އަންހެނުންނަށް ބަހުގެ ހަމަލާތައް ދެއްވި ނަމަވެސް ޓްރަމްޕަށް ވޯޓު ދިން އަންހެނުން މަދެއް ނޫން

ނިއު ޔޯކް (ނޮވެމްބަރު 10) - އެމެރިކާގެ ފޯރިގަދަ ރިޔާސީ އިންތިޚާބުގެ ތެރޭގައި ޖިންސީ ގޯނާ ކުރި ކަމަށް ޓްރަމްޕާ ދެކޮޅަށް އެތައް އަންހެނުންނެއް ވާހަކަ ދެއްކި ނަމަވެސް އިންތިޚާބުގައި ޓްރަމްޕަށް ވޯޓު ދިން އަންހެނުންގެ އަދަދު މަދެއް ނޫނެވެ.

ސީއެންއެން އެގްޒިޓް ޕޯލުން ދެއްކި ގޮތުގައި ހިލަރީ ކްލިންޓަނަށް އަންހެނުންގެ ވޯޓުގެ 54 ޕަސެންޓް ލިބިވަޑައިގެންނެވި އިރު ޓްރަމްޕް ވަނީ އަންހެނުންގެ 42 ޕަސެންޓް ވޯޓު ހޯއްދަވައިފަ އެވެ. އެމެރިކާގެ ދޮން ނަސްލުގެ 53 ޕަސެންޓް އަންހެނުން ވަނީ ޓްރަމްޕަށް ވޯޓު ދީފަ އެވެ. މީގެ ތެރޭން ވެސް 62 ޕަސެންޓް މީހުންނަކީ ކޮލެޖްތަކުން ތައުލީމް ހާސިލްކޮށްފައި ނުވާ މީހުންނެވެ. އަންގާރަ ދުވަހުގެ އިންތިޚާބުގައި ވޯޓު ދިން މީހުންގެ 52 ޕަސެންޓަކީ އަންހެނުންނެވެ.

އަންހެނުންނަށް މަލާމާތް ރައްދުވާ ގޮތަށް ޓްރަމްޕް ދެއްކެވި ވާހަކަތަކުގެ އިތުރުން އެބޯޝަންއާ މެދު ޓްރަމްޕް ގެންގުޅުއްވާ ސިޔާސަތުގެ ސަބަބުން އަންހެނުންގެ ވޯޓު ލިބުން މަދުވާނެ ކަމަށް ކުރިން ބެލެވުނެވެ. ގިނަ އަންހެނުން މިހާރު ކަންބޮޑު ވަނީ ވައިޓްހައުސް އަށް ވަޑައިގަތުމަށް ފަހު އެބޯޝަންއާ ބެހޭ ގޮތުން ޓްރަމްޕް ކަންތައް ކޮށްފާނެ ގޮތަކާ މެދުގަ އެވެ.