ބިދޭސީންގެ މުސާރައިގެ މައްސަލަ ހައްލުކުރެވޭނީ ނުލިބިވާ ފައިސާ ލިބިގެން: އެސްޓޮނިޝް

ހެލްތު މިނިސްޓްރީގެ ގިނަ މަސައްކަތްތަކެއް ކުރުމަށް ފަހު، ފައިސާ ނުލިބި ލަސްވާތީ ކުންފުނީގެ މުވައްޒަފުންނަށް މުސާރަ ދިނުމުގައި ދަތިތަކެއް އެބަހުރި ކަމަށް އެސްޓޮނިޝް ކްލީނިން ކޮމްޕެނީން މިއަދު ބުނެފި އެވެ.

ހަތަރު މަހުގެ މުސާރަ ނުލިބޭ ކަމަށް ބުނެ ރޭ ބިދޭސީންތަކެއް ކަނީރުމަގައި އިހުތިޖާޖު ކުރި އެވެ. އެސްޓޮނިޝް ކުންފުނީގެ އެ ބިދޭސީން ބުނާ ގޮތުން ނަމަ 180 އެއްހާ މީހުންނަށް މުސާރަ ނުދޭތާ ހަތަރު މަސް ފާއިތުވެފައިވާއިރު، ގައުމަށް އެނބުރި ދާން އެދުމުން ވެސް އަންގަނީ އަމިއްލަ އަށް ދިއުމަށެވެ.

ބިދޭސީންގެ ފަރާތުން ކަންކަން ހިނގައިދިޔަ ގޮތާ ބެހޭ ގޮތުން، އެސްޓޮނިޝް ކުންފުނީގެ އިސް އޮފިޝަލަކު "މިހާރު" އަށް ވިދާޅުވީ، ބިދޭސީން ދިރިއުޅެމުން އައި ތަނުގައި އެ މީހުންގެ މެދުގައި މާރާމާރީ ހިންގައިގެެން އުޅެނިކޮ،ށް އެތަނަށް ފުލުހުން ދިޔަ ކަމަށެވެ. ވެގެން އުޅޭގޮތް ސާފުކުރުމުން، އެ މީހުން ބުނީ މުސާރަ ނުލިބޭތީ މުޒާހަރާ ކުރަނީ ކަމަށެވެ.

"މުޒާހަރާ ކުރަނީއޭ ބުނީމާ ފުލުހުން ބުނީ މުޒާހަރާ ކުރާނީ މަގުމަތީގައޭ. އެހެން ބުނީމާ އެ މީހުން މަގުމައްޗަށް ނުކުތީ،" އޭނާ ވިދާޅުވި އެވެ.

އޮފިޝަލް ވިދާޅުވިގޮތުގައި، ވިއްސަކަށް އަހަރު ވެފައިވާ އެ ކުންފުނީގެ މުވައްޒަފުންނަށް މުސާރަ ނުދޭ މައްސަލައެއް މީގެ ކުރިން ފެންމަތިވެފައި ނޯންނާނެ ކަމަށެވެ. އެކަމަކު ކޮވިޑް-19 އާ ގުޅިގެން ލޮކްޑައުންގެ ތެރޭގައި ކުންފުނީގެ މަސައްކަތްތައް ހުއްޓައިލަން ޖެހުނު ކަމަށާއި ބައެއް މުވައްޒަފުން ކަރަންޓީނަށް ވެސް ދާން ޖެހުނު ކަމަށް އޮފިޝަލް ވިދާޅުވި އެވެ.

އޭނާ ވިދާޅުވާ ގޮތުގައި މުސާރަ ނުދެވި އޮތީ އެ ތިން މަހުގެ ތެރޭގައި އެކަންޏެވެ.

"މުސާރަ ނުދެޔޭ ބުނީމާ ހީވަނީ އަޅުގަނޑުމެން މިދިޔަ މަހު ވެސް އޭގެ ކުރީ މަހު ވެސް ދެން ހުރި މަސްތަކުގައި ވެސް މުސާރަ ނުދެއޭ. އެ މަސްތަކުގެ މުސާރަ ދީފައި ވާނީ. އެކަމަކު އޭރު ލޮކްޑައުންގެ ތެރޭގައި މުސާރަ ނުދެވި ދިޔައީ،" 200 މީހުން ކުންފުނީގައި މަަސައްކަތްކުރާއިރު މުސާރަ ނުދެވި ވަނީ 80 އެއްހާ މުވައްޒަފުންނަށް ކަން ފާހަގަކުރައްވަމުން އެސްޓޮނިޝްގެ އޮފިޝަލް ވިދާޅުވި އެވެ.

އޭނާ ވިދާޅުވިގޮތުގައި، އެއީ ސަރުކާރުގެ ގިނަ އޮފީސްތަކެއްގެ ވެސް މަސައްކަތްކުރާ ބައެކެވެ. އެގޮތުން މި ދޭތެރެއިން އެންމެ ގިނައިން މަސައްކަތްކުރީ ހެލްތު މިނިސްޓްރީގައި ކަމަށާއި އެ ތަނުގެ ފަރާތުން ކުންފުންޏަށް ދައްކަން ޖެހޭ، ތިން މިލިއަނެއްހާ ރުފިޔާ ނުލިބި އެބަހުރި ކަމަށް އޭނާ ވިދާޅުވި އެވެ.

"ހެލްތު މިނިސްޓްރީގެ ވަރަށް ބޮޑު ޕެންޑިންއެއް އޮތީ. މުސާރައިގެ މައްސަލަ ހައްލުވާނެ އެ ލިބުމުން،" އޮފިޝަލް ވިދާޅުވި އެވެ.

އެސްޓޮނިޝްގެ އެ ވާހަކަތަކާ ގުޅިގެން ހެލްތު މިނިސްޓްރީގެ ބަހެއް މިހާތަނަކަށް ނުލިބެ އެވެ.

އޮފިޝަލް ވިދާޅުވީ ޗުއްޓީއަށް އެދެމުން އަންނަ ތަރުތީބުން އެ ފުރުސަތު ވެސް ބިދޭސީ މުވައްޒަފުންނަށް ދޭ ކަމަށެވެ. ބައެއް މުވައްޒަފުން، ޗުއްޓީ ބޭނުންވެގެން ބުނާ ދުވަހު އެ ފުރުސަތު ނުދެވުނަސް، މަހެއް ފަހުން ނަމަވެސް އެ އިންތިޒާމުތައް ހަމަޖައްސައިފައިވާނެ ކަމަށް އޭނާ ވިދާޅުވި އެވ.

"އެ މީހުން އެއްކޮށް އަނބުރާ ގައުމަށް ދާން ބޭނުންވަނީއެއް ނޫން. ޗުއްޓީއަކަށް ދާން ބޭނުންވަނީ. އެގޮތަށް އައިސް ބުނުމުން، ބުނަން، މަޑުކޮށްލަން. ކިހިނެއް އައިސް ހަމަ ބުނާއިރަށް ފޮނުވާނީ،" އޮފިޝަލް ވިދާޅުވި އެވެ.