އެމްޑީޕީގެ އޮފީސް ތެރޭގައި މާރާމާރީ ހިންގީ މުސާރަ ކުޑަކުރިކަމުގެ ރުޅީގައި

އެމްޑީޕީގެ ސެކްރެޓޭރިއޭޓްގެ އިސް މުވައްޒަފު މަރިޔަމް ޒުބައިރު (މަންދީ) އަށް އެ ޕާޓީގެ އޮފީސް ތެރޭގައި އެ ތަނުގެ އެހެން މުވައްޒަފަކު މިއަދު ހަމަލަދިނީ އެ މީހާގެ މުސާރަ ކުޑަކުރުމުން އައި ރުޅީގައި ކަމަށް "މިހާރު" އަށް އެނގިއްޖެ އެވެ.

އެމްޑީޕީގެ އޮފީހުގައި މަސައްކަތް ކުރާތާ ގިނަ ދުވަސްތަކެއް ވެފައިވާ ފިރިހެން އެ މުވައްޒަފު މަންދީ އަށް ހަމަލަ ދީ، މަންދީީގެ ބޯ ފަޅައިލީ ބައިސިކަލް ޗޭނުގަނޑަކުން ކަމަށް މިކަން ހިނގައިދިޔަ ގޮތް އެނގޭ ބައެއް މީހުން ބުންޏެވެ. އެ މުވައްޒަފު މި މާރާމާރީ ހިންގީ ޗުއްޓީ އަށް ފަހު މިއަދު އޮފީހަށް ނުކުމެ އެވެ.

މި މާރާމާރީގައި ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއިލް ނަސީމްގެ މަންމަ މަންދީގެ އިތުރުން އެ ތަނުގައި ހުރި އެހެން މީހަކަށް ވެސް ހަމަލަދިނެވެ.

ފުލުހުން ބުނީ މި ދެ މީހުންނަށް ވެސް ހަމަލާ ދީފައި ވަނީ ޗޭނުގަނޑަކުން ކަމަށެވެ.

މި މާރާމާރީއާ ގުޅިގެން ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ކުރެއްވި ޓުވީޓެއްގައި ވަނީ ހަލަދިން މީހުން ހައްޔަރު ކުރުމަށް ގޮވާލައްވައިފަ އެވެ. އަދި އެ މަނިކުފާނު ވިދާޅުވީ، މާރާމާރީގައި އަނިޔާވި މީހުންނަށް އިންސާފު ލިބެން ޖެހޭނެ ކަމަށެވެ.

"އޮފީސް ސްޓާފް މަންދީ ޒުބައިރާއި ޝާމިން އަށް އަވަސް ޝިފާއަކަށް އެދެން،" މިހާރު އިނގިރޭސި ވިލާތުގައި ހުންނެވި ނަޝީދު ވިދާޅުވި އެވެ.