ކެންސަލްކުރި ޒުވާނުންގެ އެވޯޑު ހަފުލާ އަންނަ ބުދަ ދުވަހުގެރޭ ބާއްވަނީ

މޫސުމް ގޯސްވުމުގެ ސަބަބުން ކެންސަލް ކުރި ކަމަށް ޔޫތު މިނިސްޓްރީން ކުރިން ބުނި، ޔޫތު އެވޯޑް ހަފުލާ އަންނަ ބުދަދުވަހުގެ ރޭ ބާއްވާ ގޮތަށް އެ މިނިސްޓްރީން ނިންމައިފި އެވެ.

ރައީސް އަބްދުﷲ ޔާމީން ޝަރަފުވެރި ކޮށްދެއްވާ ގޮތަށް ހަމަޖެހިފައި އޮތް އެ އެވޯޑު ހަފުލާ ބާއްވާ ގޮތަށް ކުރިން ހަމަޖެއްސީ މިިދިޔަ ބުރާސްފަތި ދުވަހުގެ ރޭގަ އެވެ. އެކަމަކު ހަފުލާއަށް ގިނަ ބަޔަކު ވާރޭގެ ތެރޭގައި ދަރުބާރުގެއަށް ވެސް ދިޔަ ފަހުން، އެންމެ ފަހު ވަގުތު ވަނީ ހަފުލާ ކެންސަލްކޮށްފަ އެވެ.

ޔޫތު މިނިސްޓްރީން ބުނީ ބުދަ ދުވަހުގެ ރޭ ބާއްވާ ހަފުލާ ވެސް ޝަރަފުވެރިކޮށްދެއްވާނީ ރައީސް ޔާމީން ކަމަށެވެ.

މި އަހަރުގެ ޒުވާނުންގެ އެވޯޑަށް 10 ދާއިރާއަކުން 40 އަށް ވުރެ ގިނަ މީހުން ކުރިމަތިލާފައިވާ ކަމަށާއި މި ފަހަރުގެ އެވޯޑަށް ވަރަށް ރަނގަޅު ތަރުހީބެއް ލިބިފައިވާ ކަމަށް ޔޫތު މިނިސްޓްރީން ކުރިން ބުންޏެވެ.

ޒުވާނުންގެ އެވޯޑު ލިބޭ މީހުންނަށް އެވޯޑާއި ސެޓްފިކެޓާއި 25,000ރ. ގެ ފައިސާގެ އިނާމެއް ދޭނެ އެވެ.