މިއީ ޓޫރިޒަމްގެ އިންވެސްޓްމަންޓަށް ފަހި އަހަރަކަށް ހަދާނަން: މައުސޫމު

މި ހިނގާ 2021 ވަނަ އަހަރަކީ ރާއްޖޭގެ ޓޫރިޒަމް ދާއިރާ އަށް އިންވެސްޓްކުރާ ފަރާތްތަކަށް ފަހި އަހަރަކަށް ހަދައިދެއްވާނެ ކަމަށް ޓޫރިޒަމް މިނިސްޓަރު ޑރ. އަބްދުﷲ މައުސޫމު ވިދާޅުވެއްޖެ އެވެ.

ސްޕެއިންގެ މެޑްރިޑްގައި އޮތް ދުނިޔޭގެ ޓޫރިޒަމާ ގުޅޭ ޖަމިއްޔާ، ޔޫއެންޑަބްލިއުޓީއޯގެ އެގްޒެކެޓިވް ކައުންސިލްގެ ބައްދަލުވުމުގައި މައުސޫމު ވިދާޅުވީ، ޓޫރިޒަމް ދާއިރާގެ އިންވެސްޓްމަންޓުތަކަށް ފަސޭހަތައް ހޯދައިދިނުމުގެ ގޮތުން ޓޫރިޒަމް ގާނޫނަށް މި އަހަރު ބޮޑު ބަދަލުތައް ގެނެސްފައިވާ ކަމަށެވެ.

މިހެންވުމުގެ ސަބަބުން މި އަހަރު އާ އިންވެސްޓްމަންޓަށް އިތުރު ފުރުސަތުތައް ހުޅުވިފައިވާ ކަމަށް އޭނާ ވިދާޅުވި އެވެ. މިނިސްޓަރު ވަނީ ކޮވިޑްގެ ސަބަބުން ރާއްޖޭގެ ޓޫރިޒަމަށް އައި ބަދަލުތައް ހިއްސާކޮށް ރާއްޖޭގެ ޓޫރިޒަމް ކުރިއަރުވަން ކުރައްވަމުން އަންނަ މަސައްކަތްތައް މި ބައްދަލުވުމުގައި މެންބަރު ގައުމުތަކުގެ އިސްވެރިންނާއި ހިއްސާ ކުރައްވައިފަ އެވެ.

މިދިޔަ ހޯމަ އިން އަންގާރަ އަށް ކުރިއަށްދިޔަ މި ބައްދަލުވުމަކީ ޔޫއެންޑަބްލިއުޓީއޯގެ އެގްޒެކެޓިވް ކައުންސިލްގެ 113 ވަނަ ބައްދަލުވުމެވެ. މި ބައްދަލުވުމުގެ މައިގަނޑު މަގްސަދަކީ މި އަހަރު ފަހުކޮޅު މޮރޮކޯގައި ބާއްވާ އެ ޖަމިއްޔާގެ 24 ވަނަ ޖެނެރަލް އެސެމްބްލީގައި ހުށަހަޅާނެ ކަންކަން ނިންމުމެވެ.

މި ބައްދަލުވުމުގައި ވަނީ 2022 ވަނަ އަހަރުން 2025 ވަނަ އަހަރަށް އެ ޖަމިއްޔާގެ ސެކްރެޓަރީ ޖެނެރަލްގެ މަގާމަށް ވެސް ބޭފުޅަކު އައްޔަން ކުރަން އިންތިހާބެއް ބާއްވައިފަ އެވެ. މި އިންތިހާބު ކާމިޔާބު ކުރެއްވީ މިހާރު ވެސް އެ މަގާމުގައި ހުންނެވި ޒޫރަބް ޕޮލޯލިކަޝްވިލި އެވެ.