ފަރުހާން އަޚްތަރުގެ "ތޫފާން" ފަސްކޮށްފި

އެމެޒޯން ޕްރައިމް ވީޑިއޯ އިން މި މަހުގެ 21 ގައި ޕްރިމިއާކުރަން އޮތް ފަރުހާން އަޚްތަރުގެ ފިލްމު "ތޫފާން" ފަސްކޮށްފި އެވެ.

މިކަން އިއުލާންކޮށް، ފިލްމުގެ ޓީމުން ނެރުނު ބަޔާނެއްގައި ބުނީ ކޮވިޑާ ހެދި އިންޑިއާގެ ހާލަތު މި ވަގުތު އޮތީ ފިލްމު ގެނެސްދެވޭ ކަހަލަ ހާލަތެއްގައި ނޫން ކަމަށެވެ. އެހެންވެ ފިލްމު ރިލީޒްކުރުމަށް ވުރެ ބޮޑަށް އިސްކަން ދެނީ "ތޫފާން" ގެ ގެނެސްދޭ އެކްސެލް އެންޓަޓައިންމަންޓާއި ޑައިރެކްރު ރާކޭޝް އޯމްޕްރަކާޝް މެހެރާގެ ކުންފުނީގެ މުވައްޒަފުންނާއި އެ މީހުންގެ އާއިލާތަކާއި ޖުމްލަކޮށް، ހުރިހާ ރައްޔިތުންނަށް ބަލިން އަރައިގަތުމަށް އެހީވުމަށް ކަމަށް ބުންޏެވެ.

އެހެންވެ މި މަހުގެ 21 ގައި ފިލްމު ރިލީޒް ނުކުރާނެ ކަމަށާއި އާ ތާރީހެއް ފަހުން އިއުލާންކުރާނެ ކަމަށް ބުންޏެވެ.

ފަރުހާން ބޮކްސިން ތެޅުންތެރިއެއްގެ ރޯލު ކުޅެފައިވާ ސްޕޯޓްސް ޑްރާމާ "ތޫފާން" އަކީ ކުރިން މިދިޔަ އަހަރުގެ އޮކްޓޯބަރު 2 ގައި ރިލީޒްކުރަން ރޭވި ފިލްމެކެވެ. އެކަމަކު އޭރު ވެސް އެކަން ނުވީ ކޮވިޑާ ހެދި އެވެ.

މި ފިލްމުގެ ބަތަލާ އަކީ މުރުނާލް ތާކޫރެވެ. އަދި "ތޫފާން" ގެ މުހިއްމު ރޯލަކުން ޕަރޭޝް ރާވަލް ވެސް ފެނިގެން ދާނެ އެވެ.

މި ފިލްމަކީ 2013 ގެ "ބާގް މިލްކާ ބާގް" އަށް ފަހު ފަރުހާނާއި މެހެރާ އެކީގައި މަސައްކަތްކުރި ދެވަނަ ފިލްމެވެ.