ސާފުގެ މޮޅު ކުޅުންތެރިޔާ އަށް މި ފަހަރު އޮތް ޒިންމާ ބޮޑު

އަންނަ މަހު ރާއްޖޭގައި ބާއްވާ ސާފް ޗެމްޕިއަންޝިޕަށް ދިވެހި ޓީމު ކުރިމަތިލާއިރު ރާއްޖެ އަށް އޮތް އެންމެ ބޮޑު ހިތްހަމަޖެހުމަކީ، ސާފް ޗެމްޕިއަންޝިޕުގެ ތަޖުރިބާ އެންމެ ބޮޑަށް ހާސިލު ކުރި ކުޅުންތެރިން ރާއްޖޭގައި ތިބުމެވެ. ރާއްޖެ ފިޔަވައި މުބާރާތުގައި ބައިވެރިވާ އަނެއް ހަތަރު ޓީމަށް އެ ފުރުސަތެއް ނެތެވެ. ޕޮޒިޓިވް އޭންގަލަކުން އެކަން ވިސްނައިފި ނަމަ އެއީ ރާއްޖެ އަށް ނެގެން އޮތް ބޮޑު އެޑްވާންޓޭޖެކެވެ.

ސާފް ޗެމްޕިއަންޝިޕުގެ މޮޅު ކުޅުންތެރިޔާގެ އެވޯޑް ހޯދި ދެ ކުޅުންތެރިން ރާއްޖޭގެ ޓީމުގައި އެބަތިއްބެވެ. އެއީ ރާއްޖެ އިން އެންމެ ފުރަތަމަ ފުރަތަމަ ސާފް ޗެމްޕިއަންޝިޕް ކާމިޔާބު ކުރި އިރު މުބާރާތުގެ މޮޅު ކުޅުންތެރިޔާގެ އެވޯޑް ހޯދި އަލީ އަޝްފާގް (ދަގަނޑޭ) އާއި އެންމެ ފަހުގެ ސާފް ޗެމްޕިއަންޝިޕު ކާމިޔާބު ކުރި އިރު މޮޅު ކުޅުންތެރިޔާގެ އެވޯޑް ހޯދި ކީޕަރު މުހައްމަދު ފައިސަލް އެވެ.

މި ފަހަރުގެ މުބާރާތާ ހަމައަށް ދެކުނު އޭޝިއާގެ އެންމެ މޮޅު ކުޅުންތެރިޔާގެ އެވޯޑް ހޯލްޑާއަކީ ފައިސަލް އެވެ. މިފަހަރު އޭނާގެ ޒިންމާ މާބޮޑު ކަމަށް ފައިސަލް ގަބޫލު ކުރެ އެވެ. ޗެލެންޖު ވެސް ބޮޑެވެ. ސާފް ޗެމްޕިއަންޝިޕު ޖެހިޖެހިގެން ކާމިޔާބު ކުރި ޓީމެއް އިންޑިއާ ނޫނީ ނެތެވެ. އެ ފުރުސަތު މިހާރު ހޯދެން އޮތީ ރާއްޖެ އަށެވެ. ހާއްސަކޮށް އަމިއްލަ ގައުމުގައި ބާއްވާ މުބާރާތް ކާމިޔާބު ކުރުން ދިވެހިންނަށް އޮތީ މުހިންމުވެފަ އެވެ.

"މިފަހަރު ޗެލެންޖު ބޮޑު. އެކަމަކު ފުރުސަތު ވެސް އެހާ ބޮޑު،" ގައުމީ ޓީމާ އެކު ގަތަރުގައި މިހާރު ތަމްރީނުތައް ހަދަމުންދާ ފައިސަލް ބުންޏެވެ.

"އަހަންނަށް އޮތް ޗެލެންޖު ވެސް ބޮޑު ވެދާނެ. އެކަމަކު އަހަރެމެން ކުޅޭނީ ޓީމެއްގެ ގޮތުގައި. މަސައްކަތް ކުރާނީ ޓީމަށް ކާމިޔާބު ހޯދަން."

ފައިސަލް ބުނީ އެންމެ ފަހުގެ މުބާރާތުގައި ވެސް އެވޯޑަކަށް ނުވިސްނާ ކަމަށެވެ. ނަމަވެސް މޮޅު ކުޅުންތެރިޔާގެ އެވޯޑް ހޯދުމަކީ އޭނާގެ އިތުރުން ގޯލްކީޕިން ޑިޕާޓްމެންޓަށް ވެސް ލިބުނު ބޮޑު ހިތްހަމަޖެހުމެއް ކަމަށް އޭނާ ބުންޏެވެ.

"އަހަންނެއް ނުދެކެން އެވޯޑަކީ އަހަރެންނަށް އެކަނި ލިބުނު އެއްޗެއް ކަމަކަށް. އަސްލަމް ކޯޗް (ގޯލް ކީޕަރު ކޯޗް އަސްލަމް އަބްދު ރަހީމް) ގެ ވަރަށް ބަައިވަރު މަސައްކަތް އެވޯޑްގެ ފަހަތުގައި ވާނެ. އަދި ޓީމުގެ އެހެން ކީޕަރުން ވެސް ޗެލެންޖެއް ދިނީމަ އަހަރެމެންނަށް އެގޮތަށް މަސައްކަތް ކުރެވުނީ."

އެ ފަހަރު މުބާރާތަށް ގައުމީ ޓީމު ތައްޔާރު ވަމުން ދިޔައިރު އެފްއޭއެމުން ގެނެސްދިން ވީޑިއޯ އިންޓަވިއުއެއްގައި އަސްލަމް ބުނެފައި ވަނީ، އެ ފަހަރު ކީޕަރުންގެ ފެންވަރު ތަފާތު ވާނެ ކަމަށެވެ. އަސްލަމްގެ އެ އިންޓަވިއު ހަނދާން ފައިސަލް އާ ކުރި އެވެ.

"އެ އިންޓަވިއު ދީފައި އައިސް އަސްލަމް ކޯޗު ބުނި މި އައީ އެގޮތަށް ބުނެފައޭ. އެހެން ބުނީމަ ވެސް ހިތަށް އެރި އިތުރަށް މަސައްކަތް ކުރާނަމޭ،" ފައިސަލް ކިޔައި ދިނެވެ. "ހަގީގަތުގައި އަސްލަމް ކޯޗު އެ ޗެލެންޖު އެގޮތަށް ނެގީމަ އެފަހަރު ކާމިޔާބުވީ ވެސް."

މިފަހަރު ގޯލްކީޕިން ކޯޗިން ޓީމުގައި ގައުމީ ޓީމުގެ ކުރީގެ އެއް ވަނަ ކީޕަރު އިމްރާން މުހައްމަދު ވެސް ހިމެނެ އެވެ. އެންމެ ފުރަތަމަ ސާފް ޗެމްޕިއަންޝިޕް ކާމިޔާބުކުރި ޓީމުގައި އިމްރާން އަކީ ބަތަލެކެވެ. ފައިސަލް ބުނީ އިމްރާން ކޯޗިން ޓީމުގައި ހުރުން އެއީ ޓީމުގެ ކީޕަރުންނަށް ލިބޭ ބޮޑު އިތުބާރެއް ކަމަށެވެ.

"ރާއްޖޭގެ ގައުމީ ޓީމުގައި އެންމެ ގިނަ މެޗު ކުޅުނު ކުޅުންތެރިޔަކީ އިންމަ ކޯޗު (އިމްރާން) ގައުމީ ޓީމުގައި އެންމެ ޕްރެޝަރު މެޗުތައް ކުޅުނު ކީޕަރަކަށް އިންމަ ކޯޗް ވާނެ،" ފައިސަލް ބުންޏެވެ.

"ޕްރެޝަރު މެޗުތަކަށް ކީޕަރުން ތައްޔާރު ކުރާނެ ގޮތް އިންމަ ކޯޗަށް އެނގޭނެ. އޭނާގެ އެކްސްޕީރިއަންސް މިތިބަ ގޯލްކީޕަރުންނަށް މުހިންމު ވާނެ."

ގައުމީ ޓީމުން މިހާރު ދަނީ ގަތަރުގައި ޓްރޭނިން ހަދަމުންނެވެ. ޓީމު އެނބުރި ރާއްޖެ އަންނާނީ މި މަހުގެ 28 ވަނަ ދުވަހު އެވެ.

ސާފު ޗެމްޕިއަންޝިޕްގައި ރާއްޖެ ކުޅޭ މެޗުތައް

އޮކްޓޯބަރު 1: ރާއްޖެ - ނޭޕާލް

އޮކްޓޯބަރު 7: ރާއްޖެ - ބަންގްލަދޭޝް

އޮކްޓޯބަރު 10: ރާއްޖެ - ސްރީ ލަންކާ

އޮކްޓޯބަރު 13: ރާއްޖެ- އިންޑިއާ

ލީގު އުސޫލުން ކުޅުމަށް ފަހު ފައިނަލަށް ދާނީ އެންމެ ގިނަ ޕޮއިންޓް ހޯދާ ދެ ޓީމެވެ. މި ފަހަރުގެ މުބާރާތުގައި ބޫޓާން އާއި ޕާކިސްތާން ވާދައެއް ނުކުރާނެ އެވެ. މުބާރާތުގައި ވާދަނުކުރަން ބޫޓާން ނިންމީ އެ ގައުމުގައި ކޮވިޑުގެ ހާލަތު އޮތް ގޮތުން ގައުމުން ބޭރަށް ފުރައިގެންދާން ފުޓުބޯޅަ ޓީމަށް ހުއްދަ ނެތުމުންނެވެ. ޕާކިސްތާން އޮތީ ފީފާ ސަސްޕެންޝަނުގަ އެވެ.