ފުލުހުންނާއި ކައުންސިލްތައް ގުޅިގެން މަސައްކަތްކުރާނެ އޮނިގަނޑެއް ހަދަނީ

ފުލުހުންނާއި ރަށްރަށުގެ ކައުންސިލްތައް ގުޅިގެން މަސައްކަތްކުރާނެ އޮނިގަނޑެއް ތައްޔާރުކުރުމުގެ މަސައްކަތްކުރަމުން އަންނަ ކަމަށް ހޯމް މިނިސްޓަރު އިމްރާން އަބްދުﷲ ވިދާޅުވެއްޖެ އެވެ.

މިނިސްޓަރު އެކަން ހާމަކުރެއްވީ އދ. އޮމަދޫ ޕޮލިސް ޕޯސްޓް ރަސްމީކޮށް ހުޅުއްވައިދެއްވައި ދެއްކެވި ވާހަކައިގަ އެވެ.

އިމްރާން ވިދާޅުވީ ފުލުހުންނާއި ކައުންސިލްތައް ގުޅިގެން މަސައްކަތްކުރާނެ އޮނިގަނޑު ތައްޔާރުކުރުމުގެ މަސައްކަތް އޮންނަ އުސޫލުތަކާއި ގަވާއިދުތަކުގެ ދަށުން މިހާރު ކުރިއަށްދާ ކަމަށެވެ. އަދި ލަސްތަކެއް ނުވެ، އެ އޮނިގަނޑު ތައްޔާރު ކުރެވިގެންދާނެކަން ފާހަގަކުރައްވައި، އިމްރާން ވިދާޅުވީ އެ އޮނިގަނޑަކީ ރަށު ތެރޭގެ އަމާންކަން ގާއިމުކުރަން އެންމެ މުހިއްމު އެއް ކަންތައް ކަމަށެވެ.

އިމްރާން ވިދާޅުވި ގޮތުގައި އޮނިގަނޑު ތައްޔާރުކުރެވިގެންދާނީ ލޯކަލް ގަވާމަންޓް އޮތޯރިޓީ (އެލްޖީއޭ) އާއި ކައުންސިލްތަކުގެ އިތުރުން ފުލުހުން، އެކުގައި މަޝްވަރާކުރުމަށް ފަހު އެވެ.

މިފަހުން ފުލުހުންގެ އާ ގާނޫނަށް އަމަލުކުރަން ފަށާފައިވާއިރު މިނިސްޓަރު ވަނީ އެކަމަށް އަލިއަޅުއްވާލައްވާ ވެސް ވާހަކަ ދައްކަވައިފަ އެވެ. އެގޮތުން އެ ގާނޫނަށް އަމަލުކުރަން ފެށުމަކީ ފުލުހުންގެ މުއައްސަސާއަށާއި, ރައްޔިތުންނަށް ލިބިގެންދިޔަ ހިތްހަމަޖެހުމެއް ކަމަށް ވިދާޅުވި އެވެ.

އޭގެ އިތުރުން، ފުލުހުންގެ އާ ގާނޫނަކީ ފުލުހުންގެ ހިދުމަތް ފުޅާކުރުމަށްޓަކައި އެޅުނު އާ ބިންގަލެއް ކަމުން، އަތޮޅު ތެރޭގެ ހިދުމަތް ފުޅާކުރުމަށް ސަރުކާރުން ވަރަށް ބޮޑަށް އަމާޒު ހިފާފައިވާކަން ފާހަގަކުރެއްވި އެވެ.

ރަށްރަށަކީ އަމާން ރަށްތަކެއް ނަމަވެސް މަސްތުވާތަކެތީގެ ވަބާ ވަރަށް ބޮޑަށް ފެތުރި، ކުށްތައް އިތުރުވެ، އާންމުންގެ މެދުގައި ކަންބޮޑުވުމާއި ހިތްހަމަނުޖެހުން އުފެދިގެންދާ ކަމަށް ވިދާޅުވި އެވެ. އަދި އެފަދަ ކަންކަމުން މުޖުތަމައު ސަލާމަތްކުރުމުގައި އާންމުންގެ އެއްބާރުލުން ވެސް ބޭނުންްވާ ކަމަށް ވިދާޅުވި އެވެ.