ލެނޯވޯގެ ޓެބްލެޓެއް ފާރުގައި އަޅުވާލެވޭ ގޮތަށް

މި އަހަރުގެ ކުރީކޮޅު ޗައިނާގެ މާކެޓަށް ހާއްސަކޮށްގެން ލެނޯވޯ އިން ނެރުނު ޓެބްލެޓް، ޔޯގާ ޕެޑް ޕްރޯގެ އެންޑްރޮއިޑް އާ ވާޝަނެއް އިންޓަނޭޝަނަލް މާކެޓަށް ނެރެން ތައްޔާރުވެއްޖެ އެވެ.

ކުންފުނިން މިއަށް ދިފައިވާ ނަމަކީ ޔޯގާ ޓެބް 13 އެވެ. އަދި މީގެ ހާއްސަ ކަމަކީ އެކްސްޓާނަލް ޑިސްޕްލޭއެއްގެ ގޮތުގައި ވެސް ބޭނުންކޮށްލެވުމެވެ. މިއީ ތަނެއްގެ މަތީގައި ބެހެއްޓުމުގެ އިތުރަށް ފާރު ކަހަލަ ތަނެއްގައި އަޅުވައިގެން ވެސް ބޭނުންކޮށްލެވޭނެ އެއްޗެކެވެ. މީގެ އެޓޭޗްޑް ސްޓޭންޑްގައި ޑިސްޕްލޭ 180 ޑިގްރީ އަށް ރޮޓޭޓް ވެސް ކުރެވޭނެ އެވެ.

ޔޯގާ ޓެބް 13 ގެ އަަގަކީ 679 ޑޮލަރު (10,456ރ.) އެވެ.

ލެނޯވޯ އިން ބުނި ގޮތުގައި މި ޑިވައިސް އަކީ އެ ކުންފުނީގެ ޕްރެޒިޝަން ޕެން 2 ވެސް ބޭނުންކުރެވޭނެ އެވެ. އަދި ގިނަ ކަންކަމަށް ބޭނުންކުރަން ފަސޭހަ އެއްޗަކަށް ވާނެ އެވެ. އެގޮތުން ވީޑިއޯ ކޯލް ހަދާ އިރު، ފަހަތުން އިވޭ އަޑުތައް ދަށްކޮށްލައި، ވީޑިއޯ ކޯލް ފުރިހަމަކޮށްދޭން ވެސް މިއީ ވަރަށް ރަނގަޅު އުފެއްދުމަކަށް ވާނެ އެވެ.

ޔޯގާ ޓެބް 13 އާ އެކު ލެނޯވޯ އިން އެންޑްރޮއިޑް ޓެބްލެޓްގެ އިތުރު ވާޝަންތަކެއް ވެސް ނެރެން ނިންމާފައިވެ އެވެ. އޭގެ ތެރޭގައި ޔޯގާ ޓެބް 11 އާއި ޓެބް ޕީ11 ޕްލަސްގެ އިތުރުން އެ ޑިވައިސްތަކަށް ވުރެ އަގުހެޔޮކޮށް ވިއްކާނެ ޓެބް އެމް7 އާއި ޓެމް އެމް8 ހިމެނެ އެވެ.

މި ޑިވައިސްތައް މި މަސް ނިމުމުގެ ކުރިން ވިއްކަން ފަށާނެ އެވެ.