މާދަމާއިން ފެށިގެން 20 އަހަރުން މަތީ މީހުންނަށް ވެކްސިން ޖަހަން ފަށަނީ

ކޮވިޑް-19 އިން ދިފާއުވުމަށް މާދަމާ އިން ފެށިގެން 20 އަހަރުން މަތީގެ މީހުންނަށް މާލެ ސަރަހައްދުގައި ވެކްސިން ޖަހަން ފަށަން ނިންމައިފި އެވެ.

ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ބުނީ މާލެ ސަރަހައްދުގައި މާދަމާއިން ފެށިގެން 20 އަހަރުން މަތީގެ އެންމެންނަށް ވެކްސިން ޖަހަން ފަށާނެ ކަމަށެވެ.

ރާއްޖެއިން 105،000 އަށް ވުރެ ގިނަ މީހުންނަށް ކޮވިޑް-19 ގެ ވެކްސިންގެ ފުރަތަމަ ޑޯޒް އިއްޔެއާ ހަމައަށް ވަނީ ޖަހައިފަ އެވެ. އެއީ މާލެ ސަރަހައްދުން 72،000 މީހުންނާއި އަތޮޅު ތެރެއިން 32،000 އަށް ވުރެ ގިނަ މީހުންނެވެ.

ރާއްޖޭގައި މިހާތަނަށް ޖަހަމުން ދަނީ އިންޑިއާއިން ހަދިޔާކުރި ކޮވިޝީލްޑް ވެކްސިނެވެ. އެ ގައުމުން އެ ބާވަތުގެ 200،000 ޑޯޒް ހަދިޔާ ކޮށްފައިވާއިރު، ޗައިނާއިން ވެެސް ވަނީ 100،000 ޑޯޒްގެ ސައިނޯފާމް ވެކްސިން ރާއްޖެއަށް ހަދިޔާ ކުރަން ނިންމައިފަ އެވެ. އެކަމަކު ސައިނޯފާމް ރާއްޖޭގައި ބޭނުން ކުރާކަށް އަދި ނުފަށަ އެވެ،