ކޮންގްރެސްގެ ހަމަނުޖެހުމުގައި ޒަޚަމްވި ފުލުހަކު މަރުވެއްޖެ

ވޮޝިންޓަން (ޖެނުއަރީ 8) - ރައީސް ޑޮނަލްޑް ޓްރަމްޕުގެ ސަޕޯޓަރުން އެމެރިކާގެ ކޮންގްރެސް އިމާރާތަށް ވަދެ ހިންގި ހަމަނުޖެހުންތަކާ ކުރިމަތިލުމުގެ ތެރޭގައި ލިބުނު ޒަޚަމްތަކަށް ފަރުވާ ދެމުން ދިޔަ ކެޕިޓޮލް ފުލުސް އޮފިސަރަކު މަރުވެއްޖެ އެވެ.

އޮފިސަރު ބްރިއަން ޑީ ސިކްނިކް މަރުވީ ހަމަނުޖެހުން ހިންގި މީހުން ކޮންޓްރޯލް ކުރުމަށް އެ މީހުންނާ ކުރިމަތިލުމަށް ފަހު ޒަޚަމްވުމާ ގުޅިގެން ޑިވިޝަން އޮފީހަށް ގޮސް ހުއްޓާ އޭނާ ވެއްޓިގެން ހޮސްޕިޓަލަށް ގެންގޮސް ފަރުވާ ދެނިކޮށެވެ. ސިކްނިކް މަރުވި މައްސަލަ މެޓްރޯޕޮލިޓަން ޕޮލިސް ޑިޕާޓްމަންޓުންނާއި ކެޕިޓޮލް ޕޮލިހުން ތަހުގީގު ކުރަން ވަނީ ނިންމައިފަ އެވެ.

ކޮންގްރެސް އިމާރާތުގައި ހިންގި ހަމަނުޖެހުމުގައި މަރުވި މީހުންގެ އަދަދު މިހާރު ވަނީ ފަހަކަށް އަރައިފަ އެވެ. އޭގެ ތެރޭން 35 އަހަރުގެ އަންހެނަކު މަރުވީ ކޮންގްރެސް އިމާރާތުގެ ތެރެއަށް ވަދެ ހަމަނުޖެހުން ހިންގުމުގެ ތެރޭގައި ފުލުހުން ބަޑި ޖެހުމުގެ ސަބަބުންނެވެ.

ޓްރަމްޕުގެ ސަޕޯޓަރުން ކޮންގްރެސްގެ ޗެމްބަރަށް ވަދެގަތީ ރިޔާސީ އިންތިޚާބުގައި ޖޯ ބައިޑަން ހޯދި ކާމިޔާބީ ރަސްމީކޮށް ބަލައިގަތުމުގެ މަސައްކަތް ކުރިއަށް ދަނިކޮށެވެ. އޭގެ ކުރިން ބޭއްވި އެއްވުމެއްގައި ޓްރަމްޕް ވަނީ ސަޕޯޓަރުން ކޮންގްރެސް އިމާރާތާ ދިމާލަށް ދިއުމަށް ހިތްވަރު ދެއްވައިފަ އެވެ.

ކޮންގްރެސް އަށް ޓްރަމްޕުގެ ސަޕޯޓަރުން ވަދެގަތީ ކެޕިޓޮލް ފުލުހުންގެ ސެކިއުޓީ ދަށްވުމުން ކަމަށް ބުނެ އެތައް ބައެއްގެ ފާޑު ކިޔުން އަމާޒުވާން ފެށުމުން ކެޕިޓޮލް ފުލުހުންގެ ވެރިޔާ ސްޓީވަން ސަންޑް ވަނީ އިސްތިއުފާ ދެއްވައިފަ އެވެ.