އަލީ ވަހީދުގެ ޕާސްޕޯޓް ދޫކުރި މައްސަލަ ބަލައިގަތުމަށް ހައި ކޯޓުން ނިންމައިފި

ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް ދޫކޮށްލި މައްސަލަ ބަލައިގަތުމަށް ހައި ކޯޓުގެ ފަނޑިޔާރުންގެ މަޖިލީހުގެ ނިންމައިފި އެވެ.

ޖިންސީ ގޯނާ އާއި ރޭޕްގެ ދައުވާތަކެއް އުފުލާފައި ވަނިކޮށް އަލީ ވަހީދުގެ ޕާސްޕޯޓް ދޫކޮށްލަން މިދިޔަ މަހު ކްރިމިނަލް ކޯޓުން އެންގީ އޭނާ ބޭސްފަރުވާ އަށް ރާއްޖެއިން ބޭރަށް ވަޑައިގަތުމުގެ ހުއްދައަށް އެދިވަޑައިގަތުމުންނެވެ. ޕާސްޕޯޓް ދޫކޮށްލި ރޭ އަލީ ވަހީދު ވަނީ ފުރައިވަޑައިިގެންފަ އެވެ.

ޕާސްޕޯޓް ދޫކޮށްލަން ކުރި އަމުރު އިސްތިއުނާފް ކުރަން ދައުލަތުން ހުށަހެޅުމުން އެ މައްސަލަ ބަލައިނުގަތުމަށް އެ ކޯޓުގެ ރަޖިސްޓްރާ ކުރިން ނިންމެވި އެވެ. އެއީ އެފަދަ މައްސަލަތައް އިސްތިއުނާފް ކުރަން ޖެހޭ 48 ގަޑިއިރުގެ މުއްދަތު ފާއިތުވި ފަހުން އެ މައްސަލަ ހުށަހެޅުމުންނެވެ.

ރަޖިސްޓްރާގެ އެ ނިންމެވުން ހައި ކޯޓުގެ ފަނޑިޔާރުންގެ މަޖިލީހުގައި ދައުލަތުން އިސްތިއުނާފް ކުރުމުން އެ މައްސަލަ ބަލައިގަތުމުގެ ހުއްދަ ދިނުމަށް އެ މަޖިލީހުން ނިންމާފައިވާ ކަން ޕީޖީ އޮފީހުގެ އޮފިޝަލަކު ވިދާޅުވި އެވެ. އެހެންވެ، އެ މައްސަލަ އަލުން ހައި ކޯޓަށް ހުށަހަޅާފައިވާ ކަމަށް އޮފިޝަލް ވިދާޅުވި އެވެ.

ހައި ކޯޓުގެ ގަވާއިދު ބުނާގޮތުން މައްސަލައެއް ބަލައިނުގަތުމަށް ރަޖިިސްޓްރާ ނިންމިޔަސް، ފަނޑިޔާރުންގެ މަޖިލީހުގައި އެ ނިންމުން އިސްތިއުނާފް ކުރެވިދާނެ އެވެ.

އަލީ ވަހީދުގެ ޕާސްޕޯޓް ދޫކޮށްލަން އަމުރު ނެރުއްވި ގާޒީ ހަސަން ސައީދުގެ މައްސަލަ ޖުޑީޝަލް ސާވިސް ކޮމިޝަން (ޖޭއެސްސީ) އިން ވެސް ދަނީ ބަލަމުންނެވެ.