ފަރުކޮޅު އެއާޕޯޓު ހެދުމުގެ އެއްބަސްވުމުގެ މައްސަލަ ސުޕްރީމް ކޯޓުގައި އިސްތިއުނާފްކޮށްފި

ށ. ފަރުކޮޅުގައި އެއާޕޯޓެއް ހެދުމުގެ އެއްބަސްވުން ބާތިލްކުރި މައްސަލަ ސުޕްރީމް ކޯޓުގައި އިސްތިއުނާފް ކޮށްފި އެވެ.

ފަރުކޮޅުގައި އެއާޕޯޓެއް ހެދުމަށް އަރާމް ޓްރެވަލްސްއާ ސަރުކާރުން ޖޫން، 2013 ގައި 25 އަހަރުގެ މުއްދަތަށް އެއްބަސްވުން ހެދުމަށް ފަހު އެ މަޝްރޫއު ކުރިއަށް ގެންގޮސްފި ނަމަ ތިމާވެށްޓަށް ގެއްލުން ވެދާނެތީ ކަމަށް ބުނެ ސަރުކާރުން ވަނީ އެއްބަސްވުން ބާތިލްކޮށްފަ އެވެ. އަދި އެއާޕޯޓްގެ އެއްބަސްވުމާ އެކު ގއ. އިންނަހެރާ އާއި އެރަށާ ގުޅިފައިވާ ރަށްތަކުގައި ރިސޯޓް ހަދަން 50 އަހަރަށް އަރާމް ޓްރެވަލްސްއަށް ކުއްޔަށް ދިިނުމުގެ އެއްބަސްވުން ވެސް ސަރުކާރުން ބާތިލްކުރި އެވެ.

އެއްބަސްވުން ގާނޫނާ ޚިލާފަށް ބާތިލް ކުރުމުން ލިބުނު ގެއްލުމުގެ ބަދަލު ހޯދަން އަރާމް ޓްރެވަލްސް އިން ދައުވާ ކުރުމުން ސިވިލް ކޯޓުންނާއި ހައި ކޯޓުން ވެސް ކުރިން ނިންމާފައިވަނީ އެ ދެ އެއްބަސްވުން ބާތިލްކުރީ ރަނގަޅަށް ކަމަށެވެ.

އެ މައްސަލަ އެ ކުންފުނިިން ސުޕްރީމް ކޯޓުގައި އިސްތިއުނާފް ކުރުމުން އެ މައްސަލާގެ ޝަރީއަތް މިއަދު ވަނީ ފަށައިފަ އެވެ.

އެ މައްސަލަ ބައްލަވަނީ އުއްތަމަ ފަނޑިޔާރު އަހުމަދު މުއުތަސިމް އަދުނާނާއި ފަނޑިޔާރު ޑރ. އަޒްމިރަލްދާ ޒާހިރާއި ފަނޑިޔާރު އަލީ ރަޝީދެވެ. ރިޔާސަތު ބަލަހައްޓަވަނީ އުއްތަމަ ފަނޑިޔާރެވެ.

ފަރުކޮޅަކީ އޮކްޓޫބަރު، 2018 އިން ފެށިގެން ހިމާޔަތް ކޮށްފައިވާ ރަށެކެވެ.