ހަރުކަށި ފިކުރުގެ ތަހުގީގުތައް އަވަސްކުރަން ފާސްކޮށްފި

ހަރުކަށި ފިކުރާ ގުޅޭ ހުރިހާ މައްސަލަތަކެެއްގެ ތަހުގީގު އަވަސްކުރަން ފުލުހުންނަށް އަންގަން ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އިން ފާސްކޮށްފި އެވެ.

ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާއާ ގުޅޭ ހާއްސަ މައްސަލަ ބެލުމަށް ފަހު 241 ކޮމިޓީން އެކުލަވައިލި ރިޕޯޓްގައި ކޮމިޓީން ކުރާނެ މައިގަނޑު ހަތަރު ކަމެއް ކަނޑައަޅާފައި ވެ އެވެ. އޭގެ އެއް ކަމަކީ ހަރުކަށި ފިކުރާ ގުޅޭ އެންމެހާ ތަހުގީގެއް، އަވަސް ނަތީޖާ ނެރެވޭނެ ގޮތަކަށް ކުރިއަށް ގެންދަން ފުލުހުންނަށް ލަފާ ދިނުމެވެ.

ނަޝީދަށް ދިން ހަމަލާގެ ތަހުގީގުގެ ހުރިހާ ކަމެއް ކޮމިޓީއާ ހިއްސާކުރަން ފުލުހުންނަށް އެންގުން ވެސް ކޮމިޓީގެ ނިންމުމުގައި ހިމެނެ އެވެ. ފުލުހުން އެކަމުގައި ކުރަމުންދާ ތަހުގީގު ކޮމިޓީން ގާތުން ބަލަން ވެސް އެ ނިންމުމުގައި ވެ އެވެ. ސަލާމަތީ ބާރުތަކުން އެމަނިކުފާނަށް ރައްކާތެރިކަން ދެމުން ދަނިކޮށް، ސެކިއުރިޓީ ބްރީޗްވި ގޮތުގެ އިންކުއަރީ އެއް ހެދުމަށާއި އެ އިންކުއަރީގައި ބައިނަލްއަގުވާމީ މާހިރުން ބައިވެރިކުރަން ވެސް ކޮމިޓީން ނިންމި އެވެ.

ނަޝީދަށް ދިން ހަމަލާ އަކީ ކޮން ވިސްނުމެއްގެ ބަޔަކު ރޭވި ކަމެއް ކަން ފުލުހުން އަދި ނުބުނެ އެވެ. އެކަމަކު އެކަމުގައި ބައިވެރިވި ކަމުގެ ތުހުމަތަށް މިހައިތަނަށް ހައްޔަރުކުރި ތިން މީހުންނަކީ ވެސް ހަރުކަށިފިކުރުގެ މީހުން ކަމަށް ފުލުހުން ބުންޏެވެ.

ނަޝީދަށް ދިން ހަމަލާއާ ގުޅޭ ގޮތުން 241 ކޮމިޓީން އެކުލަވައިލި ރިޕޯޓް މަޖިލީހުގެ މިއަދުގެ ޖަލްސާ އަށްް ވަނީ އެޖެންޑާކޮށްފަ އެވެ. އެކަމަކު މަޖިލީހުގައި އަދި ކުރިއަށް ދަނީ އިޒްރޭލުން ފަލަސްތީނުމީހުންނާ ދެކޮޅަށް ހިންގާ ޖަރީމާތައް ކުށްވެރިކޮށް، ނައިފަރު ދާއިރާގެ މެމްބަރު އަހުމަދު ޝިިޔާމް ހުށަހެޅުއްވި ކުއްލި މައްސަލައިގެ ބަހުސެވެ.

ނަޝީދު ދިރިއުޅުއްވާ ކެނެރީގޭގެ ކައިރީގައި އެމަނިކުފާނަށް ދިން ބޮމުގެ ހަމަލާގައި ފުރާނައަށް ނުރައްކާވާ ފަދަ ބޮޑެތި ގެއްލުންތަކެއް ލިބިވަޑައިގަތެވެ. އެ ޒަހަމްތަކަށް ފަރުވާ ކުރުމަށް އޭޑީކޭގައި ގިނަ ސާޖަރީތަކެއް ހެދި އެވެ. އޭޑީކޭ އިން ފަރުވާ ހޯއްދެވުމަށް ފަހު އިތުރު ފަރުވާ ހޯއްދެވުމަށް އެމަނިކުފާނު ވަޑައިގެން މިހާރު ހުންނެވީ ޖަރުމަނުވިލާތުގަ އެވެ.