ކޮވިޑް-19ގެ އާ ވޭރިއަންޓްތައް ރާއްޖޭގައި އުޅުން އެކަށީގެންވޭ: ޑރ. ނަޒްލާ

ކޮވިޑް-19 ގެ އާ ވޭރިއަންޓްތައް ރާއްޖޭން ފެނުން އެކަށީގެންވާ ކަމަށާއި ރާއްޖޭން ބޭރުން އަންނަ އެންމެން ކަރަންޓީންވާން ޖެހޭ ގޮތަށް އަލުން ހަމަޖެއްސި އެއް ސަބަބަކީ އެއީ ކަމަށް ހެލްތު އިމަޖަންސީ އޮޕަރޭޝަން ސެންޓަރު (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީގު މިރޭ ވިދާޅުވެއްޖެ އެވެ.

ޑރ. ނަޒްލާ ވިދާޅުވީ އާ ވޭރިއަންޓުތައް ރާއްޖެ ކައިރި ގައުމުތަކުން ފެންނަ ނަމަ އެ ވޭރިއަންޓުތައް ރާއްޖޭން ފެނުން ވެސް އެކަށީގެންވާ ކަމަށެވެ.

"ރާއްޖޭން ބޭރުން މީހުން އެބަ އާދެ. ޓޫރިސްޓުން ވެސް އެބަ އާދޭ، ދިވެހިން ވެސް އެބަ އާދޭ. ގިނަ ތަންތަނުން ތަފާތު ވޭރިއަންޓްސް ފެންނަމުން ދިއުމަކީ އަޅުގަނޑުމެން އަލުން އަނބުރާ ރާއްޖޭން ބޭރުން އަންނަ އެންމެން ކަރަންޓީންކުރަން ނިންމި އެއް ސަބަބު،" ނަޒްލާ ވިދާޅުވި އެވެ.

ކޮވިޑް ވޭރިއަންޓްތައް ރާއްޖޭގައި އުޅޭތޯ ޔަގީންކުރަން ސާމްޕަލްތައް ރާއްޖޭން ބޭރަށް ފޮނުވައިގެން ޓެސްޓުކުރާނެ ކަމަށް ކުރިން ވެސް ބުނެފައިވެ އެވެ. މިރޭ ވެސް ނަޒްލާ ވިދާޅުވީ އެ މަސައްކަތްކުރަމުން އަންނަ ކަމަށެވެ.

ނަޒްލާ ވިދާޅުވީ މި ވޭރިއަންޓްތައް ރާއްޖޭގައި އުޅޭ މިންވަރު ބަލަން ދިރާސާއެއް ކުރުމުގެ މަސައްކަތް ވެސް ކުރަމުން އަންނަ ކަމަށެވެ.

"ދަތުރުފަތުރުގެ ކަންކަން ހުންނަ ގޮތުން އާންމު ހާލަތްތަކުގައި ސާމްޕަލް ފޮނުވުމާ މިހާރު ފޮނުވުމާ ތަންކޮޅެއް ތަފާތު، ތަންކޮޅެއް ދަތި،" އާ ވޭރިއެންޓް އުޅޭތޯ ބަލަން ޓެސްޓްކުރުން ލަސްވާ ސަބަބާ ބެހޭ ގޮތުން އޭނާ ވިދާޅުވި އެވެ.

އިންޑިއާ އިން ރާއްޖެއަށް ހަދިޔާކުރި ކޮވިޝީލްޑް ވެކްސިން ރާއްޖޭގައި ބޭނުންކުރުމުގެ ހުއްދަ ދިނުމާ ގުޅިގެން، ވެކްސިންގެ ރައްކާތެރިކަމާ ބެހޭ ގޮތުން މިރޭގެ ޕްރެސްގައި ވާހަކަ ދެއްކި އެވެ.

ކޮވިޑަށް ޕޮޒިޓިވްވި މީހުންގެ އަދަދު މިއަދު ވަނީ 15،496 އަށް އަރައިފަ އެވެ. އޭގެ ތެރެއިން 106 މީހަކު ކޮވިޑަށް ޕޮޒިޓިވްވީ މިދިޔަ ދިޔަ 24 ގަޑިއިރު ތެރޭގަ އެވެ. މި ބަލި ޖެހިގެން މިހާތަނަށް 51 މީހަކު ވަނީ މަރުވެފަ އެވެ.