ޕްރަބާސްގެ "އާދިޕުރުޝް" ގެ ރޯލެއް ސިދާތަށް

ޕްރަބާސް އާއި ސައިފް އަލީ ޚާންގެ "އާދިޕުރުޝްގެ ރޯލަކަށް ރިއަލިޓީ "ބިގް ބޮސް 13" ކާމިޔާބުކުރި ޓީވީ އެކްޓަރު ސިދާތު ޝުކްލާ ސޮއިކޮށްފައިވާ ކަމަށް ރިޕޯޓްތައް ބުނެފި އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނި ގޮތުގައި އޯމް ރައުތު ޑައިރެކްޓްކުރާ ފިލްމުގައި އޭނާ ކުޅޭނީ މެގްނާދު ކިޔާ ކެރެކްޓާއެކެވެ. ބޮޑު ބަޖެޓަކުން ހަދާ "އާދިޕުރުޝް" އަކީ އިންޑިއާގެ ހިންދޫންގެ ތެރޭގައި ކިޔައި އުޅޭ ހުރާފީ ވާހަކަ ރާމަޔާންގެ ކެރެކްޓާތަކަށް ބިނާކޮށް ހަދާ ފިލްމެކެވެ.

އެގޮތުން "ބާހްބަލީ" ކުޅުނު ޕްރަބާސް ޓައިޓްލް ރޯލު ކުޅޭ އިރު އެ ކެރެކްޓާ އަކީ ރާމް އެވެ. ފިލްމުގެ ވިލަންގެ ރޯލު ކުޅޭ ސައިފްގެ ކެރެކްޓާ އަކީ ރާވަން އެވެ. އަދި ބަތަލާ ކްރިތީ ސެނަން އަކީ ސީތާ އެވެ. މީގެ އިތުރުން ޒުވާން އެކްޓަރު ސަނީ ސިންގް އަކީ ލަކްޝްމަން އެވެ.

ފިލްމީ ޚަބަރުތައް ގެނެސްދޭ ނޫސްތަކުން ބުނީ "އާދިޕުރުޝް" އަށް ސިދާތު ސޮއިކޮށްފައިވާތީ އޭގެ ޝޫޓިންތަކުގައި އޭނާ ވަރަށް އަވަހަށް ބައިވެރިވާން ފަށާނެ ކަމަށެވެ. މީގެ ކުރިން ވެސް ސިދާތު، 40، ބޮލީވުޑް ފިލްމެއްގައި މަސައްކަތްކުރި އެވެ. އެއީ ވަރުން ދަވަނާއި އާލިއާ ބަޓްގެ 2014 ގެ ފިލްމު "ހަމްޓީ ޝަރުމާ ކީ ދުލްހަނިޔާ" އެވެ.

ސިދާތަށް "އާދިޕުރުޝް" އިން ފުރުސަތު ލިބުނު ވާހަކަ ފިލްމުގެ ޓީމުން އަދި ކަށަވަރުކޮށެއް ނުދެ އެވެ. އޭނާ މި ވަގުތު އަންނަނީ އަލަތު ވެބް ސީރީޒް، ޕްރޮޑިއުސަރު އެކްތާ ކަޕޫރްގެ އޯލްޓް ބަލާޖީގެ "ބްރޯކެން ބަޓް ބިއުޓިފުލް 3" ބެލުންތެރިންނަށް ދޫކޮށްލަން ތައްޔާރުވަމުންނެވެ. އެއީ މި މަހުގެ 29 ގަ އެވެ.

"ބިގް ބޮސް 13" ގެ ފަހުން ސިދާތުގެ މަޝްހޫރުކަން ބޮޑުވެ، އެ ޝޯގެ ފަހުން މިހާތަނަށް އޭނާ ވަރަށް ގިނަ ވީޑިއޯ ލަވަތައް ވެސް ކުޅެފައިވެ އެވެ.

އަންނަ އަހަރުގެ އޮގަސްޓް މަހުގެ 11 ގައި ސިނަމާތަކަށް ގެންނަން ތާވަލުކޮށްފައިވާ "އާދިޕުރުޝް" ގެ ޝޫޓިން ފެށީ މިދިޔަ ފެބްރުއަރީ މަހުގެ ތެރޭގަ އެވެ. ރިޕޯޓްތައް ބުނާ ގޮތުން މުމްބާއީ ހިމެނޭ މަހާރަޝްތުރާ ސްޓޭޓްގައި ކޮވިޑް-19 އާ ގުޅިގެން އަޅާފައިވާ ފިޔަވަޅުތަކާ ހެދި ފިލްމުގެ ޝޫޓިން މިހާރު ވަނީ ހައިދަރުއާބާދަށް ބަދަލުކޮށްފަ އެވެ.

"އާދިޕުރުޝް" ގެ ޑައިރެކްޓަރު އޯމް އެންމެ ފަހުން ގެނެސްދިނީ މިދިޔަ އަހަރު އަޖޭ ދޭވްގަންއާ އެކު "ތާނާޖީ: ދި އަންސަންގް ވޮރިއާ" އެވެ.