ނެދަލޭންޑްސް އަށް ފަހު ވަގުތު މޮޅެއް، އެނބުރި އައުން އުފާވެރި

އެމްސްޓްރަޑަމް (14 ޖޫން) - މެޗުގެ ފަހުކޮޅު ޑެންޒެލް ޑަމްފްރީސް ޖެހި ލަނޑާއެކު، ޔޫރޯ 2020ގެ ގުރޫޕް ސީގައި މިރޭ ޔޫކްރޭން އަތުން 3-2 އިން ނެދަލޭންޑްސް މިރޭ މޮޅުވެއްޖެ އެވެ. މިއީ ހަތް އަހަރުގެ ތެރޭގައި، ބައިނަލްއަގުވާމީ ބޮޑު މުބާރާތެއްގައި ނެދަލޭންޑްސް ކުޅުނު ފުރަތަމަ މެޗެވެ.

ނެދަލޭންޑްސްގެ އެމްސްޓްރަޑަމްގައި މިރޭ ޔޫކްރޭނާއި ނެދަލޭންޑްސް ކުރިމަތިލި މެޗަކީ މި އަހަރުގެ ޔޫރޯގައި މިހާތަނަށް ފެނުނު އެންމެ ފޯރިގަދަ މެޗެވެ. މެޗުގެ ދެވަނަ ހާފުގައި ނެދަލޭންޑްސް އިން ދެ ލަނޑުގެ ލީޑެއް ނަގާފައި ވަނިކޮށް، ޔޫކްރޭން އިން ވަނީ ފަހަތުން އަރައި ދެ ލަނޑު ޖަހައި، މެޗުގެ ނަތީޖާ 2-2 އަށް ހަދައިފަ އެވެ. އެހެން ނަމަވެސް، އަމިއްލަ ސަޕޯޓަރުންގެ ކުރިމަތީގައި ނެދަލޭންޑްސް ވަނީ ފަހު ވަގުތު، ސަލާމަތްވެފަ އެވެ.

ޔޫރަޕްގެ ފުޓްބޯޅައިގެ ގަދަ ބާރެއްގައި ގޮތުގައި ބެލެވުނަސް، މި އަހަރުގެ ޔޫރޯ އަށް ކޮލިފައިވުމާ ހަމައަށް، ނެދަލޭންޑްސް އެންމެ ފަހުން ބައިނަލްއަގުވާމީ މުބާރާތެއްގައި ވާދަކުރީ 2014 ވަނަ އަހަރެވެ. އެއީ އެ އަހަރު ބްރެޒިލްގައި އޮތް ވޯލްޑް ކަޕެވެ. އޭގެ ފަހުން، ބައިނަލްއަގުވާމީ ބޮޑު މުބާރާތަަކަށް ނެދަލޭންޑްސް ކޮލިފައިނުވެ އެވެ. އެންމެ ފަހުން ފްރާންސްގައި 2016 ވަނަ އަހަރު އޮތް ޔޫރޯ އަށް ނެދަލޭންޑްސް ކޮލިފައިނުވެ އެވެ.

މެޗުގެ ފުރަތަމަ ހާފުގައި ލިބުނު ރަނގަޅު ފުރުސަތުތައް ބޭކާރުކޮށްލި ނަދަލޭންޑްސް އަށް ޔޫކްރޭންގެ ގޯލު ހުޅުވުނީ މެޗުގެ 52 ވަނަ މިނިޓުގައި އެ ޓީމުގެ ކެޕްޓަން ޖޯޖީނިއޯ ވައިނާލްޑަމް ޖެހި ލަނޑުންނެވެ. ނެދަލޭންޑްސްގެ ހަމަލާއެއް ޔޫކްރޭންގެ ގޯލްކީޕަރު ހެއޯރީ ބުޝްކާން ދިފާއުކުރި ނަމަވެސް، އޭނާގެ އަތުގައި ޖެހިފައި ނިކުތް ބޯޅަ އަށް ހުށިހާރުކަމާއެކު އަރައި، ވައިނާލްޑަމް ވަނީ ގޯލުގެ ތެރެއަށް އެ ބޯޅަ ވައްދާލައިފަ އެވެ.

އޭގެ ހަ މިނިޓު ފަހުން، ނެދަލޭންޑްސް އިން ލީޑު ފުޅާކުރީ ފޯވަޑް ވައުޓް ވެގްހޯސްޓް ކާމިޔާބުކުރި ލަނޑަކުންނެވެ.

އެކަމަކު ޔޫކްރޭންގެ އުންމީދުތައް އާވީ މެޗުގެ 75 ވަނަ މިނިޓުގައި އެ ޓީމުގެ ކެޕްޓަން އަންދްރީ ޔަރްމޮލެންކޯ ކާމިޔާބުކުރި ހިތްގައިމު ލަނޑުންނެވެ. އަދި އޭގެ ހަތަރު މިނިޓު ފަހުން، ނެދަލޭންޑްސް ސިއްސުވާލައި، ޔޫކްރޭން އިން މެޗުގެ ނަތީޖާ ހަމަހަމަކުރީ ރޯމަން ޔަރެމުކް ކާމިޔާބުކުރި ލަނޑުންނެވެ.

އެކަމަކު ނެދަލޭންޑްސް އިން މެޗުން މުހިންމު ތިން ޕޮއިންޓް ހޯދީ 85 ވަނަ މިނިޓުގައި ޑަމްފްރީސް ކާމިޔާބުކުރި ލަނޑުންނެވެ. މެޗުގައި ލަނޑުަޖަހާނެ ރަނގަޅު ފުރުސަތެއް ލިބުނު ޑަމްފްރީސް ޔޫކްރޭންގެ ގޯލަށް ބޯޅަ އަމާޒުކޮށްލީ ބޮލުންނެވެ. -- އޭއެފްޕީ