ރައްޓެހިވިތާ 44 އަހަރު ފަހުން ކައިވެނިކުރި އިރު 80 އިން މަތީގައި

އަޔަލެންޑްގެ ދެ މީހަކު ލޯބީގެ ގޮތުން ގުޅިގެން އުޅޭތާ 44 އަހަރުން ފަހުން އުމުރުން 80 އަހަރުން މަތިވި ފަހުން ކައިވެނިކޮށްފި އެވެ.

މިދިޔަ ހުކުރު ދުވަހު އަޔަލެންޑްގެ ކައުންޓް އޮފަލީގައި ކައިވެނިކުރި ދެ މީހުންގެ ތެރެއިން ފިރިހެން މީހާ ޖޯން ބާމިންހަމަށް 86 އަހަރެވެ. މޭރީ ލޯންގް އަށް 83 އަހަރެވެ. އެ ދެ މީހުން ބުނީ ލޯބީގެ ގޮތުން ގުޅިގެން އުޅޭތާ އެތައް އަހަރެއް ފަހުން ކައިވެނި ކުރަން ޖެހުނަސް ހިތް އަދިވެސް ވަރަށް ޒުވާން ކަމަށާއި ދެ މީހުންގެ މެދުގައި އޮތް ލޯބި ކައިވެނީގެ ގުޅުމާ އެކު އިތުރަށް ވާނީ ވަރުގަދަ ކަމަށެވެ. ކައިވެނިކުރި އިރު، އެހެން ކައިވެންޏަކަށް ޖޯން އަށް އަންހެން ދަރިއަކު ލިބިފައިވެ އެވެ.

ޖޯން އާއި މޭރީ ކައިވެނި ނުކޮށް ލަސްކުރީ ދެ މީހުންގެ އަމިއްލަ ސަބަބުތަކާ ހެދި އެވެ. އެ ދެ މީހުން އެންމެ ފުރަތަމަ ދިމާވީ 1976 ގަ އެވެ. ލޯބީގެ ގޮތުން ގުޅިގެން އުޅޭތާ އެތައް އަހަރެއް ފަހުން ކައިވެނިކުރި ނަމަވެސް، އެ ދެ މީހުން މީގެ އަހަރުތަކެއް ކުރިން ވެސް ކައިވެނިކުރަން ޕްލޭންކުރި އެވެ. އެކަމަކު އަމިއްލަ ބައެއް ސަބަބުތަކާ ހެދި މަޑުކުރީ އެވެ.

"ދެން މިހާރު ކޮވިޑާ ހެދި އަނެއްކާ ވެސް މިކަން މާ ބޮޑަށް ދިގުލައިގެން ހިނގައިދާނެތީ ކައިވެނި އެންމެ ފަހުން ކުރީ." ޖޯން ބުންޏެވެ.

ޖޯންގެ ދަރިފުޅު ކެރޮލީން ބުނި ގޮތުގައި ޖޯން އާއި މޭރީ އަކީ އަބަދު ވެސް ވަރަށް ލޯބިން އުޅުނު ދެ މީހުންނެވެ. އަދި ކައިވެނިން އެ ގުޅުމަށް އިތުރު ބަދަހި ކަމެއް އަންނާނެ ކަމަށް ބުންޏެވެ.

މޭރީ ބުނި ގޮތުގައި އެންމެ ފުރަތަމަ ހޮޓަލަކުން ޖޯންއާ ދިމާވި އިރަކު އޭނާއަކަށް މާ ބޮޑު ޝައުގުވެރި ކަމެއް ނެތެވެ.

"އެކަމަކު ފަހުން ގުޅުން ބަދަހިވެ، އެ ގުޅުން ލޯތްބަށް ބަދަލުވީ،" އޭނާ ބުންޏެވެ.

ކެރޮލީން ބުނި ގޮތުގައި އޭނާގެ ބައްޕަ އާއި މޭރީ ކައިވެންޏަކާ ހަމަ އަށް ދާން އެހާ ގިނަ ދުވަސް ނެގި މައިގަނޑު ސަބަބަކީ އަޔަލެންޑް ވަރި މަދު ތަނަކަށްވެފައި ކައިވެނި ރޫޅިފައިވާ މީހަކާ ކައިވެނިކުރަން މޭރީގެ އާއިލާ އިން ގަބޫލު ނުވުމެވެ.

"ދޮންމަންމަގެ ބައްޕަ އަކީ އެކަހަލަ ކަންކަން ވަރަށް ބޮޑު ނަގާ މީހެއް. އެހެންވެ އަސްލު ކައިވެނި ނުކުރެވި އޮތީ." ކެރޮލީން ބުންޏެވެ. "އެކަމަކު އަހަރެން މިހާރު ވަރަށް އުފާވޭ އެ ދެ މީހުންނަށް ކައިވެނި ކުރެވުނީމަ."

އޭނާ ބުނީ މޭރީ އަކީ ބައްޕަ ދެކެ ވަރަށް ލޯބިވާ މީހެއް ކަމަށާއި އެ މީހުންގެ ގުޅުން ފާއިތުވި އަހަރުތަކުގައި ވަރަށް ގާތުން ތަޖުރިބާކުރެވިފައިވާ ކަމަށެވެ. އަދި އެންމެ އުފާވާނީ މޭރީ އަބަދު ވެސް އެދޭ ގޮތަށް އެ ދެ މީހުން މަރުވުމަށް ފަހު ކައިރިކައިރީގައި ވަޅުލެވުމުން ކަމަށް ކެރޮލީން ބުންޏެވެ.