ސަންގީތާ އަލުން އެކްޓިން އަށް އަންނަން ބޭނުމީ ވެބް ޝޯއަކުން

އަލުން އެކްޓިން އަށް ނުކުންނަން ބޭނުންވި ނަމަވެސް ފިލްމުތަކަށް މިހާރު ޝައުގުވެރިކަން ނެތް ކަމަށާއި ބޭނުންވަނީ ޑިޖިޓަލް ކޮންޓެންޓްތަކުގައި މަސައްކަތްކުރަން ކަމަށް ކުރީގެ ބަތަލާ ސަންގީތާ ބިޖްލާނީ ބުނެފި އެވެ.

އަލުން އެކްޓިން އަށް ނުކުންނަން ބޭނުންވާ ވާހަކަ މީގެ އަހަރެއްހާ ދުވަސް ކުރިން ދިން އިންޓަވިއުއެއްގައި ވެސް ބުނި 61 އަހަރުގެ ބަތަލާ ބުނި ގޮތުގައި މި ފަހުން އިންޑިއާ އިން ގެނެސްދޭ ޑިޖިޓަލް ކޮންޓެންޓްތަކުގެ ފެންވަރު ވަރަށް ރަނގަޅެވެ. އަދި ވަކިން ހާއްސަކޮށް މިހާރު ބަތަލާއިންނަށް ސްޓްރީމިން ޕްލެޓްފޯމްތަކުގައި ވަރުގަދަ ކެރެކްޓާތައް ކުޅެން ލިބި، އެ މީހުންގެ ހުނަރު ދައްކަން ފުރުސަތު ވަރަށް ބޮޑަށް ހުޅުވިފައިވާ ކަމަށް ގަބޫލުކުރާ ކަމަށް ބުންޏެވެ.

"އަހަރެން ފިލްމީ ދާއިރާގައި އުޅުނު ދުވަސްވަރާ ބަލާފައި މިހާރި ބޮލީވުޑްގައި ވެސް ކަންކަން ވަރަށް ތަރުތީބުކޮށް ހިނގާކަމާއި ޕްރޮފެޝަނަލިޒަމް ވަރަށް ބޮޑަށް އޮތްކަން ފާހަގަކުރެވޭ. އެކަމަކު މިހާރަކު ފީޗާ ފިލްމު ކުޅުމުގެ މާ ބޮޑު ޝައުގުވެރި ކަމެއް ނެތް،" އީ-ޓައިމްސް އަށް ސަންގީތާ ބުންޏެވެ. "އަހަރެން ބޭނުންވަނީ ވެބް ޝޯތަކުގައި މަސައްކަތްކުރަން."

އޭނާ ބުނީ މިހާރު ވެސް ހުރީ ހިތްހަމަޖެހޭ ކަހަލަ ކެރެކްޓާއެއް ވެބް ޝޯއަކުން ލިބިއްޖެ ނަމަ ކުޅެން ތައްޔާރަށް ކަމަށެވެ. އެކަމަކު ކުރިން އެކްޓިން ދޫކޮށްލުމަކީ އެއްވެސް އިރެއްގައި ދެރަވާ ކަމެއް ނޫން ކަމަށް ބުންޏެވެ.

"އެނބުރި އަންނަން ބޭނުމީ ވެބް ޝޯއަކުން،" ސަންގީތާ ބުންޏެވެ.

މާ ގިނަ ފިލްމުތަކެއް ކުޅެފައިވާ ނުވާ ސަންގީތާ ފިލްމު ކުޅުން ހުއްޓައިލީ ކުރީގެ ކްރިކެޓް ތަރި މުހައްމަދު އަޒުހަރުއްދީންއާ ކައިވެނިކުރަން ނިންމި ހިސާބުންނެވެ. އެ ދެ މީހުން 1996 ގައި ކުރި ކައިވެނި 2010 ގައި ވަނީ ރޫޅިފަ އެވެ. ކައިވެންޏަށް ދަރިޔަކު ލިބިފައެއް ނުވެ އެވެ.

އަޒުހަރުގެ ވާހަކ 2016 ގައި ގެނެސްދިން "އަޒުހަރު" ގައި ކިޔައި ދީފައިވެ އެވެ. އިމްރާން ހާޝްމީ އަޒުހަރުގެ ރޯލު ކުޅުނު ފިލްމުގައި ސަންގީތާގެ ރޯލު ކުޅުނީ ނަރުގިސް ފަހްރީ އެވެ.

ފިލްމު ކުޅުނު ދުވަސްވަރު ބަތަލާއަކަށް ވުރެ ބޮޑަށް އާންމުންގެ ތެރޭގައި ސަންގީތާ ބޮޑަށް މަޝްހޫރުވީ ސަލްމާން ޚާންގެ ލޯބިވެރިޔާގެ ގޮތުގަ އެވެ. ދެ މީހުން ކައިވެންޏަކާ ހަމައަށް ވެސް ދިޔަ އެވެ. އެކަމަކު ސަލްމާން ހިޔާލު ބަދަލުވެގެން އެ ކައިވެނި ނުކުރެވުނީ އެވެ.

ލޯބީގެ ގުޅުމުގައި ސިއްކަ ޖެހުނަސް ސަލްމާނާއި ސަންގީތާ އަކީ މިހާރު ވެސް ވަރަށް ގާތް ދެ ރައްޓެހިންނެވެ. އަދި ސަލްމާންގެ އާއިލާއާ ވެސް ސަންގީތާ ވަރަށް ގާތް ގުޅުމެއް އަބަދު ވެސް އޮވެ އެވެ.