ރަހީނުކުރި ކުއްޖަކު މަރާލައި މޫދަށް އެއްލާލާފައި އޮއްވައި ހޯދައިފި

އުމުރުން 13 އަހަރުގެ ފިރިހެން ކުއްޖަކު ރަހީނުކޮށް މަރާލުމަށް ފަހު ހުޅުމާލޭ މޫދަށް އެއްލާލާފައި އޮއްވައި ރޭ މެންދަމު ފުލުހުން ހޯދައިފި އެވެ.

ފުލުހުން ބުނީ މި ކުއްޖާ ފެނުނީ 13 އަހަރުގެ ކުއްޖަކު ރަހީނުކޮށްގެން އުޅޭ ކަމުގެ ރިޕޯޓެއް މިދިޔަ އާދިއްތަ ދުވަހު ލިބުމާ ގުޅިގެން އެ ކުއްޖާ ހޯދަމުން ދަނިކޮށް، ރޭ މެންދަމުން އަލިވެ 2:30 ހާއިރު ކަމަށެވެ. އެ ކުއްޖާ ކުއްޖާ ފެނުނީ ހުޅުމާލޭ ދެ ވަނަ ފޭސްގައި މީހުން ވަދެ އުޅެވޭ ގޮތަށް އޮންނަ ހިސާބުން ކަރުތާފެނާ ހިސާބު މޫދުންނެވެ.

މި މައްސަލާގައި 17 އަހަރުގެ ކުއްޖަކާއި 27 އަހަރުގެ ފިރިހެނަކު ފުލުހުން ވަނީ ރޭ ހައްޔަރުކޮށްފަ އެވެ.

ހާދިސާއާ ބެހޭ ތަފްސީލެއް ފުލުހުން އަދި ހާމައެއް ނުކުރެ އެވެ.

ނަމަވެސް އެނގިފައިވާ ގޮތުގައި ކުއްޖާގެ ހަށިގަނޑު ހޯދީ ރަހީނުކުރި މައްސަލައިގެ ތަހުގީގެ ތެރެއިން ތުހުމަތުކުރެވޭ މީހުން ހޯދުމަށް ފަހުގަ އެވެ.