ޝަހީރާއި ޝިލްޕާގެ ވެބް ސީރީޒެއް

އިންޑިއާގެ ޓީވީ އިންޑަސްޓްރީގެ މަޝްހޫރު ތަރިންގެ ތެރޭގައި ހިމެނޭ ބަތަލާ ޝިލްޕާ ޝިންޑޭ އާއި ޝަހީރު ޝެއިހް އެކީގައި ފެންނަ ވެބް ސީރީޒެއް ގެނެސްދޭން އެކްތާ ކަޕޫރް ތައްޔާރުވެއްޖެ އެވެ.

ބިޔަ ޕްރޮޖެކްޓެއްގެ ގޮތުގައި ހަދާ މި މެގްނަމް އޯޕަސްގެ ނަމަކީ "ޕައުރަޝްޕޫރް" އެވެ. މި ޕީރިއަޑް ޑްރާމާގައި ސިޔާސީ ކަންތައްތަކާއި ދެ ޖިންސްގެ މެދުގައި އޮންނަ ބާރުވެރިކަމާއި ލޯތްބާއި ޖަޒުބާތު ގެނެސްދޭނެ އެވެ. "ޕައުރަޝްޕޫރް" އަކީ ޝިލްޕާ، 43، އާއި ޝަހީރް، 36، އެކީގައި މަސައްކަތްކުރާ ފުރަތަމަ ޕްރޮޖެކްޓެވެ. އަދި މިއީ ދެ ތަރިންގެ ވެސް ފުރަތަމަ ވެބް ސީރީޒް ވެސް މެ އެވެ.

"ޕައުރަޝްޕޫރް" ގެ ޕްރޮމޯއެއް ވެސް ވަނީ ދައްކާލައިފަ އެވެ. އަދި އެއިން ފެންނަ ގޮތުގައި މިއީ ވަރަށް ވެސް ޝައުގުވެރި އެއްޗަކަށް ވާނެ އެވެ. މި ވެބް ސީރީޒް ގެނެސްދޭނީ ބާލާޖީގެ ޑިޖިޓަލް ޕްލެޓްފޯމް އޯލްޓް ބަލާޖީންނެވެ. އެއީ މިހާރު ވެސް އެތައް ކޮންޓެންޓެއް ހުރި ތަނެކެވެ.

ޝަހީރް އެންމެ ފަހުން ފެނިފައި ވަނީ ސްޓާ ޕްލަސް އިން މިދިޔަ މަހު ނިންމައިލި ސިލްސިލާ "ޔޭ ރިޝްތޭ ހޭ ޕިޔާރު ކޭ" އިންނެވެ. ކަލާޒްގެ "ބިގް ބޮސް" ސީޒަން 11 ގައި ވާދަކޮށް، އެ ޝޯ 2017 ގައި ކާމިޔާބު ވެސް ކުރި ޝިލްޕާ އަކީ މިހާތަނަށް އެތައް ސިލްސިލާއެއް ކުޅެފައިވާ ބަތަލާއެކެވެ. އޭނާ އެންމެ ފަހުން ކުޅުނު ސިލްސިލާ އަކީ ޒީޓީވީގެ "ބާބީޖީ ގަރް ޕަރް ހޭ" އެވެ.

"ޕައުރަޝްޕޫރް" ގެ ޝޫޓިން މިހާރު ވަރަށް ބާރަށް ކުރިއަށް ދިޔަ ނަމަވެސް މިއާ ބެހޭ މާ ބޮޑު ތަފުސީލެއް އަދި ނުލިބެ އެވެ. އެކަމަކު މީގެ ކާސްޓުން ބޮލީވުޑްގެ އެކްޓަރު އައްނޫ ކަޕޫރް ވެސް ފެނިގެންދާނެ އެވެ. "ޕައުރަޕުރުޝް" ސްޓްރީމްކުރާނެ އިރަކާއި މިއީ ކިތައް އެޕިސޯޑްގެ އެއްޗެއް ކަމެއް ވެސް އަދި ނޭނގެ އެވެ.