މަސްތުވާތަކެއްޗާއެކު ހައްޔަރު ކުރި ދެ ފުލުހުންނާއި ސިފައިންގެ މީހާގެ ބަންދަށް ހަ ދުވަސް ޖަހައިފި

މާލޭގައި ފުލުހުން ހިންގި މަސްތުވާތަކެތީގެ އޮޕަރޭޝަނެއްގައި ހައްޔަރު ކުރި ދެ ފުލުހުންނާއި ސިފައިންގެ މީހާގެ ބަންދަށް ހަ ދުވަސް ޖަހާފައިވާ ކަމަށް ފުލުހުން މިއަދު ބުނެފި އެވެ.

ފުލުހުންގެ މީޑިއާ އޮފިޝަލަކު މިއަދު ވިދާޅުވީ މަސްތުވާތަކެތި އަތުލައިގަތުމަށް މިދިޔަ ހޯމަ ދުވަހުގެ ރޭ ހިންގި އޮޕަރޭޝަންގައި ހައްޔަރު ކުރި މީހުން، ހޯމް މިނިސްޓްރީން ކަނޑައަޅާ ތަނެއްގައި ބަހައްޓައިގެން މައްސަލަ ތަހުގީގު ކުރުމަށް ކްރިމިނަލް ކޯޓުން އިއްޔެ ފުލުހުންގެ މައްޗަށް އަމުރުކޮށްފައިވާ ކަމަށެވެ.

ފުލުހުން ހިންގި އޮޕަރޭޝަންގައި، ދެ ފުލުހުންނާއި ސިފައިންގެ މީހެއްގެ އިތުރުން އާންމުންގެ މީހަކު ވެސް ހައްޔަރު ކުރި އެވެ. ނަމަވެސް މި މީހުންނާ ބެހޭ އިތުރު ތަފްސީލެއް ފުލުހުން އަދި ހާމައެއް ނުކުރެ އެވެ. ފުލުހުން ބުނީ މި މައްސަލަ އިތުރަށް ތަހުގީގު ކުރަމުން އަންނަ ކަމަށެވެ.

މި އޮޕަރޭޝަން ހިންގިއިރު، ދެ ފުލުހުންނާއި ސިފައިންގެ މީހާއާ މަސްތުވާތަކެއްޗާ ހުރި ގުޅުމެއް ފުލުހުން ނުބުނެ އެވެ. އަދި ފުލުހުން އަތުލައިގަތީ ކިހާ އަދަދެއްގެ މަސްތުވާތަކެއްޗެއް ކަމެއް ވެސް ނުބުނެ އެވެ.

މަސްތުވާތަކެތީގެ މައްސަލަތަކުގައި ދޭތެރެ ދޭތެރެއިން ފުލުހުންނާއި ސިފައިން ހައްޔަރުކުރެ އެވެ.

މިދިޔަ އަހަރުގެ އޮކްޓޫބަރު މަހުން ފެށިގެން މި އަހަރުގެ އޮކްޓޫބަރު މަހުގެ ނިޔަލަށް ފުލުހުންނާއި ކަސްޓަމްސް އިން 100 ކިލޯ އަށް ވުރެ ގިނަ މަސްތުވާތަކެތި ވަނީ އަތުލައިގެންފަ އެވެ. މިހާ ގިނަ އަދަދެއްގެ މަސްތުވާތަކެތި ހޯދުނީ، މީގެ ދެ އަހަރު ކުރިން ދިވެހި ފުލުހުން ބޭނުން ކުރަން ފެށި ކުއްތާތަކުގެ އެހީގަ އެވެ.