"ވޮންޑަ ވުމަން" ގެ ޑައިރެކްޓަރު ޕެޓީ ޖެންކިންސް އަށް "ސްޓާ ވޯސް" ގެ ފިލްމެއް

"ވޮންޑަ ވުމަން" ގެ ޑައިރެކްޓަރު ޕޭޓީ ޖެންކިންސްއާ "ސްޓާ ވޯސް" ސީރީޒްގެ ފިލްމެއް ޑައިރެކްޓްކުރަން ހަވާލުކޮށްފި އެވެ.

ލޫކަސް ފިލްމްސް އާއި ޑިޒްނީން ގެނެސްދޭން ހަމަޖެހިފައިވާ ފިލްމުގެ ނަމަކީ "ރޯގް ސްކޮޑްރަން" އެވެ. މި ފިލްމުގެ އެންމެ ހާއްސަ ކަމަކަށް ވާނީ "ސްޓާ ވޯސް" ސީރީޒްގެ ފީޗާ ފިލްމެއް މުޅިން އަލަށް އަންހެން ޑައިރެކްޓަރަކާ އެކީގައި ގެނެސްދިނުމެވެ.

ޑެޑްލައިނުން ބުނިގޮތުގައި "ސްޓާ ވޯސް: ރޯގް ސްކޮޑްރަން" ގެ މައިގަނޑު ޕްލޮޓް އެނބުރޭނީ ސްޓާ ވޯސްގެ ފިލްމުތަކުން ފެންނަ ފައިޓް ޕައިލެޓުންގެ ވަށައިގެންނެވެ. ފިލްމު އިއުލާންކޮށް ވަނީ މީގެ ޓީޒާއެއް ވެސް ދައްކާލައިފަ އެވެ.

ޖެންކިންސްއާ އެކު "ސްޓާ ވޯސް" ގެ އާ ފިލްމެއް އިއުލާންކުރި އިރު، މި ސީރީޒްގެ އިތުރު ފިލްމެއް ޓައިކާ ވައިޓިޓީ ޑައިރެކްޓްކުރާ ގޮތަށް ވެސް އިއުލާންކޮށްފައިވެ އެވެ. އޭނާ އަކީ "ޖޯޖޯ ރެބިޓް" އާއި "ތޯ: ރެގްނަރޮކް" އަދި "ބޯއި" ފަދަ ފިލްމުތައް ގެނެސްދިން ޑައިރެކްޓަރެވެ. ޓައިކާގެ ކުރިއަށް އޮތް ފިލްމަކީ "ނެކްސްޓް ގޯލް ވިންސް" އެވެ.

ދެހާސް އަށާރައިގައި ޖެންކިންސް ގެނެސްދިން ކާމިޔާބު ފިލްމު "ވޮންޑަ ވުމަން" ގެ ދެވަނަ ބައި "ވޮންޑަ ވުމަން 1984" މި މަހުގެ 25 ގައި ރިލީޒްކުރާނެ އެވެ. މިހާރު އުމުރުން 49 އަހަރުގެ ޑައިރެކްޓަރު ގެނެސްދީފައިވާ ފިލްމުތަކުގެ ތެރޭގައި މޯންސްޓާ (2003) އާއި ވެލޯސިޓީ ރޫލްސް (2001) ހިމެނެ އެވެ.

ޖެންކިންސް ޑައިރެކްޓްކުރާ "ސްޓާ ވޯސް: ރޯގް ސްކޮޑްރަން" ސިނަމާތަކަށް ގެންނާނީ 2023 ގަ އެވެ. އެކަމަކު އަދި ފިލްމާ މާ ގިނަ ވާހަކަތަކެއް ހިއްސާއެއްނުކުރެ އެވެ.

"ސްޓާ ވޯސް" ގެ ފިލްމުތައް 1977 އިން ފެށިގެން ގެނެސްދެމުން އަންނަ އިރު، އެންމެ ފަހުން ގެނެސްދިން މި ސީރީޒްގެ ފިލްމަކީ މިދިޔަ އަހަރުގެ "ދަ ރައިޒް އޮފް ސްކައިވޯކާ" އެވެ.