ދީޕިކާ ކޮންމެ ތިން މިނެޓަކުން ކާނެ، މީހަކަށް ނުދޭނެ: އަމީތާބް

ބޮލީވުޑްގެ ބަތަލާ ދީޕިކާ ޕަދްކޯން އަކީ އާދަޔާ ހިލާފަށް ގިނައިން ކާ މީހެއް ކަމަށް ބުނެ ދެއްކި ވާހަކަތަކަކުން، ސޮނީ ޓީވީގެ ކޯން ބަނަގޭ ކަރޯޑްޕަތީ (ކޭބީސީ) 13 ގައި އޭގެ ހޯސްޓް އަމީތާބް ބައްޗަން އޯޑިއަންސް ހެއްވާލައިފި އެވެ.

ހުކުރު ދުވަހުގެ ރޭގެ އެޕިސޯޑްގައި ދީޕިކާއާ އެކު، އޭނާ ބޮލީވުޑަށް ނެރެދިން ޑައިރެކްޓަރު ފަރާ ޚާން ވެސް ބައިވެރިވި އެވެ. ޝޯގެ މެހުމާނުންގެ ގޮތުގައި އެ ދެ މީހުން ބައިވެރިވި އެޕިސޯޑްގައި އަމީތާބް ބުނީ ދީޕިކާ އަކީ ވަރަށް ގިނައިން ކާ މީހެއް ކަމަށެވެ. އަދި އޭނާއާ އެކީ ދެ ފިލްމެއްގައި މަސައްކަތްކުރެވިފައި އޮތުމުން އެކަން ވަރަށް ބޮޑަށް ފާހަގަކުރެވުނު ކަމަށް ބުންޏެވެ،

"އާންމުކޮށް ދުވާލެއްގެ ތެރޭގައި މީހަކު ކައި އުޅޭނީ މައިގަނޑު ގޮތެއްގައި ތިން ފަހަރު. އެއީ ހެނދުނުގެ ނާސްތާ އާއި މެންދުރު ކެއުމުގެ އިތުރުން ރޭގަނޑުގެ ކެއުން،" އަމީތާބް ބުންޏެވެ. "އެކަމަކު ދީޕިކާ އަކީ ކޮންމެ ތިން މިނިޓަކުން ކާ މީހެއް."

އަމީތާބް ބުނި ގޮތުގައި އެކީގައި މަސައްކަތްކުރި ދުވަސްވަރު ދީޕިކާ އެވަރަށް ކާ ތަން ފެނުނަސް ދުވަހަކު އެތިކޮޅެއް ވެސް ދިއްކޮށްނުލާ ކަމަށެވެ.

"އިރުއިރުކޮޅާ ތަށިބަރި އަންނަތަން ފެންނާނެ. ދެން ފެންނާނީ ކޮންމެ ތިން މިނިޓަކުން ދީޕިކާ ކާން އިންދާ. އެކަމަކު އެވަރަށް ކާ އިރު ވެސް ދުވަހަކު އަހައި ވެސް ނުލާނެ އެތިކޮޅެއް ބޭނުންތޯ ވެސް،" އަމީތާބް ސަމާސާކުރަމުން ބުންޏެވެ.

އެކްޓަރު ރަންވީރު ސިންގްގެ އަންހެނުންން ދީޕިކާ އެ ވާހަކަތަކުގެ ރައްދުގައި ބުނީ އޭނާ އަކީ ވަރަށް ގިނައިން ކާ މީހެއް ކަމަށާއި ކެއުމަށް ވަރަށް ލޯބިކުރާ ކަމަށް އަމިއްލަ އަށް ވެސް ގަބޫލުކުރާ ކަމަށެވެ.

"އެކަމަކު އަހަރެންގެ ތަށިބަރިން ކާންނުދޭ ވާހަކަ އަކީ މުޅިން ދޮގެއް. ބައެއް ފަހަރު ގަދަކަމުން ޖަހައިގަނެގެން ވެސް ކައި،" ހީނހީނފައި ދީޕިކާ ބުންޏެވެ.

ދެ ތަރިން އެކީގައި މަސައްކަތްކޮށްފައިވާ ދެ ފިލްމަކީ 2015 ގެ "ޕީކޫ" އާއި 2013 ގެ "އާރަކްޝަން" އެވެ. އަމީތާބާއި ދީޕިކާގެ އަތުގައި މިހާރު ވެސް އެކީގައި ކުޅެން އޮތް ދެ ފިލްމެއް އެބައޮތެވެ. އެއީ ދީޕިކާ ޕްރޮޑިއުސް ވެސް ކުރާ ހޮލީވުޑްގެ ފިލްމު "ދި އިންޓާން" ގެ ރިމޭކާއި "ބާހްބަލީ" ގެ އެކްޓަރު ޕްރަބާސްއާ އެކު ދެ ތަރިން ކުޅޭ އަދި ނަން އިއުލާން ނުކުރާ ފިލްމެކެވެ.

"ކޭބީސީ 13" ގައި ކެއުމުގެ ވާހަކަ ދައްކަމުން އަމީތާބް ވަނީ ފަރާ ގާތު ވެސް ޝަކުވާކޮށްފަ އެވެ. އޭނާ ބުނީ ފަރާ އަކީ ވަރަށް މީރުކޮށް ބިރިޔާނީ ކައްކާ މީހެއްކަން އެނގޭ ކަމަށާއި އަދި ކައްކާފައި ވަރަށް ގިނަ ތަރިންނަށް ކާން ވެސް ދޭ ކަމަށެވެ.

"އެކަމަކު ދުވަހަކު ވެސް އެ ބިރިޔާނީގެ ރަހައެއް އަހަންނަކަށް ދައްކައެއް ނުލާ،" އަމީތާބް ބުންޏެވެ.

އެކަމާ ގުޅުވައިގެން ފަރާ ބުނީ އޭނާ އަކީ މަހުގެ ބާވަތްތަކަށް ހާއްސަ ބިރިޔާނީ ކައްކާ މީހެއް ކަމަށާއި އަމީތާބަކީ ވެޖިޓޭރިއަނަކަށް ވާތީ އޭނާ އަށް ކެވޭ ކަހަލަ ބިރިޔާނީ އެ ގޭގައި ނުކައްކާ ކަމަށެވެ.

"އެކަމަކު ކޮންމެވެސް އިރަކުން ފޮނުވާނަން ތަރުކާރީ އާއި ޕަނީރުން ބިރިޔާނީ ކައްކާފައި،" ފަރާ ބުންޏެވެ.