ޔާމީން މިނިވަންކުރަން ގޮވައިލާ ބެނާއެއް ރައީސްގެ ކުރިފުޅުމައްޗަށް

މަނީ ލޯންޑްރިންގެ ކުށް ސާބިތުވެ، ފަސް އަަހަރަށް ޖަލަށް ލާފައިވާ ކުރީގެ ރައީސް އަބްދުﷲ ޔާމީން މިނިވަންކުރަން ގޮވާލައި ޝުއޫރުތައް ލިޔެފައިވާ ބެނާއެއް، ރައީސް އިބްރާހީމް މުހައްމަދު ސޯލިހަށާއި މަޖިލީހުގެ ރައީސް މުހައްމަދު ނަޝީދަށް ފެނިވަޑައިގަންނަވާނެހެން، މަޖިލިހުގެ އެތެރޭގައި އިދިކޮޅުން މިއަދު ދަމާލައިފި އެވެ.

ރިޔާސީ ބަޔާން ނިންމާލެއްވުމަށް ފަހު، ރައީސް އިބްރާހިމް މުހައްމަދު ސޯލިހާއި މަޖިލީހުގެ ރައީސް ނަޝިދު ޗެމްބަރުން ނުކުމެވަޑައިގެންނެވިއިރު، އެ ދެ ބޭފުޅުންނަށް ފެނިވަޑައިގަންނަވާ ގޮތަށް "ރައީސް ޔާމީން މިނިވަން ކުރޭ" ޖަހާފައިވާ ބެނާ ހިއްޕަވައިގެން، ރައީސާއި މަޖިލީހުގެ ރިޔާސަތު ބަަލަހައްޓަވާ ބޭފުޅުން ތަޅުމަށް ވަދެވަޑައިގަންނަވާ ދޮރުގެ ކުރިމަތީގައި، ތިއްބެވީ މާވަށު ދާއިރާ މެމްބަރު އަދި ޕީއެންސީގެ ނައިބު ރައީސް މުހައްމަދު ސައީދާއި ފެލިދޫ ދާއިރާގެ ޕީއެންސީގެ މެމްބަރު ފަޒުލް ރަޝީދާއި ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފެވެ. މަހިބަދޫ ދާއިރާގެ މެމްބަރު މުހައްމަދު ތޯރިގު ވެސް އެ ތަނުގައި ހުންނެވި އެވެ.

ނަޝީދުގެ އަރިހުގައި ވަޑައިގެން އެ ބެނާ ކައިރި އަށް ހުއްޓިވަޑައިގެން ސައީދުއާ ރައީސް ވާހަކަފުޅު ދެއްކެވި އެވެ.

ސައީދު "މިހާރު" އަށް ވިދާޅުވީ ރައީސް ބެނާ ކައިރީގައި މަޑުކުރެއްވި ވަގުތު، އެ މަނިކުފާނަށް ގިނަ ޝަކުވާތަކެއް ހުށަހެޅުއްވި ކަމަށެވެ. ޔާމީނުގެ އާއިލާ ތަހައްމަލު ކުރައްވަމުން ގެންދަވާ އަނިޔާގެ ވާހަކަ ވިދާޅުވި ކަމަށް ވެސް އޭނާ ވިދާޅުވި އެވެ.

"އަޅުގަނޑުމެން ދެންނެވިން ރައީސް ޔާމީން ގެއަށް ބަދަލުކޮށްދެއްވާށޭ އަދި އެ މަނިކުފާނަށް އިންސާފު ލިބިދިނުމަށް ސަރުކާރުން ހުރަސް އެޅުން ހުއްޓަވައިލައްވާށޭ. އިންސާފުވެރި ޝަރީއަތެއް ލިބުމުގެ ހައްގު އެ މަނިކުފާނަށް ދެއްވާށޭ،" ޔާމީންގެ ސަރުކާރުގައި އިކޮނޮމިކް މިނިސްޓަރުކަން ކުރެއްވި ސައީދު ވިދާޅުވި އެވެ.

ސަރުކާރުން ކޯޓުތަކަށް އަތް ބާނައިގެން ޔާމީނަށް އިންސާފު ލިބިދިނުމަށް ހުރަސްއަޅާ ކަަމަށް އިދިކޮޅުން ކުރާ ތުހުމަތު ވެސް، ސައީދު ވިދާޅުވި ގޮތުގައި، ރައީސަށް ހުށަހެޅުއްވި އެވެ.

"ރައީސް ވިދާޅުވި އަޅުގަނޑު ތިކަން ބަލައިދޭނަމޭ،" ސައީދު ވިދާޅުވި އެވެ

ބެނާ ހިއްފަވއިގެން ތިއްބެވި މެމްބަރުންނާ ވާހަކަފުޅު ދެއްކެވުމަށް ފަހު ރައީސް މަޖިލީހުގެ އިދާރާ އިން ނުކުމެވަޑައިގަތީ އެހެން ދޮރަކުންނެވެ. އިދިކޮޅު މެމްބަރުން އެ ހިސާބުން ނުކުމެވަޑައިގެން މަޑުކުރެއްވީ މަޖިލީހުގެ ގޯތިތެރޭގަ އެެވެ.

ސައީދު ވިދާޅުވި ގޮތުގައި އެއީ މިއަދުގެ ޖަލްސާ އަށް ވަޑައިގެންނެވި ރާއްޖެ އާއި ރާއްޖޭން ބޭރުގެ އިއްޒަތްތެރިންނަށް އެ ބޭފުޅުންގެ ޝުއުރޫ ހިމޭންކަމާ އެކު ހިއްސާ ކުރެއްވުމަށް ކުރެއްވި ކަމެކެވެ.

އޭރު މަޖިލީހުގެ އިދާރާގެ ބޭރުގައި، ސޯސަން މަގާއި މެދު ޒިޔާރަތް މަގު ގުޅޭ ކަންމަތީގައި، އިދިކޮޅުން އަޑުއިއްވަމުން ވެސް ގެންދިޔަ އެވެ.

ރައީސް، ރިޔާސީ ބަޔާން އިއްވެވިއިރު، މަޖިލީހުގެ ތަޅުމުގައި އިދިކޮޅު މެމްބަރުން އެއްވެސް އިހުތިޖާޖެއް ކުރި ތަނެއް ނުފެނެ އެވެ. ތަޅުމުގައި އަޑުގަދަކުރައްވަމުން ގެންދެވީ ކާށިދޫ ދާއިރާގެ މެމްބަރު އަބްދުﷲ ޖާބިރެވެ. އޭނާ ދެއްކެވި ގިނަ ވާހަކަތައް ސާފެއް ނުވެ އެވެ. ނަމަވެސް އަޑުގަދަކުރައްވާ ކަން ލައިވުން ސާފުވެ އެވެ.