ބިލެއްފަހީގެ ބަނދަރުގެ ބޭރު ތޮށިލުމުގެ މަސައްކަތް އެމްޓީސީސީން ފަށައިފި

ށ. ބިލެއްފަހީގެ ބަނދަރުގެ އެއްގަމުތޮށިީގެ އަމަލީ މަސައްކަތް އެމްޓީސީސީން ފަށައިފި އެވެ.

އެ ކުންފުނިން މިއަދު ބުނީ އެ ރަށުގެ ބަނދަރު ސަރަހައްދުގައި ކޮންކްރީޓް ގާ އެތުރުމާއި އާ ހާބަރު ބޭސިން ފުންކުރުމުގެ މަސައްކަތް މިހާރު ނިމިފައިވާ ކަމަށެވެ.

ސަރުކާރުގެ ބަޖެޓުން 31.6 މިލިއަން ރުފިޔާ ހަރަދުކޮށްގެން ހިންގާ މި މަސައްކަތުގައި 40,576 ކިއުބިކް މީޓަރުގެ ސަރަހައްދެއްގެ ބަނދަރު ފުން ކުރާނެ އެވެ.

އެމްޓީސީސީން މިހާރު ވެސް އަންނަނީ ރާއްޖޭގެ އެކި ރަށްރަށުގެ ބަނދަރާއި ނަރުދަމާގެ ގިނަ މަސައްކަތްތަކެއް ކުރަމުންނެވެ. މިދިޔަ ކުއާޓަރުގައި އެ ކުންފުނިން ވަނީ 86 މަޝްރޫއެއްގެ މަސައްކަތް ކުރިއަށް ގެންގޮސްފަ އެވެ. އޭގެ ތެރޭގައި ބަނދަރު ހެދުމުގެ 41 އަދި ބިން ހިއްކުމުގެ 15 މަޝްރޫއެއް ހިމެނެ އެވެ.

އެމްޓީސީސީ އަށް މިދިޔަ ކުއާޓަރުގައި 423.3 މިލިއަން ރުފިޔާގެ އާމްދަނީއެއް ވަނީ ލިބިފަ އެވެ.