އެޗްއާރްސީއެމުން ބަޔާން ނެރުނީ ހަގީގަތް އޮޅޭގޮތަށް: ފުލުހުން

ދޫނިދޫ ކަސްޓޯޑިއަލް ޖަލުގައި ބަންދުކޮށްފައިވާ ގައިދީން ފެންވެރުމަށާއި ބޯން ސާފު ނުލިބޭ ކަމަށާއި އެކަން ހައްލުކުރަން ފިޔަވަޅު އަޅާނެ ކަމަށް ބުނެ ހިއުމަން ރައިޓްސް ކޮމިޝަނުން ނެރުނު ބަޔާނަކީ ކަމުގެ ހަގީގަތް އޮޅޭ ގޮތަށް ނެރުނު ބަޔާނެއް ކަމަށް ފުލުހުން މިއަދު ބުނެފި އެވެ.

އެޗްއާރްސީއެމުންް އިއްޔެ ނެރުނު ބަޔާނެއްގައި ބުނީ ދޫނިދޫ ޖަލުގައި ގައިދީން ފެންވެރުމަށާއި ބޯން ބޭނުންކުރާ ފެނުގައި ކޮލިފޯމް ނަމަކަށް ކިޔާ ބެކްޓީރިއާއެއް ގިނައިން ހުރިކަން އެ ކޮމިޝަނުން ބެލި ބެލުމުން އެނގިފައިވާ ކަމަށެވެ. އެ ފެނަކީ ދުނިޔޭގެ ސިއްހަތުޖަމިއްޔާ ޑަބްލިއުއެޗްއޯ އިން ގަބޫލުކުރާ ރައްކާތެރިކަމުގެ މިންގަނޑަށް ނުފެތޭ ފެނެއް ކަމަށާއި އެ ފެން ބޭނުންކުރުމުން ހަމުގެ ބަލިތައް ޖެހުމުގެ ފުރުސަތު އޮތްކަން އެނގިފައިވާ ކަމަށް ވެސް ބުންޏެވެ.

އެ ބަޔާނަށް ރައްދު ދީ ފުލުުހުން މިއަދު ބަޔާނެއް ނެރުނެވެ. އެ ބަޔާނުގައި ބުނީ ދޫނިދޫގައި ދޫކުރާ ފެން ސާފުކުރުމަށް އެކަމަށް ބޭނުންވާ ނިޒާމުތައް ގާއިމްކުރަން މަސައްކަތްކުރަމުން އަންނަ ކަމަށެވެ.

އެޗްއާރްސީއެމުން އެންގި އެންގުމާ އެއްގޮތަށް ފެނުގެ މައްސަލަ އަށް ދާއިމީ ހައްލެއް ހޯދަން ކުރަން ޖެހޭ މަސައްކަތް ފުލުހުންގެ އިދާރާއިން ކުރަމުން އަންނަ ކަމަށް ވެސް އެބަޔާނުގައި ބުންޏެވެ. އެގޮތުން ދޫނިދޫގައި ދޫކުރާ ފެން ސާފުކުރުމަށް ޓަކައި ކްލޮރިނޭޝަން ސިސްޓަމަކާއި އަލްޓްރާވައިލެޓް ފިލްޓަރޭޝަން ސިސްޓަމެއް ގާއިމްކުރަން މަސައްކަތް ކުރަމުން އަންނަ ކަމަށް ވެސް ބަޔާނުގައި ބުންޏެވެ.

އެޗްއާރްސީއެމުން ބަޔާން ނެރުނީ ފުލުހުން ބުނިގޮތުގައި ފެން ސާފުކުރާ ނިޒާމުތައް ގަތުމަށް ހޯދަން ޖެހޭ ހުއްދަތައް ފިނޭންސް މިނިސްޓްރީން ހޯދަން މަސައްކަތްކުރަމުން ދަނިކޮށެވެ. އެކަން ލަސްވީ ބަންދު ދުވަސްތަކެއް އައުމުން ކަމަށް ވެސް ފުލުހުން ނެރުނު ބަޔާނުގައި ބުންޏެވެ.

"...މޯލްޑިވްސް ޕޮލިސް ސާވިސް އިން މިކަން ރަނގަޅުކުރަން ފިޔަވަޅު އަޅާފައި ނުވާ ކަމަށް ބަޔާންކޮށް އެޗްއާރްސީއެމްއިންް ނޫސްބަޔާނެއް ނެރެފައި ވަނީ ކަމުގެ ހަގީގަތް ރައްޔިތުންނަށް އޮޅޭ ގޮތަށް ކަމަށް މި ސާވިސް އިން ދެކެމެވެ،" ބަޔާނުގައި ބުންޏެވެ.

ދޫނިދޫގައި ތިބޭ ގައިދީން ބުއިމަށް ފުޅީގައި ބަންދުކުރި ފެން މިހާރު ވެސް ދޭކަން ފާހަގަކުރާ ކަަމަށް ވެސް ފުލުހުން ބުންޏެވެ.

ދޫނިދޫ ކަސްޓޯޑިއަލް ޖަލުގައި ބޭނުންކުރާ ފެނުގެ ނުސާފު ވާހަކަ ކުރީގެ ރައީސް އަބްދުﷲ ޔާމީނުގެ ވެރިކަމުގައި އެ ތަނުގައި ބަންދުކުރި ބައެއް ސިޔާސީ ބޭފުޅުން ވެސް އޭރު ދެއްކެވި އެވެ. އެފަދަ ޝަކުވާތައް މާފުށީ ޖަލާ ބެހޭ ގޮތުން ވެސް ބައެއް މީހުން ކުރި އެވެ. މާފުށީ ޖަލުގައި ސާފު ފެން ލިބޭނެ އިންތިޒާމް މިހާރު ވަނީ ހަމަޖައްސައިފަ އެވެ.