ލެފްޓިނެންޓް ކާނަލް މަގާމަށް އަންހެން އޮފިސަރުން

ސިފައިންގެ ތާރީހުގައި ފުރަތަމަ ފަހަރަށް ލެފްޓިނެންޓް ކާނަލްގެ މަގާމަށް އަންހެން އޮފިސަރުން

25 ޖެނުއަރީ 2021

ސިފައިންގެ ތާރީހުގައި ފުރަތަމަ ފަހަރަށް ލެފްޓިނެންޓް ކާނަލްގެ މަގާމަށް އަންހެން އޮފިސަރުންތަކަކަށް މިއަދު ކުރިއެރުން ދީފި އެވެ.

އާސިމާ ނިޒާރު

މަގާމުގެ ކުރިއެރުން ލިބުނީ މޭޖަ ރޭންކުގައި ތިއްބެވި ޑރ. ފާތިމަތު ތަހުސީން އާއި ޑރ. އާމިނަތު ޝުމްރާ އަދި ހައްވާ ޝިނީނެވެ. މީގެ އިތުރުން ކާނަލް ރޭންކުގައި ތިއްބެވި ސީނިއާ ހަތަރު އޮފިސަރަކަށް ބްރިގޭޑިއާ ޖެނެރަލް ރޭންކަށް ކުރިއެރުން ދީފައިވެ އެވެ.

އެއީ މުހައްމަދު ޝަރީފާއި އިސްމާއިލް ޝަރީފާއި އަބްދުﷲ ޒުހުރީ އަދި އަބްދުލް މަތީން އަހުމަދެވެ. އެ މަގާމު ހަވާލުކޮށްދެއްވީ ސިފައިންގެ އެންމެމަތީ ވެރިޔާ، ރައީސް އިބްރާހީމް މުހައްމަދު ސޯލިހެވެ.

މަގާމުގެ ކުރިއެރުން ލިބުނު ސިފައިންނަށް ލިޔުން ހަވާލުކުރަން ބޭއްވި ރަސްމިއްޔާތުގައި ރައީސް އިބްރާހިމް މުހައްމަދު ސޯލިހު ވާހަކަފުޅުދައްކަވަނީ.-- ފޮޓޯ: ރައީސް އޮފީސް

މަގާމުގެ ކުރިއެރުން ލިބުނު ސިފައިންނަށް ލިޔުން ހަވާލުކުރަން ބޭއްވި ރަސްމިއްޔާތުގައި އެ މަނިކުފާނު ވަނީ ފުރަތަމަ ފަހަރަށް އަންހެން އޮފިސަރުން ލެފްޓިނެންޓް ކާނަލްގެ ރޭންކަށް ޕްރޮމޯޝަންވި ކަން ފާހަގަކުރައްވައިފަ އެވެ. އެއި އަސްކަރިއްޔާގައި އަންހެނުންނަށް އޮތް ހަމަހަމަ ފުރުސަތުތައް ދޭހަކޮށްދޭ ކަމަށް ވިދާޅުވި އެވެ.

ރައީސް ވިދާޅުވީ ގިންތީގެ ތަފާތުކުރުމެއް ނެތި ގައުމީ ހިދުމަތުން ކުރިއަށް ދިއުމުގެ ފުރުސަތު ކޮންމެ މީހަކަށް ވެސް ފަހިކޮށްދިނުމާއި އެ ދާއިރާތައް ޒަމާނީ ފެންވަރަށް ތަރައްގީކުރަން މަސައްކަތް ކުރާ ކަމަށެވެ.

Sifainge thaareekh gai furathama faharah Lieutenant Colonel ge magaamah, 3 anhen officerakah magaamuge kurierun dhevvaifi. Miadhu magaamuge kurierun libilevvee Major rank gai thibbevi 3 anhen officerun kamugaivaa Hawwa Sheneen, Dr. Fathimath Thahuseena adhi Dr. Aminath Shumra ah. pic.twitter.com/4dterXPQs3
— Maldives National Defence Force (@MNDF_Official) January 25, 2021

ސިފައިންނަށް މަގާމުގެ ކުރިއެރުން ދިނުމުގައި ވެސް ޒަމާނީ އަސްކަރިއްޔާތަކުގައި އެ ކަން ކުރަމުން އަންނަގޮތް ބަލައި ނިޒާމު ހަރުދަނާކުރަން މަސައްކަތްކުރާ ކަމަށާއި މަގާމުގެ ކުރިއެރުން ދިނުމުގެ ނިޒާމު ހަރުދަނާވެގެން އަންނައިރު ސިފައިންގެ ތައުލީމީ ފެންވަރާއި އެ މީހެއްގެ ސިފަވަންތަ އަހުލާގާއި ނަތީޖާ ނެރެދޭ މިންވަރާއި ހުނަރުވެރިކަމަށް އިސްކަންދިނުމަކީ ވަރަށް މުހިއްމުކަމެއްކަމަށް ރައީސް ވިދާޅުވި އެވެ.

މަގާމުގެ ކުރިއެރުން ލިބުނު ސިފައިންނަށް ލިޔުން ހަވާލުކުރަން ބޭއްވި ރަސްމިއްޔާތުގައި ބައިވެރިވި ސިފައިންގެ ބައެއް އޮފިސަރުން-- ފޮޓޯ: އެމްއެންޑީއެފް

އެ މަނިކުފާނު ވިދާޅުވި ގޮތުގައި ސިފައިންނަކީ ގާބިލް އަދި ހުނަވެރިވެރި ބަޔަކަށް ހެދުމަށް ސަރުކާރުން ގިނަ މަސައްކަތްތަކެއް އަންނަނީ ކުރަމުންނެވެ. މި ގޮތުން، ސިފައިންނަށް ބޭނުންވާ އުޅަނދުފަހަރާއި އަސްކަރީ އާލާތްތައް ހޯދައި ޒަމާނީ ވަސީލަތްތައް ގާއިމްކުރަމުން އަންނަކަން ފާހަގަކުރެއްވި އެވެ.