އިދިކޮޅުން ރައީސަށް ފޮނުވި "ބޮޑު ސިޓީ" ހުއްޓުވައިފި

އިންޑިއާ އާއި ރާއްޖެއާ ދެމެދު ވަމުންދާ އެއްބަސްވުންތަކުގެ އަޑި ނޭނގޭތީ ކަންބޮޑުވުން ފާޅުކޮށް އިދިކޮޅު ޕީޕީއެމް/ޕީއެންސީން ރައީސް އިބްރާހީމް މުހައްމަދު ސޯލިހުގެ އަރިހަށް ގެންދަން އުޅުނު ބޮޑު ސިޓީއެއް، ފުލުހުން މިއަދު ހުއްޓުވައިފި އެވެ.

އިދިކޮޅުން ރައީސްގެ އަރިހަން ގެންދަން އުޅުނު ބޮޑު ސިޓީ އޮތީ ޕްރިންޓްކޮށް ބޮޑު ފިލައެއްގައި ތަތްކޮށްފަ އެވެ. އެ ބޯޑު ގެންދިއުން ފުލުހުން ހުއްޓުވީ ހ. ހުރަފާގައި ހުންނަ ޕީޕީއެމް/ޕީއެންސީ އޮފީހުން އެ ހިފައިގެން ނުކުމެގެން، މަޖީދިއްޔާ ސްކޫލާ ހަަމައަށް ދިޔަ ފަހުންނެވެ.

ޕީޕީއެމްގެ ތަރުޖަމާނު ހީނާ ވަލީދު "މިހާރު"އަށް ވިދާޅުވީ ބޮޑު ސިޓީ ރައީސް އޮފީހާ ހަމަައަށް ނުގެންދެވުނަސް އޭގެ ކުޑަ ކޮޕީއެއް ރައީސް އޮފީހަށް ލާފައިވާ ކަމަށެވެ. އެ ކޮޕީ ހުށަހަޅުއްވަން ރައީސް އޮފީހަށް ވަޑައިގެންނެވި އިދިކޮޅު ބޭފުޅުންނަށް ފުލުހުން ހުރަސް ނާޅާ ކަމަށް ހީނާ ވިދާޅުވި އެވެ.

ސިޓީގައި އިދިކޮޅުން ކަންބޮޑުވުން ފާޅުކޮށްފައި އޮތީ މުޅިން ވެސް، އަވަށްޓެރި އިންޑިއާއާ އެކުގައި ސަރުކާރުން ކުރަމުން އަންނަ އެކި އެކި މުއާމަލާތްތަކާ މެދުގަ އެވެ. އެއާ އެކު ބޮޑެތި ތުހުމަތުތައް ކޮށްފައިވެ އެވެ. އިންޑިއާއާ އެކުގައި ސަރުކާރުން ސޮއިކޮށްފައިވާ ބައެއް އެއްބަސްވުންތަކުގެ އަޑި ނޭނގޭ ކަމަށާއި އެ އެއްބަސްވުންތަކުގެ ސަބަބުން ރާއްޖޭގައި ބިރުވެރިކަމެއް އުފެދިފައިވާ ކަމަށް ސިޓީގައި ބުންޏެވެ.

އަޑި ނޭނގޭ އަދި ބިރުވެރިކަން އުފެދޭ އެއްބަސްވުންތައް ކަަމަށް ސިޓީގައި ތުހުމަތުކޮށްފައިވާ އެއްބަސްވުންތަކަކީ އުތުރު ތިލަފަޅުގައި ސިފައިންގެ ބަނދަރެއް ތަރައްގީކުރުމުގެ އެއްބަސްވުމާއި ރާއްޖޭގައި ރާޑަރުތައް ބެހެއްޓުމުގެ އެއްބަސްވުމާއި ހައިޑްރޯގްރަފީ ހަދަން ވެފައިވާ އެއްބަސްވުން އަދި އިންޑިއާއިން ރާއްްޖެއަށް ހަދިޔާކުރި ހެލިކޮޕްޓަރުތައް އޮޕަރޭޓްކުރުމުގެ އެއްބަސްވުމެވެ. ސިޓީގައި ރައީސް އަރިހުން އެދިފައި އޮތީ އެއީ ރަައްޔިތުންގެ ކަންބޮޑުވުންތައް ހުރި އެއްބަސްވުންތަކަށް ވާތީ އެ އެއްބަސްވުންތައް ހާމަކޮށްދެއްވުމަށެވެ.