ފެނަކައިގެ ފެން މީޓަރަށް ނަގާ 30ރ. މާފުކޮށްދީފި

ފެނަކަ ކޯޕަރޭޝަންގެ ފެން މީޓަރުން ކަސްޓަމަރުންގެ އަތުން ނަގާ 30ރ. އެ ކުންފުނިން މާފުކޮށްދީފި އެވެ.

އައްޑޫގެ އަވަށްތަކެއްގެ ނަރުދަމާ ނިޒާމު ނިންމައި އެ މަޝްރޫ ހިންގައި ބެލެހެއްޓުން ފެނަކައާ ހަވާލުކުރަން އެމްޓީސީސީން މިއަދު ހަވީރު ފޭދޫގައި ބޭއްވި ރަސްމިއްޔާތުގައި އެ ކޯޕަރޭޝަންގެ މެނެޖިން ޑިރެކްޓަރު އަހުމަދު ސައީދު ވިދާޅުވީ، ސަޕްލައި ފެން މީޓަރުން ނަގާ 30ރ. ކަސްޓަމަރުންނަށް މާފުކޮށް ދެއްވުމަކީ ރައީސް އިބްރާހީމް މުހައްމަދު ސޯލިހްގެ ނިންމެވުމަށް ކަމަށެވެ.

"ފެނުގެ ނިޒާމު ގުޅުމާއެކު، މީޓަރަށް ނަގަމުން އައި ތިރީސް ރުފިޔާ ރައީސް މިއަދު ވަނީ ފެނަކަ ހުރިހާ ކަސްޓަމަރުންގެ އަތުން ނެގުން ހުއްޓާލަން ނިންމައި އެކަން މާފުކޮށްދެއްވާފައި،" ސައީދު އިއުލާން ކުރެއްވި އެވެ.

ފެން މީޓަރުން ނަގާ 30ރ. ނުނެގުމާ ގުޅޭ ގޮތުން މަޝްވަރާތަކެއް ކުރެވެމުން އަންނަ ވާހަކަ ފެނަކަ އިން އެންމެ ފުރަތަމަ ބުނެފައި ވަނީ 2019 ގަ އެވެ. އެ ވާހަކަ އެ ކުންކުނިން ފުރަތަމަ ދެއްކީ ލޯކަލް ކައުންސިލްތަކުގެ އިންތިހާބަށް އައްޑޫގެ މެނިފެސްޓޯ އެކުލަވައިލުމަށް ޖެނުއަރީ 25، 2019 ގައި އެމްޑީޕީން ބޭއްވި މަސައްކަތު ބައްދަލުވުމުގެ ތެރޭގަ އެވެ.

އެކަމަކު، އޭގެ ފަހުން ފެށިގެން އެކަމުގެ މަޝްވަރާތަކެއް ކުރިއަށް ގެންދާތީ މިހާތަނަށް އިތުރު ވާހަކަތަކެއް ނުދެއްކެވެ އެވެ.

އައްޑޫގެ ހުރިހާ އަވަށަކަށް ސަޕްލައި ފެނުގެ ހިދުމަތް ދެމުން އަންނަ ފެނަކަ ކުންފުނީގެ އެމްޑީ ސައީދު މިއަދު ވިދާޅުވީ، އައްޑޫގެ ގުޅިފައިވާ އަވަށްތަކުގެ ފެނުގެ ނިޒާމު މި ވަގުތު އޮތީ އިތުރަށް އަޕްގްރޭޑް ކުރަން ޖެހިފައި ކަމަށެވެ. އެހެންވެ ކެޕޭސިޓީ އިތުރުކުރަން ކުރަމުން އަންނަ މަސައްކަތުގެ ތެރެއިން، އަވަށްތަކުގެ 1،280 ޓަނުގެ ކެޕޭސިޓީ 14،000 ޓަނަށް ބަދަލުކުރެވޭނެ ކަމަށް ވިދާޅުވި އެވެ.

"އެހެންވީމާ މި އަހަރުގެ ތެރޭގައި މި މަސައްކަތުގެ ދަށުނަ ހަތްހާސް ޓަނުގެ ސްޓޯރޭޖް ޓޭންކް ހެދުމުގެ މަސައްކަތް ފަށާނެ،" ސައީދު ވިދާޅުވި އެވެ.