މޯލްޑިވިއަންގެ ހަތް ވަނަ ސީޕްލޭން މިރޭ ރާއްޖެ އަންނާނެ

މޯލްޑިވިއަންގެ ހަތް ވަނަ ސީ ޕްލޭން މިރޭ ރާއްޖެ އަންނާނެ ކަމަށް އައިލެންޑް އޭވިއޭޝަނުން މިއަދު ބުނެފި އެވެ.

ވައިގެ ދަތުރުފަތުރުގެ ހިދުމަތް ދޭ ރާއްޖޭގެ އެންމެ ބޮޑު ކުންފުނީގެ މެނޭޖިން ޑިރެކްޓަރު އަބްދުލް ހާރިސް "މިހާރު"އާ ވާހަކަ ދައްކަވަމުން ވިދާޅުވި ގޮތުގައި ބޯޓު ގެންނަނީ ކެނެޑާއިންނެވެ.

ރާއްޖެ އަށް ދަތުރުކުރާ މަގުމަތީގައި ސްވިޒަލޭންޑްގައި ޖެއްސުމަށް ފަހު ބައެއް މަރާމާތު ވެސް ކޮށްފައިވާ ކަމަށް ހާރިސް ވިދާޅުވި އެވެ. އެ ބޯޓު ރާއްޖެ އަންނާނީ މެދުއިރުމަތީގެ ބައެއް ގައުމުތަކުގައި ވެސް ޖައްސަމުންނެވެ.

ހާރިސް ވިދާޅުވި ގޮތުގައި ބޯޓު ރާއްޖެ ގެނެސް މެއިންޓަނަންސް މަސައްކަތްތައް ކުރުމަށް ފަހު ޖޫން މަސް ނިމުމުގެ ކުރިން އުދުހެން ފަށާނެ އެވެ.

މޯލްޑިވިއަންގެ އަމާޒަކީ މި އަހަރު ނިމުމުގެ ކުރިން ސީ ޕްލޭން ފްލީޓްގެ އަދަދު 10 އަށް އިތުރުކުރުމެވެ. އެގޮތުން ޖުލައި މަހު ވެސް ސީ ޕްލޭނެއް ގެންނަން ވަނީ ހަމަޖެހިފަ އެވެ.

އެ ކުންފުނީގެ ސީ ޕްލޭންތައް ރާއްޖޭގެ ފަސް ރިސޯޓަކަށް މިހާރު ދަތުރުކުރެ އެވެ. އަދި ދުވާލެއްގެ މައްޗަށް 15 ދަތުރުކުރެ އެވެ.

ހާރިސް ވިދާޅުވި ގޮތުގައި ސީ ޕްލޭންތައް އިތުރުވާ ވަރަކަށް ދަތުރުތައް ވެސް ގިނަވާނެ އެވެ.

މޯލްޑިވިއަނުން ދަނީ ސީ ޕްލޭން ޑޮކް ބޮޑުކުރުމުގެ މަސައްކަތާއި ސީ ޕްލޭންގެ ލައުންޖްތައް ބޮޑުކުރުމުގެ މަސައްކަތް ކުރަމުންނެވެ. އަދި ސީޕްލޭނަށް ހާއްސަ ހެގަރެއް އެޅުމުގެ މަސައްކަތް އަންނަ މަހު ނިމޭނެ ކަމަށް ވެސް އެ ކުންފުނިން ވަނީ ބުނެފަ އެވެ.