އަލީ ވަހީދުގެ މައްސަލާގައި އަޑުބަރޭއަށް ފިޔަވަޅު އަޅަންޖެހޭ: ހައި ކޯޓް

ކުރީގެ ޓޫރިޒަމް މިނިސްޓަރު އަލީ ވަހީދު ރާއްޖެއިން ބޭރަށް ވަޑައިގަތުމުގެ ހުއްދަ ދިނުމުގައި ޖާމިނުވި ޔޫތު މިނިސްޓްރީގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) އަށް ފިިޔަވަޅު އަޅަންޖެހޭ ކަމަށް ހައި ކޯޓުގެ ހުކުމުގައި މިއަދު ބުނެފި އެވެ.

ޖިންސީ ގޯނާ އާއި ރޭޕްގެ ދައުވާތަކެއް އުފުލާފައި ވަނިކޮށް ބޭސްފަރުވާއަށް އަލީ ވަހީދުގެ މިދިޔަ ފެބްރުއަރީ މަހު ރާއްޖެއިން ބޭރަށް ވަޑައިގަތީ އޭނާ އެނބުރި ވަޑައިގަންނަވާނެ ކަމުގެ ޔަގީން ކަމެއްގެ ގޮތުން އަޑުބަރޭ ކޯޓުގައި ޖާމިނުވުމުންނެވެ. މުއްދަތު ހަމަވިއިރު ވެސް، އަލީ ވަހީދު އެނބުރި ވަޑައިނުގަތުމުން އަޑުބަރޭއަށް ފިޔަވަޅު އަޅައިދޭން ދައުލަތުން އެދުނަސް، ކްރިމިނަލް ކޯޓުން ނިންމީ އޭނާއަށް ފިޔަވަޅު ނޭޅޭނެ ކަމަށެވެ.

އަލީ ވަހީދުގެ ޕާސްޕޯޓް ހިފެހެއްޓުމުގެ މައްސަލާގައި ހައި ކޯޓުން މިއަދު ކުރި ހުކުމުގައިވަނީ އަލީ ވަހީދު ބޭރަށް ވަޑައިގަތުމަށް ފަހު އެނބުރި ވަޑައިގަންނަވާނެކަން ކަށަވަރު ކުރުމަކީ އަޑުބަރޭގެ ޒިންމާއެއް ކަމަށާއި އެކަން ނުކޮށްފި ނަމަ އޭނާއާ މެދު ފިޔަވަޅު އެޅެން ޖެހޭނެ ކަމަށެވެ. އެކަމަކު މުއްދަތު ހަމަވިއިރު އަލީ ވަހީދު ރާއްޖެ އެނބުރި ވަޑައިނުގަތުމުން ވެސް، އަޑުބަރޭގެ ފަރާތުން ކުރި އެއްވެސް ކަމެއް ފެންނަން ނެތް ކަމަށް އެ ހުކުމުގައިވެ އެވެ.

"އަލީ ވަހީދު ރާއްޖެ ގެނައުމާ ގުޅޭގޮތުން ޖާމިނުވި އަސްހަދު އަލީގެ ފަރާތުން ކޮށްފައިވާ ކަމެއް ފެންނާކަށް ނެތެވެ. އޭގެ އިތުރުން އަސްހަދު އަލީ ވެފައިވާ އިގުރާރާ އެއްގޮތަށް އަމަލު ކުރުވުމަށްޓަކައި ދައުލަތާއި އަދި ގާނޫނު ތަންފީޒު ކުރާ އިދާރާތަކުން ވެސް އެކަށީގެންވާ މަސައްކަތެއް ކޮށްފައިވާކަން އެނގެން ނެތެވެ." އެ ހުކުމުގައިވެ އެވެ.

ފިޔަވަޅު ނޭޅުމަކީ "ބޭނުންހާ ކުޅިވަރެއް ކުޅެން ފުރުސަތު ދިނުން"

އެ ހުކުމުގައިވަނީ އަޑުބަރޭއަށް ފިޔަވަޅު އެޅެން ނެތް ކަމަށް ކްރިމިނަލް ކޯޓުން ނިންމުމުން އެ ނިންމުން ހައި ކޯޓުގައި އިސްތިއުނާފް ކުރާނެ ކަމަށް ޕްރޮސެކިއުޓާ ޖެނެރަލްގެ އޮފީހުން ކްރިމިނަލް ކޯޓަށް އެންގުމުން އެކަމާބެހޭ ލިޔުންތައް އެ ކޯޓުން ޕްރޮސެކިއުޓާ ޖެނެރަލްގެ އޮފީހަށް ފޮނުވާފައިވާ ކަމަށެވެ. އެކަމަކު، މިއަދާ ހަމައަށް ވެސް އެ މައްސަލަ ދައުލަތުން އިސްތިއުނާފް ކޮށްފައެއް ނުވާ ކަމަށް ދެ ފަނޑިޔާރުންގެ އަޣުލަބިއްޔަތުން ކުރެއްވި އެ ހުކުމުގައި ބުނެފައިވެ އެވެ.

އަޣުލަބިއްޔަތު ރައުޔަށް ތާއީދު ކުރެއްވި ފަނޑިޔާރު މުހައްމަދު ނިޔާޒް އިތުރަށް ވިދާޅުވެފައިވަނީ މީހަކު އެނބުރި އަންނާނެ ކަމަށް ބުނެ ޖާމިނުވުމަކީ ގާނޫނީ ގޮތުން ސީރިއަސް ނަތީޖާތަކެއް ނިކުންނާނެ ކަމެއް ކަމަށެވެ. އެކަމަކު ޖާމިނުވުމަކީ ސީރިއަސް ކަމެއް ނެތް ކަމެއްގެ ގޮތުގައި ދައުލަތުން އަމަލު ކުރުމަކީ "ބޭނުންހާ ކުޅިވަރެއް ކުޅެން ދެވޭ ފުރުސަތެއް" ކަމަށާއި އެހެންވެ، ޕާސްޕޯޓް ހިފެހެއްޓުމަށް ވުރެ ޖާމިނުވި މީހާއަށް ފިޔަވަޅު އެޅުން މާ މުހިންމު ކަމަށް ފަނޑިޔާރު ނިޔާޒްގެ ރައުޔުގައިވެ އެވެ.

"މިހާރު ބާތިލްކޮށްފައިވާ ޕާސްޕޯޓެއް ހިފަހައްޓަން އެދުމަށް ވުރެ ކްރިމިނަލް ކޯޓަށް އަލީ ވަހީދު ހާޒިރުވާނެ ކަމަށް ދީފައިވާ ޔަގީންކަން ތަންފީޒު ކުރުމަށް ފިޔަވަޅު އެޅުން ގާނޫނީ އަދި ބުއްދީގެ ހަމައިން ވެސް ހަމަޖެހޭ ކަމަކަށް ދެކެމެވެ." ފަނޑިޔާރު ނިޔާޒްގެ ރައުޔުގައިވެ އެވެ.

އަލީ ވަހީދުގެ ޕާސްޕޯޓް ހިފެހެއްޓުމުގެ އަމުރު ނެރެނުދޭން ހައި ކޯޓުން ނިންމީ ދައުލަތުން އެދިފައި އޮތީ މާ ކުރިން ކެންސަލް ކޮށްފައިވާ ޕާސްޕޯޓެއް ހިފެހެއްޓުމަށް ކަމަށްވާތީ ކަމަށެވެ. ދައުލަތުން އެދުނީ އަލީ ވަހީދު މިނިސްޓަރަކަށް ހުންނެވިއިރު އޭނާއަށް ދޫކޮށްފައިވާ ޑިޕްލޮމެޓިކް ޕާސްޕޯޓް ހިފެހެއްޓުމުގެ އަމުރަކަށެވެ. އެކަމަކު އެ ޕާސްޕޯޓް އޮތީ މިދިޔަ އަހަރުގެ އޮގަސްޓް މަހު ކެންސަލް ކޮށްފަ އެވެ. އެހެންވެ، އޭނާ ރާއްޖެއިން ބޭރަށް ވަޑައިގަތީ ވެސް އަމިއްލަ ޕާސްޕޯޓުގަ އެވެ. އެކަމަކު އެ ޕާސްޕޯޓް ހިފަހައްޓާކަށް އެދިފައެއް ނުވެ އެވެ.