އުއްތަމަ ފަނޑިޔާރުގެ ގެކޮޅަށް ވަނީ މަސްތުވާތަކެތގެ މައްސަލަތަކުގައި ހިމެނޭ މީހެއް: އިމްރާން

އުއްތަމަ ފަނޑިޔާރު އަހުމަދު މުއުތަސިމް އަދުނާންގެ ގެކޮޅަށް ވަގަށް ވަނީ ވަނީ މަސްތުވާތަކެތީގެ މައްސަލަތަކުގައި ހިމެނޭ މީހެއް ކަމުގެ މައުލޫމާތު ލިބިވަޑައިގެންފައިވާ ކަމަށް ހޯމް މިނިސްޓަރު އިމްރާން އަބްދުﷲ ރައްޔިތުންގެ މަޖިލީހުގައި މިއަދު ވިދާޅުވެއްޖެ އެވެ.

މެމްބަރަކު ކުރެއްވި ސުވާލަކަށް ޖަވާބު ދެއްވަމުން އިމްރާން ވިދާޅުވީ، މަސްތުވާތަކެތީގެ ވަބާގައި ޖެހިފައިވާ މީހުންގެ ސަބަބުން ބޮޑެތި ގޮންޖެހުންތައް ކުރިމަތިވަމުންދާ ކަމަށާއި މާލޭގައި ރޭ ހިންގީ ވެސް އެފަދަ ކަންތައްތަކެއް ކަމަށެވެ.

މިނިސްޓަރު އެ ވިދާޅުވީ، އެއީ ހުކުރު މިސްކިތާއި އިސްލާމީ މަރުކަޒާއި ރައީސް އޮފީހުގެ ކުރިމައްޗަށް މީހަކު ރޭ ކުޑަކަމު ދިޔަ މައްސަލަ އެވެ. ފުލުހުން ފަހުން ބުނީ އެ ކަން ކުރީ ނުކުޅެދުންތެރިކަން ހުންނަ މީހަކު ކަމަށެވެ.

"ރައީސް އޮފީސް ކުރިމައްޗަށާއި އަދި އެހެން ތަންތަނަށް ކުޑަކަމުދިއުމާއި މި ހުރިހާ ކަންތައްތަކަކީ ރާއްޖޭގައި މަސްތުވާތަކެތީގައި ޖެހިފައި ތިބި ފަރާތްތަކުގެ ސަބަބުން ހިނގާ ކަންތައްތައް. [މިކަމުގައި] ވަރަށް ބޮޑެތި ގޮންޖެހުންތައް އެބަހުރި،" އިމްރާން ވިދާޅުވި އެވެ.

"އަޅުގަނޑަށް މައުލޫމާތު ލިބިފައިވާ ގޮތުގައި ޗީފް ޖަސްޓިސްގެ ގެކޮޅަށް ވަނީ ވެސް އެފަދަ ފަރާތެއް."

މިނިސްޓަރު ވިދާޅުވިގޮތުގައި، އުއްތަމަ ފަނޑިޔާރުގެ ގެކޮޅަށް މީހަކު ވަން މައްސަލަ ވެސް މިހާރު އަންނަނީ ބަލަމުންނެވެ.

އިމްރާން މިގޮތަށް ޖަވާބު ދެއްވި ނަަމަވެސްް މާފަންނު އުތުރު ދާއިރާގެ އެމްޑީޕީގެ މެމްބަރު އިމްތިޔާޒް ފަހުމީ ހަގީގަތުގައި ސުވާލުގައި އެއްސެވީ އުއްތަމަ ފަނޑިޔާރުގެ ގެކޮޅުގެ ސެކިއުރިޓީއާ ބެހޭ އިންޓެލިޖެންސް މައުލޫމާތެއް ފުލުހުންނަށް ލިބިފައިވޭތޯ އެވެ. އެ ގެކޮޅުގެ ސެކިއުރިޓީ އެހާ ބަލިކަށިކަން ފުލުހުންނަށް އެނގިފައި ވޭތޯ ވެސް އިމްތިޔާޒު ސުވާލު ކުރެއްވި އެވެ.

އެކަމަކު، އެ ސުވާލުތަކަށް އިމްރާން އެއްވެސް ޖަވާބެއް ނުދެއްވަ އެވެ.

އުއްތަމަ ފަނޑިޔާރުގެ ގެކޮޅަށް މީހަކު ވަދެ، ސީސީޓީވީ އަށް ގެއްލުން ދިނުމަކީ ސަލާމަތީ މާހިރުން ސިފަކުރައްވާ ގޮތުގައި "ނުރައްކަލަށް ދޮރުހުޅުވިފައި" އޮތުމެވެ. އެ ޖަރީމާ ހިންގިއިރު އެ ތަނުގެ ސެކިއުރިޓީ އާދައިގެ ގެތަކަށް ވުރެން ވެސް ދަށެވެ. ޑޯ ލޮކް ސިސްޓަމެއް ވެސް ނެތެވެ. ސިޑިން އަރައިގެން، އެއްވެސް ހުރަހެއް ނެތި ދާގޮތަށް ދާންވީ އެވެ.

އެކަމަކު އެ ހާދިސާ އަށް ފަހު އެ ގެކޮޅުގެ ސެކިއުރިޓީ ވަރުގަދަކޮށްފައިވާ ކަމުގެ މައުލޫމާތު ލިބިވަޑަައިގެންފައިވާ ކަމަށް މަޖިލީހުގެ 241 ކޮމިޓީގެ މުގައްރިރު މުހައްމަދު އަސްލަމް އިއްޔެ، "މިހާރު" އަށް ވިދާޅުވި އެވެ.