އުދުހޭ ގޮތަށް ބަދަލުކޮށްލެވޭ ކާރެއް

އުދުހޭ ޓެކްސީ އާއި އުދުހޭ ރޭސް ކާރަކީ މިހާރު މަންޒަރު ފެންނަ ގޮތަށް ބަލާ އިރު ދެން މާ ގިނަ ދުވަހެއް ނުވެ ހަގީގަގީތަކަށް ވެދާނެ އެއްޗިއްސެވެ. އެފަދަ ތަކެތި އުފައްދައި ބޭނުންކުރަން ފަށަން ތައްޔާރީތައް ވަމުން އަންނަ އިިރު، މަސައްކަތްތައް މިހާރު ހުރީ އެކި މަރުހަލާތަކުގަ އެވެ.

އެފަދަ މަސައްކަތެއްގެ ތެރެއިން މިއީ ވެސް ތަފާތު އުފެއްދުމެއްގެ ވާހަކަ އެވެ. އާދައިގެ ކާރެއް ގޮތަށް މަގުމަތީގައި ދުއްވާލެވޭ ކާރެއް އުދުހޭ ކާރަކަށް ބަދަލުވެ، މިހާރު މި ވަނީ އެ ކާމިޔާބުކަމާ އެކު މިދިޔަ ހޯމަ ދުވަހު ޓެސްޓް ވެސް ކޮށްފަ އެވެ. "އެއާ ކާ" ގެ ނަން ދީފައިވާ އުދުހޭ ކާރު ޓެސްޓްކުރީ ސްލޮވޭކިއާގަ އެވެ. ހައިބްރިޑް ކާ-އެއާކްރާފްޓެއްގެ ގޮތުގައި ސިފަކުރާ "އެއާ ކާ" 8،200 ފޫޓް (2،500 ފޫޓް) މަތިން ގަޑިއަކު 600 މޭލު (1،000 ކިލޯމީޓަރު) އަށް އުދުހެވޭ އެއްޗެކެވެ. މީގައި ބޭނުންކޮށްފައި ވަނީ ބީއެމްޑަބްލިއު ކާރުގެ އިންޖީނެކެވެ. ހަކަތަ އަށް ބޭނުން ކުރަނީ ޕެޓްރޯލެވެ.

"އެއާ ކާ" ގެ ހާއްސަ ސިފަ އަކީ ކާރަކުން ކުޑަ މަތިންދާބޯޓަކަށް ނުވަތަ މަތިންދާބޯޓަކުން ކާރަކަށް، ކުޑަ ވަގުތުކޮޅެއްގެ ތެރޭގައި ބަދަލުކޮށްލެވުމެވެ. އެކަމަށް ނަގަނީ އެންމެ ދެ މިނިޓާއި 15 ސިކުންތެވެ.

މަތިންދާބޯޓަކަށް ކާރު ބަދަލުވުމުން ކާރުގެ ދެ ފަރާތުން ދެ ފިޔަގަނޑު ނުކުންނާނެ އެވެ. ކާރަކަށް ބަދަލުކޮށްލަންވީމާ ދެ ފަރާތުން އަރިމައްޗަށް ފިޔަގަނޑުތައް މަޅައިލީމާ ފެންނާނީ ރޭސް ކާރަކާ ވައްތަރު ކަހަލަ ގޮތަކަށެވެ. އެކަމަކު އުދުހެންވީމަ އާއި ލޭންޑްކުރަން މި ކާރަށް ރަންވޭއެއް ބޭނުން ވާނެ އެވެ.

"އެއާ ކާ" އަކީ ސްލޮވޭކިއާގެ ޕްރޮފެސަރެއް ކަމަށްވާ ސްޓެފެން ކްލީންގެ އުފެއްދުމެކެވެ. ދެ މީހުންގެ ޖާގައިގެ މި އުޅަނދަށް ހިފަހައްޓާލެވޭނީ 200 ކިލޯގެ ބަރުދަނެވެ. ދެ އަހަރު ދުވަހުގެ މަސައްކަތުން ނިންމި އުފެއްދުމަށް ދެ މިލިއަން ޑޮލަރު ހޭދަވި އެވެ.

ސްޓެފަން ވިދާޅުވީ އުދުހޭ ކާރަކީ މުސްތަގުބަލާ ވަރަށް ބޮޑަށް ގުޅިފައިވާ އެއްޗެއް ކަމަށެވެ. އެހެންވެ އެކި ޓެކްނޮލޮޖީ ބޭނުންކޮށްގެން ތަފާތު ގޮތްގޮތަށް އުދުހޭ ކާރު އުފެއްދުމަކީ ކުރިމަގުގައި ބޮޑު ވިޔަފާރިއަކަށް ވާނެ ކަމަށް ވިދާޅުވި އެވެ. އޭނާގެ "އެއާ ކާ" އާ ދޭތެރޭ ވެސް ބޮޑެތި އުންމީދުތަކެއް ކުރެވޭތީ އެކަމަށް ހާއްސަކޮށްގެން މިހާރު "ކްލީން ވިޝަން" ގެ ނަމުގައި ކުންފުންޏެއް ހަދައި، މަސައްކަތް ފުޅާކުރަން ވަނީ ނިންމައިފަ އެވެ.

އެ ކުންފުނީގެ އިންވެސްޓަރު އަދި އެޑްވައިޒަރު އޭންޓަން ރަޖަކް ވިދާޅުވީ އަމާޒަކީ ކުރިމަގުގައި ވައިގެ ދަތުރުފަތުރާއި ޓެކްސީ ހިދުމަތް ބޭނުންކުރާ އުޅަނދުތަކުގައި "އެއާ ކާ" ހިއްސާއަކަށްވުން ކަމަށެވެ.

"އެ ދެ ދާއިރާގައި ކުޑަކޮށް ނަމަވެސް ހިއްސާވެވުމަކީ އަހަރެމެންނަށް ލިބޭނެ ވަރަށް ބޮޑު ކާމިޔާބީއެއް،" އޭނާ ވިދާޅުވި އެވެ. "އެންމެ ބޮޑު ޓާގެޓަކީ އެ ދާއިރާތަކަށް އިންވެސްޓްކުރާ ކުންފުނިތަކުގެ ޝައުގުވެރިކަން ލިބޭ ކަހަލަ އެއްޗަކަށް އަހަރެމެންގެ އެއާ ކާ ވުން."