ތަހުގީގީ އިދާރާއެއް މެދުވެރިކޮށް މައްސަލަ ހުށަހަޅަން ލަފާދީ ޒަމީލްގެ މައްސަލަ ޕީޖީން އަނބުރާ ފޮނުވާލައިފި

ޑިފެންސް މިނިސްޓްރީގެ ޑެޕިއުޓީ މިނިސްޓަރު ހަސަން ޒަމީލްގެ މައްޗަށް ދައުވާ ކޮށްދިނުމަށް އެދި ރައްޔިތުންގެ މަޖިލީހުގެ އިދާރާ އިން ޕްރޮސެކިއުޓާ ޖެނެރަލް (ޕީޖީ) ގައި އެދުނު މައްސަލަ މިއަދު އަނބުރާ މަޖިލީހަށް ފޮނުވާލައިފި އެވެ.

ޕްރޮސިކިއުޓަ ޖެނެރަލްގެ އޮފީހުގެ އިންފޮމޭޝަން އޮފިސަރު، އަދި ޕަބްލިކް ޕްރޮސިކިއުޓަ އަހުމަދު ޝަފީއު "މިހާރު" އަށް ވިދާޅުވީ އެ މައްސަލައިގައި ދައުވާ ކޮށްދިނުމަށް އެދި މަޖިލީހުގެ އިދާރާ އިން ޕީޖީ އޮފީހަށް ފޮނުވީ ތަހުގީގު ނުކޮށް ކަމަށެވެ. އެހެންވެ، ޖިނާއީ ތަހުގީގެއް އެ މައްސަލައިގައި ހިންގުމަށް އެފަދަ އިދާރާ އަަކަށް ހުށަހަޅަން ލަފާދީފައިވާނެ ކަމަށް އޭނާ ވިދާޅުވި އެވެ.

ރައްޔިތުންގެ މަޖިލީހުގެ އިމްތިޔާޒު ކޮމިޓީން ގޮތެއް ނުނިންމައި، އެއްވެސް ބޭފުޅެއްގެ މައްޗަށް ދައުވާ ކޮށްދިނުމަށް އެދި މަޖިލީހުން ޕީޖީ އޮފީހަށް މީގެ ކުރިން ފޮނުވައިފައެއް ނުވެ އެވެ. އެހެންވެ، މިއީ ސީދާ މަޖިލީހުގެ ރައީސް މުހައްމަދު ނަޝީދު އަންގަވައިގެން މިފަދަ ގޮތަކަށް މައްސަލައެއް ޕީޖީ އޮފީހަށް ފޮނުވި ފުރަތަމަ ފަހަރު ވެސް މެ އެވެ.

ޝަފީއު ވިދާޅުވީ، މިފަދަ މައްސަލަަތަކުގައި ދައުވާ ކޮށްދިނުމަށް އެެދި ޕީޖީ އޮފީހަށް ފޮނުވަން ވާނީ ފުލުހުން ނުވަތަ ތަހުގީގީ އިދާރާއަކުން އެ މައްސަލަ ބެލުމަށް ފަހު، އެ އިދާރާއަކުން ކަމަށެވެ.

އޭނާ ވިދާޅުވީ، އިމްތިޔާޒު ކޮމިޓީން ނިންމައިގެން މީގެ ކުރިން ވެސް ބައެއް ބޭފުޅުންގެ މައްސަލަތައް ސީދާ ފުލުސް އޮފީހަށް ފޮނުވާފައިވާ ކަމަށެވެ.

"މި މައްސަލައިގައި އަޅުގަނޑުމެން ލަފާދީފައި ވާނެ، ތަހުގީގީ އިދާރާ އިން ކުރާ ތަހުގީގާ މެދު އެ ބޭފުޅުން [މަޖިލީހުގެ އިދާރާ] ހިތްހަމަޖެހިވަޑައިނުގަންނަވާ ނަމަ އަޅުގަނޑުމެންންނަށް އެކަން އަންގަން،" ޝަފީއު ވިދާޅުވި އެވެ.

ޒަމީލަށް ދައުވާ ކޮށްދިނުމަށް ޕީޖީއަށް ފޮނުވީ، ވަކިވަކި ސިފައިން މަޖިލީހަށް ހާޒިރު ކުރުމަށް ރައްޔިތުންގެ މަޖިލީހުން ނިންމުމުން އެކަމަށް އިންކާރު ކުރައްވައި، މަޖިލީހުގެ އިދާރާ އަށް ފޮނުއްވި ސިޓީގައި އޭނާ ސޮއިކުރައްވާފައި އޮތުމުންނެވެ.

އެ ސިޓީގައި ވަނީ ސިފައިންގެ ފަރާތުން ޖަވާބުދާރީވާނީ ސިފައިންގެ ލަފާދޭ މަޖިލީހުން ޗީފް އޮފް ޑިފެންސް ފޯސްއަށް ދެއްވާފައިވާ ލަފާގައިވާގޮތުގެ މަތިން ދިވެހިރާއްޖޭގެ ގައުމީ ދިފާއީ ބާރުން ކަމަށެވެ.

މަޖިލީހުން ބުނި ގޮތުގައި އެ މައްސަލައިގައި ދައުވާކޮށްދިނުމަށް އެދި ފޮނުވާފައި ވަނީ ގާނޫނުއަސާސީން ރައްޔިތުންގެ މަޖިލީހަށް ލިބިދީފައިވާ އިމްތިޔާޒުތަކާއި ބާރުތައް ނެގެހެއްޓުމަކީ މަޖިލީހުގެ ރައީސްގެ ޒިންމާއަކަށްވާތީ އެވެ.

ރައްޔިތުންގެ މަޖިލީހުގެ އިމްތިޔާޒާ ގުޅޭ އެ މައްސަލަ ބެލުމަށް މަޖިލިސް ރައީސް، އެ މައްސަލަ ރައްޔިތުންގެ މަޖިލީހުގެ އިމްތިޔާޒާއި ސުލޫކު ކޮމިޓީ އަށް ފޮނުއްވި އެވެ.

އެ މައްސަލަ ބޭރުކޮށްލީ މަޖިލީހުގެ އެމްޑީޕީ މެމްބަރުންގެ ވެސް ވޯޓާ އެކު އެވެ. މިހެންވެ، އެ ޕާޓީގެ އެތެރޭގައި ވަނީ މައްސަލަ ހޫނުވެފަ އެވެ.

ރޭ ބޭއްވި އިމްތިޔާޒު ކޮމިޓީގެ ބައްދަލުވުމުގައި ވަނީ ޒަމީލް ރައްޔިތުންގެ މަޖިލީހުގެ އިމްތިޔާޒަށް އަރައިގަނެފައިވާ ކަމަށް ވިދާޅުވެ، މަޖިލީހުގެ ރައީސް ނަޝީދު ފޮނުއްވި މައްސަލަ އެ ކޮމިޓީން ބޭރުކޮށްލައިފަ އެވެ. އެ މައްސަލަ ބޭރުކޮށްލީ މަޖިލީހުގެ އެމްޑީޕީ މެމްބަރުންގެ ވެސް ވޯޓާ އެކު އެވެ. މިހެންވެ، އެ ޕާޓީގެ އެތެރޭގައި ވަނީ މައްސަލަ ހޫނުވެފަ އެވެ.