ފަރުހާން އަޚްތަރުގެ "ތޫފާން" މެއި 21 ގައި އެމެޒޯން ޕްރައިމް ވީޑިއޯ އަށް

ސިނަމާތަކަށް ގެނައުމުގެ ބަދަލުގައި ޑިޖިޓަލް ޕްރިމިއާއަކަށް ދާން ނިންމާފައިވާ، ފަރުހާން އަޚްތަރުގެ އާ ފިލްމު "ތޫފާން" ގެ ރަސްމީ ޕޯސްޓަރުތައް، އެ ރިލީޒްކުރާ ތާރީހާ އެކު އިއުލާނުކޮށްފި އެވެ.

ކުރިން ވެސް މީޑިއާތަކުން ބުނެފައިވާ ގޮތަށް ފިލްމު ގެނެސްދޭނީ އެމެޒޯން ޕްރައިމް ވީޑިއޯއިންނެވެ. އެއީ މެއި މަހުގެ 21 ގަ އެވެ. "ތޫފާން" އަކީ ކުރިން މިދިޔަ އަހަރުގެ އޮކްޓޯބަރުގައި އަޅުވަން ޕްލޭންކުރި ފިލްމެކެވެ.

މި ފިލްމަކީ ފަރުހާނާ އެކު 2013 ގައި "ބާގް މިލްކާ ބާގް" ގެނެސްދިން ޑައިރެކްޓަރު އޯމް ޕްރަކާޝް މެހެރާގެ ފިލްމެކެވެ.

ފަރުހާން ބޮކްސިންތެޅުންތެރިއެއްގެ ރޯލުން ފެންނާނެ "ތޫފާން" ގެ ކާސްޓްގައި މުރްނާލް ތާކޫރާއި ޕަރޭޝް ރާވަލް ވެސް ހިމެނެ އެވެ.

"ތޫފާން" ގެ ޕޯސްޓަރު އިންސްޓަގްރާމްގައި ހިއްސާކޮށް ފަރުހާން ބުނީ ފިލްމުގެ ޓީޒާ ހޮނިހިރު ދުވަހު އާންމުންނަށް ދޫކޮށްލާނެ ކަމަށެވެ.

ގިނަ ބަޔަކު ގަބޫލުކުރާ ގޮތުގައި މި ފިލްމަކީ "ބާގް މިލްކާ ބާގް" ކަހަލަ މޮޅު އަދި ޝައުގުވެރި ފިލްމަކަށް ވާނެ އެވެ. "ތޫފާން" އަކީ މި އަހަރުގެ އެންމެ އުންމީދީ އެއް ފިލްމު ވެސް މެ އެވެ.

"ރަންގް ދެ ބަސަންތީ" އާއި "މިރުޒިޔާ" ފަދަ ފިލްމުތައް ގެނެސްދިން މެހެރާ އެންމެ ފަހުން ގެނެސްދިން ފިލްމަކީ 2019 ގެ "މޭރޭ ޕިޔާރޭ ޕްރައިމް މިނިސްޓަރު" އެވެ.