ނަޝީދާއި އީވާގެ ކޮޓަރިކޮޅު ބަގްކުރި ކަމަށް ބުނާ މައްސަަލައިގެ ތަހުގީގު ކުރިއަކަށް ނުދިޔަ

ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި ނައިބު ރައީސް އީވާ އަބްދުﷲގެ ކޮޓަރިކޮޅު ހިމެނޭ ގޮތުން މަޖިލީހުގެ އިދާރާގެ ބައެއް ތަންތަން ބަގްކުރަން ފުލުހުންގެ ބަޔަކު މަސައްކަތްކުރި ކަމަށް ތުހުމަތުކުރެވޭ މައްސަލައިގެ ތަހުގީގު ކުރިއަށް ނުގޮސް ހުއްޓިފައިވާ ކަމަށް ހޯމް މިނިސްޓަރު އިމްްރާން އަބްދުﷲ މިއަދު ވިދާޅުވެއްޖެ އެވެ.

ރައްޔިތުންގެ މަޖިލީހުގައި ވަޒީރުންނާ ސުވާލުކުރުމުގެ ވަގުތުގައި މާފަންނު އުތުރު ދާއިރާގެ އެމްޑީޕީގެ މެމްބަރު އިމްތިޔާޒް ފަހުމީ ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ މަޖިލިހުގެ އިދާރާ ބަގްކުރަން އުޅުނު ކަަމަށް ބުނާ މައްސަލަ ތަހުގީގުކުރަން ފުލުހުން މަސައްކަތްތަކެއް ކުރި ކަަމަށެވެ. ނަމަވެސް އިތުރަށް ކުރިއަށް ދާނެ މާބޮޑު މަގުތަކެއް ނުފެނުނު ކަމަށް އޭނާ ވިދާޅުވި އެވެ.

"އެއާ ގުޅިގެން ފުލުހުންގެ ތަހުގީގީ ބައިން މަސައްކަތްތަކެއް ކުރި. އެހެން ނަމަވެސް އޭގެ އިތުރަށް ކުރިއަށް ދިއުމަށް މާބޮޑު މަގުތަކެއް ނުލިބުމުން ދެން ސީދާ މަޑުޖެހިފައި އޮތް ހިސާބެއް އަޅުގަނޑު އިތުރަށް ބަލައިލަން ޖެހޭނީ،" އިމްރާން ވިދާޅުވި އެވެ.

މަޖިލީހުގެ އިދާރާގެ ކޮޓަރިތަކެއް ބަގްކުރަން ފުލުހުންގެ ބަޔަކު އުޅުނު ކަމަށް ނަޝީދު ތުހުމަތު ކުރެއްވީ މިދިޔަ އަހަރުގެ ނޮވެމްބަރު މަހު އެވެ. ނޮވެމްބަރު 23 ވަނަ ދުވަހު މަޖިލީހުގެ ޖަލްސާ ފައްޓަވައި ރިޔާސަތުން އަންގާ އެންގެވުމެއްގެ ގޮތުގައި ނަޝީދު ވިދާޅުވީ، ކޮޓަރިތައް ބަގްކުރަން ނުވަތަ އެ ތަންތަނުގައި ދައްކާ ވާހަކަތައް ޖާސޫސީ އާލާތްތައް ބޭނުންކޮށްގެން އަޑުއަހަން ފުލުހަކު ގުޅީ މަޖިލީހުގެ އިދާރާގެ އަންހެން މުވައްޒަފަކަށް ކަމަށާއި އެ އިދާރާގެ ސެކިއުރިޓީންނަށް އެ މައުލޫމާތު ދިނީ އެ އަންހެން މުވައްޒަފު ކަމަށެވެ.

"...އަޅުގަނޑަކަށް ނޭނގޭ އެއީ ކޮން ބޭނުމެއްގައި ކަމެއް. އަޅުގަނޑުގެ ކޮޓަރީގައި ވެސް މި ބާވަތުގެ އާލާތް ހަރުކުރުމަށް މަޖިލީހުގެ ސެކިއުރިޓީ ސްޓާފުންނާއި ފުލުސް އޮފީހުގައި މަސައްކަތްކުރާ މީހަކާ ވާހަކަ ދެއްކެވި، އެ ސެކިއުރިޓީ ސްޓާފު ވަނީ މަޖިލީހުގެ ސާޖަންޓް އެޓް އާމްސް އާއި ސެކްރެޓަރީ ޖެނެރަލް އަށް އެ މައުލޫމާތު ދީފައި،" ނަޝީދު ވިދާޅުވި އެވެ.

އެ މަނިކުފާނު އޭރު ވިދާޅުވެފައި ވަނީ، އެ މައްސަލަ ބެއްލެވުމަށް ސާޖަންޓް އެޓްއާމްސް އިތުރު މަސައްކަތެއް ކުރައްވާނެ ކަމަށް އުއްމީދު ކުރައްވާ ކަމަށެވެ. އެ މައްސަލަ ފުލުސް އޮފީހަށް ހުށަހެޅުއްވުމަކީ އެއްގޮތަކަށް ވެސް ހިތްޕުޅުގައި އޮތް ކަމެއް ނޫން ކަމަށް ނަޝީދު އެ ދުވަހު ވިދާޅުވި އެވެ.