ޝާހިދުގެ މާލީ ބަޔާން: ފަސް މިލިއަން ރުފިޔާ އާއި ޔޫކޭގައި ގެއެއް!

ރައްޔިތުންގެ މަޖިލީހުގެ ހެންވޭރު އުތުރު ދާއިރާގެ މެމްބަރު އަބްދުﷲ ޝާހިދުގެ މިލްކިއްޔާތުގައި ފަސް މިލިއަން ރުފިޔާ ހުރި ކަމާއި އިނގިރޭސިވިލާތުން ގެއެއް ބައްލަވައިގެންފައިވާ ކަން އޭނާގެ މާލީ ބަޔާނުން ހާމަވެއްޖެ އެވެ.

ރައްޔިތުންގެ މަޖިލީހަށް ހުށަހަޅުއްވައި ޓުވިޓާގައި ޝާހިދު އާއްމު ކުރެއްވި މާލީ ބަޔާނުގައިވާ ގޮތުގައި ދިވެހި ފައިސާ އާއި ޑޮލަރާ އެކު ޖުމްލަ 5.5 މިލިއަން ރުފިޔާ އޭނާގެ މިލްކިއްޔާތުގައިވެ އެވެ. އަދި އިނގިރޭސިވިލާތުގެ ޕާކު ރޯޑުން ގެއަކާއި ހ. ރަބީއީމަންޒިލް ވެސް މިލްކިއްޔާތުގައި ހިމަނުއްވާފައިވެ އެވެ.

މިހާ ގިނަ އަދަދެއްގެ ފައިސާ މިލްކިއްޔާތުގައި ހުރި ކަން އާއްމު ކުރެއްވުމަކީ، ރައްޔިތުންގެ މަޖިލިސް މެމްބަރުން ކުރައްވާ ކަމެއް ނޫނެވެ.

ޝާހިދުގެ އިތުރުން މަޖިލިސް އެހެން ބައެއް މެމްބަރުން ވެސް ގެންދަވަނީ މާލީ ބަޔާން އާއްމުކުރައްވަމުންނެވެ. މާފަންނު އުތުރު ދާއިރާގެ ޕީޕީއެމް މެމްބަރު އަބްދުﷲ ރިފާއު އޭނާގެ މާލީ ބަޔާން ކަމަށް ވިދާޅުވެ، އިސްލާމިކް ބޭންކުގައި ހުޅުވާފައިވާ އެކައުންޓެއްގެ ސްޓޭޓްމަންޓް އާއްމުކުރައްވާފައިވެ އެވެ. އޭގައިވާ ގޮތުން، މިލްކިއްޔާތުގައި އޮތީ 41 ރުފިޔާ އެވެ.

ކޮންމެ އަހަރަކު ވެސް ރައްޔިތުންގެ މަޖިލީހުގެ އަމީން އާއްމަށް މެމްބަރުން މާލީ ބަޔާން ހުށަހަޅުއްވަން ޖެހެ އެވެ. އެ ބަޔާން އާއްމުކުރާކަށް ލާޒިމެއް ނުކުރެ އެވެ.

އެކަމަކު، މެމްބަރުންނަށް ނުހައްގު މުއްސަނދިކަން ލިބޭ ކަމުގެ ތުހުމަތުތައް ކުރާތީ، އޭގެ ހަގީގަތް ރައްޔިތުންނަށް ސާފުކޮށްދޭން މެމްބަރުން މާލީ ބަޔާން އާއްމުކުރައްވަން ޖެހޭ ކަމަށް ބުނެ ޓްރާންސްޕޭރެންސީން މިދިޔަ އަހަރު ބޮޑު ކެމްޕޭނެއް ވެސް ކުރި އެވެ.