ޕްރިތީ ޒިންތާ މި ވަގުތު ކުރާ ކަމަކީ ލުނބޯ އަސާރަ އެޅުން

އެމެރިކާގެ ލޮސް އެންޖެލިސްގައި ކޮވިޑް-19 ޖެހޭ މީހުން ގިނަވެ ގޭގައި ތިބެން ޖެހުމުން، މިހާރު އެތަނުގައި ދިރިއުޅޭ ބޮލީވުޑްގެ ކުރީގެ ބަތަލާ ޕްރިތީ ޒިންތާ ލުނބޯ އަސާރައެޅުމާއި ލެމަނޭޑް ތައްޔާރުކުރަމުން އަންނަ ކަމަށް ބުނެފި އެވެ.

ކާމިޔާބު އެތައް ފިލްމެއް ކުޅެފައިވާ ބަތަލާ އެމެރިކާގެ ޖީން ގުޑްއިނަފްއާ 2016 ގައި ކައިވެނިކުރި ފަހުން ދިރިއުޅެނީ އެމެރިކާގަ އެވެ. ޕްރިތީ އިންސްޓަގްރާމްގައި އާންމުކުރި ވީޑިއޯއެއްގައި، ގޭގައި ބަގީޗާ ހައްދައި ދަނޑުވެރިކަން ކުރުމަށް އަބަދުވސް ވަރަށް ލޯބިކުރާ ކަމަށް ބުނެފައިވެ އެވެ. އަދި މި އަހަރަކީ ކޮވިޑް-19 ގެ ބަލިމަޑުކަމާ އެކު ކުތިމަތިވި ލޮކްޑައުންގެ ސަބަބުން، ގަސް ހައްދަން ވަރަށް ބޮޑަށް ފުރުސަތު ލިބުނު އަހަރެއް ކަމަށް ބުންޏެވެ.

އޭނާގެ އާ ވީޑިއޯގައި ބުނީ ގަސް ހެއްދުމުން ވަރަށް ބޮޑު ހިތްހަމަޖެހުމެއް ލިބޭ ކަމަށާއި އަބަދު ވެސް ދިރިއުޅުމުގެ ސާދާ ކަންކަމަށް ވަރަށް ބޮޑަށް ޝައުގުވެރިވާ ކަމަށެވެ.

"އަހަރެން މިހާރު އަސާރަ އަޅައި ލެމަނޭޑް ވެސް އެބަ ތައްޔާރުކުރަން. ހަމަ ޔަގީން މިއީ މަންމަ ވެސް އަހަންނާ ދޭތެރޭ ވަރަށް ފަހުރުވެރި ވާނެ ކަމެއް،" ޕްރިތީ ބުންޏެވެ. "އަދި އަހަރެންގެ މި ވީޑިއޯ މަންމަ އަށް ވަރަށް ކަމުދާ އެއްޗަކަށް ވާނެ."

"ކިޔާ ކެހެނާ" އާއި "ކަލް ހޯ ނަ ހޯ" އާއި "ވީރު-ޒާރާ" އާއި "ސަލާމް ނަމަސްތޭ" ގެ އިތުރުން "ދިލް ޗާތާ ހޭ" ފަދަ ރީތި އެތައް ފިލްމެއް ކުޅުނު ޕްރިތީ، 45، އެންމެ ފަހުން ބޮޑު ސްކްރީނުން ފެނިފައި ވަނީ 2018 ގެ "ބެއްޔާޖީ ސުޕަހިޓް" އިންނެވެ.

އެމެރިކާގެ ޓީވީ ޗެނެލް އޭބީސީގެ ޑްރާމާ ސިލްސިލާ "ފްރެޝް އޮފް ދަ ބޯޓް" ގެ އެޕިސޯޑަކުން މި އަހަރު ޕްރިތީ ފެނިފައިވެ އެވެ.