އެސްޑީއެފްސީން އެއްވެސް އެއްޗެއް ނުގެއްލޭ

ކުދި އަދި މެދުފަންތީގެ ލޯނު ދޫކުރުމަށް އުފައްދާފައިވާ އެސްޑީއެފްސީ ބޭންކްގެ އޮފީހަށް ބަޔަކު ރޭ ވަން ނަމަވެސް އެއްވެސް އެއްޗެއް ނުގެއްލޭ ކަމަށް އެ ކުންފުނިން މިއަދު ބުނެފި އެވެ.

މެނޭޖިން ޑިރެކްޓަރު އަހުމަދު ޒީނާދު ވިދާޅުވީ، ސުޕްރީމް ކޯޓާއި ޖަސްޓިސް ބިލްޑިންގާ ދެމެދު ހުންނަ މ. ކަނީރުވިލާގެ ދެވަނަ ބުރީގައި ހިންގާ އެ އޮފީހަށް ބަޔަކު ވަނީ ފުރަގަހުގައި ހުންނަ ފެންލައިޓަކުން ކަމަށެވެ.

އެކަމަކު، އެއްވެސް އެއްޗަކަށް ގެއްލުން ދީފައި ނެތް ކަމަށް އޭނާ ވިދާޅުވި އެވެ.

އެސްޑީއެފްސީގެ އޮފީހުގައި ފައިސާއެއް ނުގެންގުޅެ އެވެ.

"ބެލެވެނީ ފައިސާ ހުންނާނެ ކަމަށް ބަލާ ބަޔަކު ވަނީ ކަމަށް،" އޭނާ ވިދާޅުވި އެވެ.

މި މައްސަލަ ފުލުހުންނަށް ރިޕޯޓު ކޮށްފައި ވަނީ މިއަދު ހެނދުނު ނުވައެއް ޖަހާކަން ހާއިރު އެވެ. ގްރީން ޒޯނުގައި ހުންނަ އެ އޮފީހަކީ ސެކިއުރިޓީ ކެމެރާ ހަރުކޮށް، ސަލާމަތީ ކަންކަން ރަނގަޅަށް ބަލަހައްޓަމުން އަންނަ އިމާރާތެކެވެ.