ވެއްޓުނު ބޯޓު ނަގައިފި

މިއަދު ހަވީރު އައި ގަދަކޮޅިގަނޑުގެ ތެރޭގައި، ހުޅުލެ އަށް ޖައްސަން އުޅެނިކޮށް ވެއްޓުނު، މޯލްޑިވިއަންގެ ސީޕްލޭން މޫދުން މިހާރު ނަގާފައިވާ ކަމަށް އައިލެންޑް އޭވިއޭޝަނުން ބުނެފި އެވެ.

ގާތްގަނޑަކަށް ފަސް މިލިއަން ޑޮލަރުގެ މި ބޯޓު ވެއްޓުނީ އައި ގަދަ ކޮޅިގަނޑުގެ ތެރޭގައި ހުޅުލޭ ފަޅަށް ޖައްސަން އުޅުމުގެ ތެރޭގައި ބޯޓުގެ އެެއް ފިޔަގަނޑު މޫދުގައި ޖެހި އަރިއަޅާލައިގެންނެވެ.

މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިން ޑިރެކްޓަރު އަބްދުލް ހާރިސް ވިދާޅުވީ، ބޯޓު ހެދުމަށްޓަކައި މިހާރު މޫދުން ނަގާފައިވާ ކަމަށާއި އެ އަށް ލިބިފައިވާ ގެއްލުމުގެ އަގު ވަޒަން ކުރަން އަދި އެނގިވަޑައިނުގަންނަވާ ކަމަށެވެ.

"އެސެސްމަންޓްތައް ހެދުމަށް ފަހު އެއްޗެއް ދައްނަވަން އެނގޭނީ،" އޭނާ ވިދާޅުވި އެވެ.

ހާރިސް ފާހަގަކުރެއްވި ގޮތުގައި މޫދަށް ޖައްސާ މި ބާވަތުގެ ބޯޓެއްގެ އަގު މާކެޓުގައި އުޅޭނީ 4.4 މިލިއަން ޑޮލަރާއި ފަސް މިލިއަން ޑޮލަރާ ދެމެދުގަ އެވެ.

މޯލްޑިވިއަނުން ސީޕްލޭންގެ ގޮތުގައި ބޭނުންކުރަނީ ޓްވިން އޮޓާ ބްރޭންޑުގެ ޑީއެޗްސީ ޑޭޝް 6 ސީރީޒްގެ ބޯޓުތަކެވެ. އެއީ ކްރޫންނާއި ފަސިންޖަރުންނާ އެކު 18 މީހުންގެ ޖާގައިގެ ބޯޓުތަކެކެވެ.

ނިޔާމަ ރިސޯޓުން ފުރައިގެން ގޮސް ހުޅުލޭ ފަޅަށް ޖައްސަން އުޅުމުގެ ތެރޭގައި މިއަދުގެ ހާދިސާ ހިނގިއިރު ބޯޓުގައި ތިބީ 18 މީހުން ކަމަށް އެމްއެންޑީއެފުން ބުނެ އެވެ. އެއީ 15 ފަސިންޖަރުންނާއި ތިން ކްރޫންނެވެ. އޭގެ ތެރޭގައި ޓޫރިސްޓުން ވެސް ތިބި ކަމަށް ވެ އެވެ. އެހާދިސާގައި މިހާހަކަށް ސީރިއަސް އަނިޔާއެއް ނުލިބެ އެވެ.

މޯލްޑިވްސް ސިވިލް އޭވިއޭޝަން އޮތޯރިޓީން ބުނީ، އެ އިދާރާއިންނާއި އެކްސިޑެންޓް އިންވެސްޓިގޭޝަން ކޯޑިނޭޝަން ކޮމެޓީން މި ހާދިސާ ތަހުގީގު ކުރަމުން އަންނަ ކަމަށެވެ.