Roadha Mihaaru
ވެކްސިންގެ ދެ ޑޯޒުން، އިންޑިއާ ވޭރިއަންޓް ކޮންޓްރޯލްވޭ

ވެކްސިންގެ ދެ ޑޯޒުން، ކޮވިޑްގެ އިންޑިއާ ވޭރިއަންޓް ކޮންޓްރޯލް ކުރެވޭ

23 މެއި 2021

އިންޑިޔާ އާއި ޔޫރަޕްގައި މިހާރު ހަލުވިކަމާއެކު ފެތުރެމުންދާ، ކޮވިޑް-19ގެ އިންޑިއާ ވޭރިއަންޓް ކޮންޓްރޯލް ކުރުމުގައި، ކޮވިޑް ވެކްސިންގެ ދެ ޑޯޒް ފުރިހަމަ ކުރުމުން، ވަރަށް ރަނގަޅު ނަތީޖާއެއް ހާސިލުވާ ކަމަށް، އިނގިރޭސިވިލާތުގެ ހެލްތު މިނިސްޓްރީން ބުނެފި އެވެ.

އިންޑިޔާ އާއި ޔޫރަޕްގައި މިހާރު ހަލުވިކަމާއެކު ފެތުރެމުންދާ، ކޮވިޑް-19ގެ އިންޑިއާ ވޭރިއަންޓް ކޮންޓްރޯލް ކުރުމުގައި، ކޮވިޑް ވެކްސިންގެ ދެ ޑޯޒް ފުރިހަމަ ކުރުމުން، ވަރަށް ރަނގަޅު ނަތީޖާއެއް ހާސިލުވާ ކަމަށް، އިނގިރޭސިވިލާތުގެ ހެލްތު މިނިސްޓްރީން ބުނެފި އެވެ.

އެ ގައުމުގެ ހެލްތު މިނިސްޓަރު ވިދާޅުވިގޮތުގައި އިނގިރޭސި ވިލާތުގެ ޕަބްލިކް ހެލްތުން ކުރި ދިރާސާގެ ނަތީޖާތައް ދައްކާ ގޮތުން، ފައިޒާ-ބަޔޯއެންޓެކްގެ ވެކްސިންގެ ދެވަން ޑޯޒް ޖަހާތާ ދެ ހަފުތާ ފަހުން، ކޮވިޑް-19ގެ އިންޑިއާ ވޭރިއަންޓް (B.1.617.2)އާ ދެކޮޅަށް މަސައްކަތްކުރާ ނިސްބަތަކީ 88 ޕަސެންޓެވެ.

ނަމަވެސް އިންޑިއާ ވޭރިއަންޓް އުފެދުމުގެ ކުރިން، އިނގިރޭސި ވިލާތުން ފެނުނު ވޭރިއަންޓް (B.1.1.7)އާ ދެކޮޅަށް، ފައިޒާ-ބަޔޯއެންޓެކްގެ ވެކްސިންގެ ދެ ޑޯޒް މަސައްކަތްކުރާ ނިސްބަތަކީ 93 ޕަސެންޓެވެ.

އެސްޓްރާޒެނެކާގެ ދެ ޑޯޒް، އިންޑިއާ ވޭރިއަންޓާ ދެކޮޅަށް މަސައްކަތްކުރާ ނިސްބަތަކީ 60 ޕަސެންޓެވެ.

އިނގިރޭސި ވޭރިއަންޓާ ދެކޮޅަށް މަސައްކަތްކުރާ ނިސްބަތަކީ 66 ޕަސެންޓު ކަމަށް އިނގިރޭސި ވިލާތުގެ ޕަބްލިކް ހެލްތުން ބުންޏެވެ.

އިނގިރޭސި ހެލްތު މިނިސްޓަރު މެޓް ހެންކޮކް ވިދާޅުވީ، ކޮވިޑް-19އާ ދެކޮޅަށް މިހާތަނަށް އުފެއްދުނު ވެކްސިންތައް، ހަލުވިކަމާއެކު ފެތުރެމުންދާ އިންޑިއާ ވޭރިއަންޓާ ދެކޮޅަށް މަސައްކަތްކުރާ ކަން ކަށަވަރުވުމަކީ، ކޮވިޑް ކޮންޓްރޯލް ކުރުމުގެ ކަންކަމަށް ލިބުނު ވަރަށް ބޮޑު އިތުބާރާއި ޔަގީން ކަމެއް ކަމަށެވެ.

ޔޫރަޕްގައި އެންމެ ހަލުވިކޮށް އާންމު ރައްޔިތުންނަށް ވެކްސިން ޖަހަމުންދާ ގައުމަކީ އިނގިރޭސި ވިލާތެވެ.

ނަމަވެސް، އިންޑިއާ ވޭރިއަންޓް އެ ގައުމުން ފެނުމާ ގުޅިގެން، ކޮވިޑާ ދެކޮޅަށް އެންމެ ކުރީ ސަފުގައި މަސައްކަތްކުރާ މީހުންގެ ހިތްތަކުގައި މާޔޫސްކަން އުފެދުނެވެ.

ޑިސެމްބަރު 2019 ގައި ޗައިނާގެ ވޫހާން ސިޓީން އަލަށް ފެނުނު ކޮވިޑް-19 ވަބާ، މިހާރު ވަނީ މުޅި ދުނިޔެ އަށް ފެތުރިފަ އެވެ. މިބަލި މިހާތަނަށް 168 މިލިއަން މީހުންނަށް ޖެހިފައިވާ އިރު، 3.4 މިލިއަން މީހުން މި ބަލީގައި މިހާތަނަށް މަރުވެއްޖެ އެވެ. މިހާތަނަށް އެންމެ ގިނަ ބަޔަކަށް މިބަލި ޖެހިފައިވަނީ އެމެރިކާއިންނެވެ.

އެމެރިކާގެ 33 މިލިއަނަށް ވުރެ ގިނަ މީހުންނަށް ކޮވިޑް ޖެހިފައިވާ އިރު، ދެ ވަނައަށް އެންމެ ގިނަ އަދަދެއްގެ ބަޔަކަށް މިބަލި ޖެހިފައިވަނީ އިންޑިއާއިންނެވެ. އެ ގައުމުން 26 މިލިނަށް ވުރެ ގިނަ މީހުންނަށް މި ބަލި ޖެހިފައިވެ އެވެ. އިންޑިއާ އިން ކޮވިޑް ބަލީގައި މަރުވި މީހުންގެ އަދަދު މިހާރު ވަނީ 299 ހާހަށް އަރައިފަ އެވެ.