"މަނީ ހައިސްޓް 5" ގެނެސްދޭނީ ދެ ބަޔަކަށް

ބެލުންތެރިންގެ ބޮޑު ތަރުހީބެއް ހޯދާފައިވާ މަޝްހޫރު ސީރީޒް "މަނީ ހައިސްޓް" ގެ ފަސް ވަނަ އަދި ފަހު ސީޒަން ދެ ބަޔަކަށް ގެނެސްދޭ ގޮތަށް ނިންމައި އޭގެ ޓީޒާ ދައްކާލައިފި އެވެ.

ނެޓްފްލިކްސްގެ މި ސީރީޒް ނިިންމައިލާ ސީޒަންގެ ވޮލިއުމް އެކެއް ސްޓްރީމްކުރާނީ ސެޕްޓެމްބަރު ތިނެއްގަ އެވެ. ވޮލިއުމް 2 އަންނާނީ ޑިސެމްބަރު 3 އެވެ.

"މަނީ ހައިސްޓް 5" އާ ބެހޭ ގޮތުން އޭގެ ކްރިއޭޓަރު އެލެކްސް ޕީނާ ބުނީ ބެލުންތެރިން ޝައުގުވެރިވާ ކަހަލަ ކިތަންމެ ކަމެއް ފަހު ސީޒަންގެ ތެރޭގައި ފެނިގެންދާނެ ކަމަށެވެ. އޭނާ ބުނި ގޮތުގައި ބެލުންތެރިންގެ ލޯބި އިންތިހާ އަށް ލިބުނު ސީރީޒް ނިމުމަކަށް ގެންނާތީ މީގައި ބެލުންތެރިން ބޭނުންވާ ހުރިހާ ރަހައެއް ހިމެނޭނެ އެވެ. އަނެއްކޮޅުން ފަސް ވަނަ ސީޒަންގެ މަސައްކަތުގެ ބޮޑު ބައި މިދިޔަ އަހަރު ކުރިއަށް ގެންދަން ޖެހުނީ ކޮވިޑް-19 ގެ ބޮޑު ބަލިމަޑުކަމުގެ ތެރޭގައި ކަމަށްވެފައި، ގިނަ ގޮންޖެހުންތަކާ އެކު ވެސް "މަނީ ހައިސްޓް 5" ގެ މަސައްކަތް ވަރަށް ފުރިހަމައަށް ކުރެވުނު ކަމަށް ބުންޏެވެ.

"ދެ ބަޔަކަށް ފަހު ސީޒަން ގެނެސްދޭން ނިންމީ މީގެ ކެރެކްޓާތައް އިތުރަށް ހުލާސާކޮށް ދިނުމާ އެކު އިމޯޝަންތައް ވަރުގަދަކުރަން. އެގޮތުން ފުރަތަމަ ވޮލިއުމްގައި ކެރެކްޓާތަކަށް ވަރަށް ބޮޑަށް އަލިއަޅުވާލާފައި ހުންނާނެ،" އެލެކްސް ބުންޏެވެ. "ދެވަނަ ވޮލިއުމް ވަރަށް ޖަޒުބާތީވާނެ. ސަބަބަކީ މިއީ އޯޑިއަންސާ ގުޅިފައި އޮތް ދުވަސްވީ ދަތުރަކަށް ނިމުން ވެސް އަންނަ ކަމަކަށްވާތީ."

ސްޕެއިން އިން އުފަންވެގެން އައި "މަނީ ހައިސްޓް" އަކީ 2017 ގައި ގެނެސްދޭން ފެށި އެއްޗެކެވެ. ކުރިން އެންޓެނާ 3 ނެޓްވޯކުން ގެނެސްދިން ސީރީޒް ނެޓްފްލިކްސް ގެނައީ 2019 ގަ އެވެ. އެއީ ތިން ވަނަ ސީޒަނާ އެކީގަ އެވެ. ހަތަރު ވަނަ ސީޒަން ގެނެސްދިނީ މިދިޔަ އަހަރުގެ އެޕްރީލް މަހުގެ ކުރީކޮޅު އެވެ.

ވަރަށް ރޭވުންތެރިކޮށް ބޭންކް ފަޅައިލަން އުޅޭ ބައެއްގެ ވާހަކަ ކިޔައިދޭ "މަނީ ހައިސްޓް" ގެ 31 އެޕިސޯޑް ހަތަރު ސީޒަނާ އެކު ގެނެސްދީފައިވެ އެވެ.