އިންޑިއަން އައިޑޮލް 12 ދައްކާ ގަޑި ބަދަލުވަނީ

ސޮނީ ޓީވީން ދައްކަމުން އަންނަ "އިންޑިއަން އައިޑޮލް" ގެ 12 ވަނަ ސީޒަން ދައްކާ ގަޑި އަށް މި މަހުގެ ފަހުކޮޅުން ފެށިގެން ބަދަލު ގެންނަން ނިންމައިފި އެވެ.

ކޮންމެ ހަފުތާއެއްގެ ހޮނިހިރާއި އާދީއްތަ ދުވަހުގެ ރޭ ރާއްޖޭ ގަޑިން 7:30 ގައި ގެނެސްދޭ ޝޯ މި މަހުގެ 27 އިން ފެށިގެން ދައްކާނީ ރާއްޖޭ ގަޑިން 9:00 ގަ އެވެ. މި ބަދަލު ގެންނަނީ 27 ގައި ކުޑަކުދިންގެ ޑާންސް ޝޯ "ސުޕަ ޑާންސާ ޗެޕްޓަރު 4" ގެނެސްދޭން ނިންމާފައިވާތީ އެވެ.

އެހެންވެ އެ ތާރީހުން ފެށިގެން "އިންޑިއަން އައިޑޮލް 12" ދައްކާ ގަޑީގައި އަންނާނީ ބަތަލާ ޝިލްޕާ ޝެޓީ އާއި ޑައިރެކްޓަރު އަނޫރާގް ބާސޫގެ އިތުރުން ކޮރިއޮގްރާފަރު ގީތާ ކަޕޫރް ޖަޖްކަންކުރާ "ސުޕަ ޑާންސާ 4" އެވެ.

"އިންޑިއަން އައިޑޮލް 12" ގެ ޖަޖުންގެ ތެރޭގައި ހިމެނޭ ހިމޭޝް ރޭޝަމިއާ މި ބަދަލާ ބެހޭ ގޮތުން ބުނީ ޝޯގެ ގަޑި އަށް ގެންނަ ބަދަލަކީ އެއްވެސް މައްސަލައެއް ނޫން ކަމަށެވެ.

"އަހަރެމެންގެ ޝޯގެ ކުރިން ސުޕަ ޑާންސާ ގެނެސްދިނުމަކީ އެ ޝޯ ބަލަން ބޭނުންވާ ކުޑަކުދިންނަށް އަވަހަށް ޝޯ ބަލާފައި އަވަހަށް ނިދަން ވެސް ފުރުސަތު ލިބޭނެ ކަމެއް. އެހެންވީމަ އެއީ ވަރަށް ރަނގަޅު ބަދަލެއް." އޭނާ ބުންޏެވެ.

ހިމޭޝް ބުނިގޮތުގައި "އިންޑިއަން އައިޑޮލް 12" ދައްކާ ގަޑި ކުޑަކޮށް ލަސްވިޔަސް ޝޯ އޮންނާނީ ޕްރައިމް ޓައިމްގައި ކަމަށްވާތީ ޝޯ ބަލާ އޯޑިއަންސަށް މާ ބޮޑު ވެއްޓުމެއް ނާންނާނެ އެވެ.

ކުރިން ހޮނިހިރާއި އާދީއްތަ ދުވަހުގެ ރޭ ރާއްޖޭ ގަޑިން 9:00 ގައި ސޮނީން ގެނެސްދެމުން އައީ "ދަ ކަޕިލް ޝަރުމާ ޝޯ" އެވެ. އެކަމަކު މިދިޔަ މަހުން ފެށިގެން އެ ޝޯ ވަނީ ވަގުތީ ގޮތުން މެދުކަނޑާލައިފަ އެވެ. ޝޯ އަލުން ގެނެސްދޭނެ އިރެއް ވެސް ނޭނގޭ އިރު، "ކަޕިލް ޝަރުމާ ޝޯ" ޑިޖިޓަލް ޕްލެޓްފޯމަކަށް ބަދަލުކުރަން އުޅޭ ވާހަކަ ވެސް މީޑިއާތަކުގައި އިހަކަށް ދުވަހު ފެތުރުނެވެ. އެކަމަކު އެއީ އޭގެ ތެދުދޮގެއް އަދި ސާފެއް ނުވެ އެވެ.

"އިންޑިއަން އައިޑޮލް 12" ގެ ގަޑިއަށް ބަދަލު ގެންނަ އިރު މި ސީޒަން ސޮނީން ގެނެސްދެމުން އަންނަނީ މިދިޔަ އަހަރުގެ ޑިސެމްބަރުން ފެށިގެންނެވެ. އަދިތިޔާ ނާރަޔަން ހޯސްޓްކުރާ ޝޯގައި ހިމޭޝްއާ އެކު ޖަޖުންގެ ޕެނަލްގައި ހިމެނެނީ ނޭހާ ކައްކަރާއި ވިޝާލް ދަދުލާނީ އެވެ.