އިންސާނުން ކޮޕީކުރާ ހުނަރުވެރި ރޮބަޓެއް

އެމެރިކާގެ ބޮސްޓަން ޑައިނަމިކްސް އިން އުފެއްދި "ރޮބޮޓް ކުއްތާ" ގެ ވާހަކަ މިހާރު އަލެއް ނުވާނެ އެވެ. "ސްޕޮޓް" ގެ ނަން ދީފައިވާ އެ ރޮބޮޓަކީ އިންސާނުންނަށް ނުރައްކާވާ ކަހަލަ މަސައްކަތްތަކާއި އިންސާނުންނަށް މަސައްކަތްކުރަން އުނދަގުވާ މާހައުލުތަކުގައި މަސައްކަތްކުރަން ހާއްސަ އެއްޗެކެވެ. އޭގެ ބޭނުން ވެސް މިހާރު އަންނަނީ އެކި ކަންކަމުގައި ހިފަމުންނެވެ.

މި ފަހަރު އަނެއްކާ ވެސް މިއޮތީ ހަމަ "ރޮބޮޓް ކުއްތާ" އެއްގެ ވާހަކަ އެވެ. "ޖުއައިން" ގެ ނަން ދީފައިވާ ރޮބޮޓަކީ ކުއްތާ އޮންނަ ގޮތަށް ހަތަރެސްފައި ޖަހައިގެން އޮންނަ އެއްޗެކެވެ. މީގެ މައިގަނޑު ތަފާތަކީ އިންސާނުންގެ ހަރަކާތް "ނަކަލު" ކުރުމެވެ. މިސާލަކަށް، އިންސާނަކު ވެއްޓިއްޖެ ނަމަ ތެދުވާނެ ގޮތާއި އިންސާނަކު ގަސްތުގައި ހަމަލާއެއް ދީފި ނަމަ އެކަމުން "ރެކެން" ވެސް އެނގުމެވެ.

"ޖުއައިން" އުފައްދާފައި ވަނީ ސްކޮޓްލެންޑްގެ އެޑިންބަރާ ޔުނިވަސިޓީއާ ގުޅިގެން ޗައިނާގެ ޒެޖިއަން ޔުނިވަސިޓީންނެވެ. އިންސާނުންގެ އިޝާރާތްތަކާ އެއްގޮތަށް މަސައްކަތްކުރެވޭނެ އަދި މަސައްކަތުގެ ތެރޭގައި ދިމާވާ ކަންކަމުން ދިފާއުވާނެ ގޮތްތައް ދަސްކޮށް ދީފައިވާ ގޮތަށް ރޮބޮޓެއް އުފެއްދުމުގެ ބޭނުމަކީ މުސްތަގުބަލުގައި ހަމަ އިންސާނުންގެ މަސައްކަތްތަކަށް އިިތުރު ލުއިކަން ގެނެސްދިނުމެވެ.

އާޓިފިޝިލް އިންޓަލިޖަންސް (އޭއައި) ވެސް ބޭނުންކޮށްގެން އުފައްދާފައިވާ "ޖުއައިން" އަކީ އޭގެ އަލްގޮރިދަމް އިންސާނުންގެ "ސިކުނޑި ދަސްކުރާނެ" އެއްޗެކެވެ. އޭގެ މާނަ އަކީ، ދިފާއުވާން އަމިއްލަ އަށް ރޮބޮޓަށް އެނގުމެވެ. ވައްޓާލައިފި ނަމަ ތެދުވާން އެނގޭނެ އެވެ. އެކި ސްޕީޑްތަކަށް ހިނގުމުގެ ވިސްނުން ލިބޭނެ އެވެ. ފުރޮޅެން ވެސް އެނގޭނެ އެވެ. ތަންތަނަށް އަރައި ފައިބަން އެނގޭނެ އެވެ.

އެޑިންބަރާ ޔުނިވަސިޓީގެ ރޮބޮޓާ ބެހޭ ތަޖުރިބާކާރު ޒިބިން ލީ "ސައިންސް ރޮބޮޓިކްސް" އަށް ވިދާޅުވީ "ޖުއައިން" ގައި އޭއައި ބޭނުންކޮށްފައި ވަނީ ވަރަށް ތަފާތު ގޮތަކަށް ކަމަށެވެ.

"މިއީ އެކި އެންގަލްތަކުން އެކި ގޮތްގޮތަށް ހަރަކާތްކުރަން އެނގޭ އަދި އަމިއްލަ އަށް ދިފާއުވުމުގެ ގާބިލުކަން ލިބިފައިވާ އެއްޗެއް. އެކަން ކޮށްދެނީ މީގައި އޭއައި މުޅިން ތަފާތު ގޮތަކަށް ބޭނުންކޮށްފައި ވާތީ،" އޭނާ ވިދާޅުވި އެވެ.

"ޖުއައިން" އުފެއްދި ޓީމުން ބުނެފައިވާ ގޮތުގައި މައިގަނޑު ވިސްނުމަކީ އާންމުކޮށް އުފައްދާ ރޮބޮޓްތައް އިންސާނުން ދަސްކޮށްދޭ ހާއްސަ ކޯޑްތަކާ އެއްގޮތަށް މަސައްކަތްކުރުމުގެ ބަދަލުގައި ސީދާ ރޮބޮޓްގެ އަމިއްލަ "ވިސްނުމަށް" ހަރަކާތްކުރުމެވެ. ކުރުކޮށް ބުނަންޏާ މިއީ ތުއްތު ކުއްޖަކު އަމިއްލަ އަށް ކަންކަން ދަސްކުރާ ގޮތަށް އަމިއްލަ އަށް ކަންކަން ދަސްކޮށް އެކަން ކުރެވޭނެ ރޮބޮޓެކެވެ.

"އެހެންވީމަ އަހަރެމެންގެ މި އުފެއްދުމަކީ މުސްތަގުބަލުގައި ރޮބޮޓް ބައްޓަންވެގެން އަންނާނެ ގޮތުގެ ވަރަށް ބޮޑު ތަސައްވުރެއް،" ލީ ވިދާޅުވި އެވެ. "އަހަރެމެން ދެކެން ބޭނުން ވަނީ ކުރިން ރޮބޮޓްތައް ނުކުރާ ކަހަލަ ކަންކަން ކުރާ ވަރަށް ފްލެކްސިބަލް އެއްޗަކަށް ރޮބޮޓްވެގެން ދިއުން."