ހަމަލާއާ ގުޅިގެން ޝައްކުވާ ހަތަރު މީހަކު ފާހަގަ ކުރެވިއްޖެ: ފުލުހުން

ކުރީގެ ރައީސް އަދި ރައްޔިތުން މަޖިލީހުގެ ރައީސް މުހައްމަދު ނަޝީދަށް އަމާޒުކޮށް ރޭ ދިން ހަމަލާއާ ގުޅުން އޮތް ކަމަށް ޝައްކު ކުރެވޭ ހަތަރު މީހަކު ތަހުގީގަށް ފާހަގަކުރެވިފައިވާ ކަމަށް ފުލުހުން މިއަދު ބުނެފި އެވެ.

ނަޝީދަށް ދިން ހަމަލާއާ ގުޅޭ ގޮތުން އިސްކަންދަރު ކޮށީގައި މިއަދު ބޭއްވި ނޫސްވެރިންގެ ބައްދަލުވުމުގައި ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވީ ނަޝީދަށް ހަމަލާ ދިން ސަރަހައްދުން ޝައްކު ކުރެވޭ ފަދަ އަމަލުތަކެއް ހުރި ހަތަރު މީހަކު ފާހަގަވެފައިވާ ކަމަށެވެ. އެ ފަރާތްތައް އައިޑެންޓިފައި ކުރުމާއި އަޅަން ޖެހޭ ފިޔަވަޅުތައް އެޅުމުގެ މަސައްކަތް ފަށައިގެން ކުރިޔަށް ދާ ކަމަށް ހަމީދު ވިދާޅުވި އެވެ.

ނަމަވެސް ތަހުގީގަށް ހުރަސް އެޅިދާނެތީ، އެއީ ކޮން ބައެއް ކަމެއް އަދި އެ މީހުންގެ ފަރާތުން ފެނިފައި ވަނީ ޝައްކު ކުރެވޭ ފަދަ ކޮން އަމަލުތަކެއް ކަމެއް ސީޕީ ވިދާޅެއް ނުވެ އެވެ. އަދި މި މައްސަލައާ ގުޅިގެން މިހާތަނަށް އެއްވެސް މީހަކު ހައްޔަރުކޮށްފައެއް ވެސް ނުވެ އެވެ.

ހަމީދު ވިދާޅުވި ގޮތުގައި، ނަޝީދަށް ދިން ހަމަލާ ތަހުގީގު ކުރަމުން އަންނަނީ ޓެރަރިޒަމްގެ އަމަލެއް ގޮތުގަ އެވެ. އެކަން ކުރި ގޮތާއި ބޭނުން ކޮށްފައިވާ ތަކެއްޗަށް ބަލާއިރު ޓެރަރިޒަމްގެ ގާނޫނަށް ފެތޭ ކަމަށް ސީޕީ ވިދާޅުވި އެވެ.

"އަޅުގަނޑުމެން އެންމެ ބޮޑު ޕްރައިއޯރިޓީއެއް ދީގެން މިހާރު ބަލަމުން މި އަންނަނީ ރައީސް ނަޝީދަށް ދިން ހަމަލާ،" ހަމީދު ވިދާޅުވި އެވެ.

ނަޝީދަށް ހަމަލާ ދީފައި ވަނީ އެމަނިކުފާނު ދިރިއުޅުއްވާ ގެ ކައިރީ ޕާކު ކޮށްފައި ހުރި ސައިކަލެއްގައި ގޮވާ އެއްޗެއް ހަރު ކޮށްގެނެވެ. އަދި އެމަނިކުފާނު ކާރަށް އަރުއްވަން ވަޑައިގެންނެވި ވަގުތަށް އޭތި ގޮއްވާލުމުން، ނަޝީދުގެ އިތުރުން ހަތަރު މީހަކަށް ވަނީ އަނިޔާވެފަ އެވެ.

ހަމީދު ވިދާޅުވީ އެ ސައިކަލާ ބެހޭ މައުލޫމާތު ވެސް މިހާރު ފުލުހުން ހޯދާފައިވާ ކަމަށެވެ. އަދި އެކަމާ ގުޅިގެން އިތުރަށް ބަލަން ޖެހޭ ކަންކަން ބަލަމުން އަންނަ ކަމަށް ސީޕީ ވިދާޅުވި އެވެ.