ ލިބޭ މީހުން ދާއިމީ ގޮތުން ރާއްޖޭގައި އުޅުމުގެ ވިސާ ނުވަތަ ހުއްދަ ލިބިދެވޭނެ ހާލަތްތަކެއް ވެސް އިސްލާހުގައި ހިމަނާފައިވެ އެވެ.

އެއީ ކައިވެންޏަށް މަދު ވެގެން ހަތް އަހަރު ފުރިފައި ވުމާއި ހަތް އަހަރު ރާއްޖޭގައި ދިރިއުޅެފައިވުމާއި ހޭދަވި ކޮންމެ އަހަރެއްގައި މަދުވެގެން އަށް މަސް ދުވަހު ރާއްޖޭގައި ދިރިއުޅެފައި ވުމެވެ. އަދި ޖިނާއީ ކުށެއް ސާބިތުވެ ޝަރީއަތުން ހުކުމެއް ކޮށްފައިވާ މީހެއް ކަމުގައި ނުވުން ހިމެނެ އެވެ.

އެ އިސްލާހުގައިވާ ގޮތުން، ދާއިމީ ގޮތުން ރާއްޖޭގައި އުޅުމުގެ ހުއްދަ ލިބިފައިވާ މީހެއްގެ ކައިވެނި ރޫޅުނަސް ނުވަތަ އަނބިމީހާ/ފިރިމީހާ މަރުވިޔަސް އެ ކައިވެނިން ދަރިން ތިބުމާއި އެފަދަ ބިދޭސީއަކު ރާއްޖޭގައި ދިރިއުޅޭއިރު ދައުލަތަށް މާލީ ބުރައެއް އުފުލަން ނުޖެހޭ ނަމަ ވިސާ ދާއިމީކޮށް އޮންނާނެ އެވެ.

ރެޒިޑެންޓް ވިސާ ނުވަތަ ރާއްޖޭގައި ދާއިމީކޮށް އުޅުމުގެ ހުއްދަ ލިބޭ ކޮންމެ މީހަކު އިމިގްރޭޝަން ކޮންޓްރޯލަރު ކަނޑައަޅާ މިންވަރެއްގެ ހެލްތު އިންޝުއަރެންސެއް ނަގަންވާނެ ކަމަށް ވެސް އެ އިސްލާހުގައިވެ އެވެ.

ޖެންޑާ މިނިސްޓްރީގެ އޮފިޝަލުން ކޮމިޓީގައި ބުނެފައި ވަނީ، ދިވެއްސަކާ ކައިވެނިކޮށްގެން އުޅޭ ބިދޭސީންނަށް ދޭ ވިސާގެ މުއްދަތު ކުރު މައްސަލައިގައި ދަތިތަކަކާ ކުރިމަތިލާން ޖެހޭ ކަމަށެވެ. އެގޮތުން އެ ކައިވެނީގައި ހިމެނޭ ކުދިންގެ ހައްގުތަކާ ގުޅުން ހުރި މައްސަލަ ނުކުންނަ ކަމަށް ވެސް ބުނެފައިވެ އެވެ.

އިމިގްރޭޝަންގެ ގާނޫނަށް އިސްލާހެއް ހުށަހެޅިއިރު، ދިގު މުއްދަތަކަށް ކުއްޔަށް އުޅޭ ބިދޭސީންނަށް ރެސިޑެންސް ވިސާ ދިނުމާ ގުޅޭ ގޮތުން ހުށަހެޅި އިސްލާހުގެ ބަހުސް ހޫނުވުމުން، އެފަދަ ވިސްނުމެއް ސަރުކާރުގައި ނެތް ކަމަށް ކަމަށް އިކޮނޮމިކް މިނިސްޓަރު ފައްޔާޒް އިސްމާއިލް ވަނީ ވިދާޅުވެފަ އެވެ. ސަރުކާރުގެ ހުށަހެޅުމަކީ މިހާރު ގަވާއިދަކުން ދޫކުރާ ކޯޕަރޭޓް ރެސިޑެންސް ވިސާ ދިނުން ގާނޫނުގެ މާއްދާއެއްގެ ގޮތުގައި ހިމެނުމަށެވެ. އެއީ، ގާނޫނީ ބާރު އިތުރުކޮށް އިންވެސްޓަރުންގެ އިތުބާރާއި ޔަގީންކަން ހޯދަން ކަމަށް މިނިސްޓަރު ވިދާޅުވި އެވެ.

އެކަމަކު، ކޮމިޓީގެ ރިޕޯޓް ތަޅުމަށް ފޮނުވުމުން ރިޔާސަތުން އެދުނީ، ރާއްޖޭގައި 10 އަހަރަށް ވުރެ ދިގު މުއްދަތަށް ގެއެއް ކުއްޔަށް ހިފާ ބިދޭސީންނަށާއި ރާއްޖޭގައި 100،000ރ. އަށް ވުރެ ބޮޑު އިންވެސްޓެއް ކުރާ ބިދޭސީންނަށް ރެޒިޑެންސް ވިސާ ދޭ ގޮތަށް އިމިގްރޭޝަންގެ ގާނޫނަށް ބަދަލު ގެނައުމާ މެދު ކޮމިޓީން އަލުން ވިސްނުމަށެވެ.