މަޖިލީހުގެ ތަޅުމުގައި ބަހުސް ކުރާނެ ކަމެއް ނެތް، ގިނަ މަސައްކަތްތައް ކޮމިޓީގައި

ރައްޔިތުންގެ މަޖިލީހުގެ ތަޅުމުގައި ބަހުސް ކުރާނެ ކަމެއް ނެތުމުން، މިއަދު ޖަލްސާއެއް ބޭއްވުމުގެ ބަދަލުގައި ކޮމިޓީގެ މަސައްކަތްތައް ކުރިއަށް ގެންދަން ނިންމައިފި އެވެ.

އިއްޔެ ބޭއްވި ޖަަލްސާ ނިންމައިލައްވަމުން ރިޔާސަތުން، ވިލުފުށީ ދާއިރާގެ މެމްބަރު ހަސަން އަފީފު ވިދާޅުވީ ކޮމިޓީ މަރުހަލާގައި ކުރަން ހުރި މަސައްކަތްތައް ގިނަ ކަަމަށާއި އެ މަސައްކަތްތައް އަވަސް ކޮށްދެއްވަން މެމްބަރުންގެ ކިބައިން އެދިވަޑައިގަންނަވާ ކަމަށެވެ.

"އަޅުގަނޑު އެދެން ހުރިހާ އިއްޒަތްތެރި މެމްބަރުން ވެސް ކޮމިޓީތަކުގެ މުގައްރިރުން ވެސް ކޮމިޓީތަކުގެ ބައްދަލުވުންތައް ބާއްވައި، ކޮމިޓީތަކުގެ މަސައްކަތްތައް ކުރިއަށް ގެންދިއުމަށް،" މިއަދު ޖަލްސާއެއް ނޯންނާނެކަން އިއުލާނު ކުރެއްވުމަށް ފަހު އަފީފު ވިދާޅުވި އެވެ.

އޭނާ މިހެން ވިދާޅުވި ނަަމަވެސް މަޖިލީހުގެ ކޮމިޓީތަކުން މިއަަދަށް ތާވަލްކޮށްފައި އޮތް ފަސް ބައްދަލުވުމުގެ ތެރެއިން ބިލެއްގެ މަސައްކަތް އެޖެންޑާކޮށްފައި އޮތީ އެންމެ ބައްދަލުވުމަކަށެވެ. އެއީ ގައުމީ ތަރައްގީ އާއި ތަރިކައިގެ ކޮމިޓީ އަދި އިޖުތިމާއީ ކޮމިޓީ ގުޅިގެން އުފައްދާފައިވާ ޖޮއިންޓް ކޮމިޓީ އެވެ. އެ ޖޮއިންޓް ކޮމިޓީގެ ބައްދަލުވުމަށް އެޖެންޑާކޮށްފައި އޮތީ އުފަންވުމާއި މަރުވުން ރަަޖިސްްޓަރީކުރުމާއި އުފަން ދުވަހުގެ ސެޓްފިކެޓް އަދި ދިވެހި ރައްޔިތެއްކަން އަންގައިދޭ ކާޑު ހެދުމާ ބެހޭ ބިލްް ދިރާސާކުރުމެވެ.

އެ ބިލާ ބެހޭ ގޮތުން މަޝްވަރާ ކުރުމަށް ދައުލަތުގެ ކަމާ ބެހޭ އިދާރާތަކުގެ އިސްވެރިންނާ ބައްްދަލުކުރުން ތާވަލްކޮށްފައި އޮތީ މިއަދު މެންދުރު ފަހު 2:00 އަށެވެ.

މަޖިލީހުގެ މި ދައުރަށް އަދި ހުށަހަޅާފައި އޮތީ އަށް ބިލެކެވެ. އެއީ ވެސް ސަރުކާާރުން ހުށަހަޅާފައިވާ ބިލްތަކެވެ. އަދި އެއީ މުޅިން ވެސް އާއްމު ގަވައިދުތަކުގެ ގާނޫނުގައިވާ ބައެއް ގަވައިދުތައް ގާނޫނަށް ބަދަލުކުރުމަށް ޓަކައި ހުށަހަޅާފައިވާ ބިލުތަކެވެ.

އާއްމު ގާނޫނުތަކުގެ ގަވައިދަކީ ރާއްޖޭގައި މިހާރު އަމަލުކުރާ އަންނަ ގާނޫނުއަސާސީ ތަސްދީގުކުރުމާ އެކު، އޭރު ހުރި އާއްމު ގަވައިދުތަކުގެ ތެރެއިން ގާނޫނުތަކުގެ ބާރު ލިބިފައި ނެތް ގަވައިދުތަކަށް ބާރު ދިނުމަށް ހަދާފައިވާ ގާނޫނެެކެވެ.

އެ ގާނޫނު ބުނާ ގޮތުން އެ ވަކި މުއްްދަތެއްގެ ތެރޭގައި އެ ގަވައިދުތައް ގާނޫނުތަކަށް ބަދަލުކުރަން ޖެހެ އެވެ. ނުވަތަ ޖެހޭނީ އުވައިލާށެވެ. އެކަމަކު އުވައިލަން ބޭނުން ނުވާ ގަވައިދުތައް ގާނޫނުތަަކަށް ބަލުކުރުމަށްޓަކައި މަޖިލީހުގައި އެދިގެން މުއްދަތު އިތުރުކުރުމުގެ ފުރުސަތު ވެސް އެ ގާނޫނުން ދީފައި ވެ އެވެ.

މި ދައުރަށް ހުށަހަޅާފައިވާ ބިލްތައް:

1- އިލެކްޓްރޯނިކް މުއާމަލާތްތަކާ ބެހޭ ބިލް.

2- އުފަންވުމާއި މަރުވުން ރަޖިސްޓަރީ ކުރުމާއި އުފަން ދުވަހުގެ ސެޓްފިކެޓް އަދި ދިވެހިރައްޔިތެއްކަން އަންގައިދޭ ކާޑު ހެއްދުމާބެހޭ ބިލު.

3- ތިމާވެށި ރައްކާތެރިކޮށް ދެމެހެއްޓުމުގެ ގާނޫނަށްް އިސްލާހު ގެނައުމުގެ ބިލް.

4- ދައުލަތުގެ މާލިއްޔަތު ގާނޫނަށް އިސްލާހު ގެނައުމުގެ ބިލް.

5- ގާނޫނުލްއުގޫބާތަށް އިސްލާހު ގެނައުމުގެ ބިލް (ދީނަށް ފުރައްސާރަ ކުރުމަކީ ޖިނާއީ ކުށަަކަށް ހަދަން ހުށަހެޅި ބިލް)

6- ފަޅުރަށްރަށާ ބެހޭ ގާނޫނަށް އިސްލާހު ގެނައުމުގެ ބިލް.

7- ޖަނަވާރުގެ ރައްކާތެރިކަމާ ބެހޭ ބިލް.

8- ކާބޯތަކެތީގެ ރައްކާތެރިކަމާ ބެހޭ ބިލް.

މި ބިލްތަކުގެ ތެރެއިން ދެ ބިލެއް ފިޔަވައި އެހެން ބިލްތައް ހުރީ ކޮމިޓީ މަރުހަލާ ގަ އެވެ. ތަޅުމުގައި ފުރަތަމަ މަރުހަލާ ނުނިމި އޮތީ އިލެކްޓްރޯނިކް މުއާމަލާތުތަކާ ބެހޭ ބިލާއި ކާބޯތަކެތީގެ ރައްކާތެރިކަމުގެ ބިލެވެ. އިލެކްޓްރޯނިކް މުއާމަލާތްުތަކާ ބެހޭ ބިލްގެ އިބްތިދާއީ ބަހުސް މަޖިލީހުގައި އިއްޔެ ވެސް ކުރި އެވެ. ކާބޯތަކެތީގެ ރައްކާތެރިކަމުގެ ބިލްގެ ބަހުސް އަދި ނުފަށަ އެވެ.

އެ ބިލްްގެ ފުރަތަމަ ކިޔުން މިިދިޔަ މަހުގެ 25 ވަނަ ދުވަހު ބޭއްވި ޖަލްސާގައި އިއްވާފައި ވިޔަސް، އިބްތިދާއީ ބަހުސް އަދި ނުފަށަ އެވެ.

މަޖިލީހުގެ ތަޅުމުގައި ކުރާނެ މަސައްކަތެއް ނެތް ކަމަށް ކުރިން ބުނެފައި ވާއިރު މި ހަފުތާގައި ބޭއްވި ދެ ޖަލްސާ އަށް ވެސް އެޖެންޑާކޮށްފައި އޮތީ ވަރަށް މަދު މަސައްކަތްތަކެކެވެ. މިދިޔަ ހޯމަ ދުވަހުގެ ޖަލްސާ އަށް އެޖެންޑާ ކުރީ އިލެކްޓްރޯނިކް މުއަލާމަލާތުތަކާ ބެހޭ ބިލުގެ ބަހުސާއި ބިމާ ބެހޭ ގާނޫނަށް އިސްލާހު ގެނައުމުގެ ބިލެވެ.

އިއްޔެގެ ޖަލްސާ އަށް އެޖެންޑާ ކުރީ ބިމާ ބެހޭ ގާނޫނަށް އިސްލާހު ގެނައުމުގެ ބިލާއި މަޑުއްވަރީ ދާއިރާގެ މެމްބަރު އާދަމް ޝަރީފު ހުށަހެޅުއްވި މައްސަލައެކެވެ. އެ މައްސަލަ މަޖިލީހަށް ބަލައިގަތުމަށް ފާސްނުވާތީ އެ މައްސަލައިގައި އިއްޔެ ބަހުސް ކުރާކަށް ނުޖެހުނެވެ.